រាជធានីភ្នំពេញ ៖ អ្នករត់ម៉ូតូឌុបចំនួន៦នាក់បានត្រូវប៉ូលិសខណ្ឌសែនសុខ ឃាត់ខ្លួនកាលពីវេលាម៉ោង១០ព្រឹកថ្ងៃទី២៤ កញ្ញា នៅមុខវត្តសំរោងអណ្ដែត តាមបណ្ដោយផ្លូវភ្នំពេញ-ហាណូយ ក្នុងសង្កាត់ភ្នំពេញថ្មី ខណ្ឌសែនសុខ ហើយម៉ូតូចំនួន៦គ្រឿងក៏ត្រូវបានដកហូតដែរ ខណៈពួកគេប្រមូលផ្ដុំគ្នាលេងបៀនៅលើផ្លូវសាធារណៈ។ ការឃាត់ខ្លួនអ្នករត់ម៉ូតូឌុបទាំងនេះគឺដើម្បីនាំមកធ្វើការអប់រំ និងយោងតាមបទបញ្ជារបស់លោកអភិបាលខណ្ឌសែនសុខផងដែរ ។
លោកម៉ក់ ហុង អធិការប៉ូលិសខណ្ឌសែនសុខ បានប្រមូលអ្នករត់ម៉ូតូឌុបដែលញៀនល្បែងខាងលើឱ្យអ្នកកាសែតថត ដើម្បីបង្ហាញមុខជាសាធារណៈ ពោលគឺដើម្បីឱ្យអ្នកទាំងអស់នេះរាងចាលកុំឱ្យលេងល្បែងនៅតាមផ្លូវសាធារណៈដោយគ្មានសណ្ដាប់ធ្នាប់ដូចស្រុកគ្មានច្បាប់ទម្លាប់បែបនេះតទៅទៀត ។ លោកម៉ក់ ហុង បានឱ្យដឹងថា អ្នករត់ម៉ូតូឌុបទាំង៦នាក់ខាងលើនេះគឺ១-ឈ្មោះអ៊ូ ចំរើន ភេទប្រុស អាយុ២៥ឆ្នាំ ស្នាក់នៅភូមិចុងថ្នល់ខាងលិច ២-ឈ្មោះវ៉ន វិរៈ ភេទប្រុស អាយុ៣២ឆ្នាំ ៣-ឈ្មោះយស់ សាវ៉ាត ភេទប្រុស អាយុ៣២ឆ្នាំ ៤-ឈ្មោះឈឹម វ៉ាត ភេទប្រុស អាយុ៣៣ឆ្នាំ ៣នាក់នេះស្នាក់នៅភូមិត្រពាំងឈូក សង្កាត់ទឹកថ្លា ខណ្ឌសែនសុខ ៥-ឈ្មោះឡាយ ស៊ីណា ភេទប្រុស អាយុ២៦ឆ្នាំ ស្នាក់នៅភូមិល្វា សង្កាត់ចោមចៅ ខណ្ឌពោធិ៍សែនជ័យ ៦-ឈ្មោះកូវ រឹម ភេទប្រុស អាយុ២៤ឆ្នាំ ស្នាក់នៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ។លោកបានបន្តថា អ្នករត់ម៉ូតូឌុបខាងលើនេះប៉ូលិសធ្វើការអប់រំរួចដោះលែងឱ្យទៅប្រកបមុខរបរវិញក្រោយពេលធ្វើកិច្ចសន្យាបញ្ឈប់ការលេងល្បែងតាមលើផ្លូវឥតសណ្ដាប់ធ្នាប់បែបនេះ ។
លោកលី សាវេត អភិបាលខណ្ឌសែនសុខមានប្រសាសន៍ថា ជាញឹកញាប់លោកតែងតែឃើញអ្នករត់ម៉ូតូឌុបខាងលើប្រមូលផ្ដុំគ្នាលេងល្បែងស៊ីសងនៅម្ដុំមុខវត្តសំរោងអណ្ដែត តាមបណ្ដោយផ្លូវភ្នំពេញ-ហាណូយទើបលោកបញ្ជាទៅសមត្ថកិច្ចឱ្យប្រមូលចាប់យកមកអប់រំ ។ លោកបន្តថា សូមប្រជាពលរដ្ឋកុំុចាត់ទុកជាយរាជធានីចង់ធ្វើអ្វីក៏បានតាមតែអំពើចិត្តដូចជាលេងល្បែងតាមផ្លូវសាធារណៈបែបនេះដាច់ខាតអាជ្ញាធរមានវិធានការមិនលើកលែងឡើយ ។
លោកបានពន្យល់ថា អ្នករត់ម៉ូតូឌុបមកពីផ្ទះដើម្បីមកប្រកបអាជីវកម្ម ដើម្បីយកប្រាក់មកចិញ្ចឹមប្រពន្ធកូន ចុះបើមកប្រមូលផ្ដុំគ្នាប្រព្រឹត្តល្បែងស៊ីសងបែបនេះ បានលុយឯណាទៅចឹញ្ចឹមប្រពន្ធកូន? ដូច្នេះគួរតែប្រជាពលរដ្ឋចៀសវាងអំពើទាំងនេះហើយនាំគ្នាទៅប្រកបរបរត្រឹមត្រូវរបស់ខ្លួនវិញល្អជាង៕
ចែករំលែកព័តមាននេះ