រាជធានីភ្នំពេញ ៖ ពិធីចុះហត្ថលេខាលើកិច្ចព្រមព្រៀងសហប្រតិបត្តិការរវាងវិទ្យុជាតិកម្ពុជា និងវិទ្យុសំឡេងវៀតណាម ដំណាក់កាលឆ្នាំ២០១៣-២០១៦ បានប្រារព្ធធ្វើឡើងក្រោមអធិបតីភាពលោកថាច់ ផែន រដ្ឋលេខាធិការក្រសួងព័ត៌មាន ។ លោកតន់ យ៉ាន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកវិទ្យុជាតិកម្ពុជា និងលោកង្វៀន ដាងទៀន អគ្គនាយកវិទ្យុសំឡេងវៀតណាម បានចុះហត្ថលេខាលើកិច្ចព្រមព្រៀងនេះនារសៀលថ្ងៃទី២៤ កញ្ញា ឆ្នាំ២០១២ នៅសណ្ឋាគារភ្នំពេញ ។
លោកតន់ យ៉ាន មានប្រសាសន៍ថា ពិធីចុះហត្ថលេខានេះមានសារសំខាន់ណាស់ ព្រោះធ្វើឱ្យយើងជំរុញបន្តកិច្ចសហប្រតិបត្តិការជាប្រពៃណីដែលយើងមានស្រាប់មកហើយ ។ កិច្ចសហប្រតិបត្តិការនេះគឺយើងផ្លាស់ប្តូរសហការគ្នាទៅវិញទៅមកក៏ដូចជា ផ្លាស់ប្តូរការផ្សព្វផ្សាយដែលទាក់ទងទៅនឹងវប្បធម៌ ប្រពៃណី និងព្រឹត្តិការណ៍ធំៗទាក់ទងទៅដល់ពិធីបុណ្យធំៗរបស់ជាតិយើងទាំងពីរ ។ វិទ្យុសំឡេងវៀតណាមនៅតែបន្តពង្រឹងការផ្សព្វផ្សាយរបស់វិទ្យុជាតិកម្ពុជាទាក់ទងនឹងការបណ្តុះបណ្តាលនូវបុគ្គលិកព័ត៌មានក៏ដូចជាអ្នកបច្ចេកទេសជាដើម ។
លោកមានសង្ឃឹមយ៉ាងមុតមាំថា តាមរយៈនៃការចុះហត្ថលេខានេះនឹងផ្តល់លទ្ធផលជាផ្លែផ្កាថែមទៀតសម្រាប់កិច្ចសហប្រតិបត្តិការរវាងវិទ្យុយើងទាំងពីរ ដើម្បីរួមចំណែកពង្រឹងនូវចំណងមិត្តភាព និងសហប្រតិបត្តការដ៏ជិតស្និទ្ធរវាងប្រជាជនទាំងពីរ ប្រទេសយើងទាំងពីរ និងរដ្ឋាភិបាលនៃប្រទេសយើងទាំងពីរ ។លោកង្វៀន ដាងទៀន អគ្គនាយកវិទ្យុសំឡេងវៀតណាម មានប្រសាសន៍ថា ថ្នាក់ដឹកនាំ និងប្រជាជនប្រទេសយើងទាំងពីរ ជានិច្ចកាលពូនជ្រំចំណងទាក់ទងជិតខាងល្អប្រសើរ មិត្តភាពជាប្រពៃណី សហប្រតិបត្តិការលើគ្រប់វិស័យរឹងមាំយូរអង្វែងរវាងប្រទេសយើងទាំងពីរ ។
លោកអគ្គនាយកវិទ្យុសំឡេងវៀតណាមបញ្ជាក់ថា ពិធីចុះហត្ថលេខាលើកិច្ចព្រមព្រៀងស្តីពីកិច្ចសហប្រតិបត្តិការរវាងវិទ្យុសំឡេងវៀតណាម ជាមួយវិទ្យុជាតិកម្ពុជាដំណាក់កាលឆ្នាំ២០១៣-២០១៦ នេះ យើងអាចអះអាងបាននិងជឿជាក់ទាំងស្រុងទៅលើជំហានអភិវឌ្ឍន៍ថ្មីមួយនៃទំនាក់ទំនងសហប្រតិបត្តិការមិត្តភាពរឹងមាំទៅអនាគតរវាងវិទ្យុជាតិទាំងពីរនេះ ៕
ចែករំលែកព័តមាននេះ