រាជធានីភ្នំពេញ៖ រ៉ឺម៉កម៉ូតូមួយគ្រឿងបានបើកបោះពួយទៅបុកក្បាលរនាំងដែកខណ្ឌចែកមហាវិថីសហព័ន្ធរ៉ុស្ស៊ី បណ្ដាលឱ្យបាក់ដួលរលំបង្គោលបង្ហាញស្លាកសញ្ញាដែលបំពាក់ផ្ទាំងសូឡាពន្លឺព្រះអាទិត្យ និងធ្វើឱ្យបាក់រនាំងដែកអស់ចំនួន៣ផ្ទាំងបណ្ដាលឱ្យអ្នកបើកបររងរបួសដៃ និងជើងហើយជិះម៉ូតូឌុបគេចខ្លួនបាត់ កាលពីវេលាម៉ោង៨ និង១០នាទីយប់ ថ្ងៃទី២៥ កញ្ញា នៅតាមបណ្ដោយមហាវិថីសហពន្ធរុស្ស៊ី មុខវិទ្យាស្ថានបច្ចេកវិទ្យាកម្ពុជា ក្នុងសង្កាត់ទឹកល្អក់ទី១ ខណ្ឌទួលគោក ។
តាមព័ត៌មានឱ្យដឹងថា នៅយប់ថ្ងៃកើតហេតុរ៉ឺម៉កម៉ូតូមួយគ្រឿងខាងលើជិះម្នាក់ឯងបានធ្វើដំណើរតាមវិថីសហព័ន្ធរុស្ស៊ីពីលិចទៅកើតគឺបើកកណ្ដាលផ្លូវតែម្ដង។ នៅពេលធ្វើដំណើរមកដល់កន្លែងកើតហេតុមុខវិទ្យាស្ថានបច្ចេកវិទ្យាកម្ពុជា ក៏បានបុកក្បាលរនាំងដែកពេញទំហឹងបណ្ដាឱ្យបង្គោលស្លាកសញ្ញាដែលបំពាក់ផ្ទាំងសូឡាពន្លឺព្រះអាទិត្យបានបាក់ទ្រេត និងរនាំងដែកចំនួន៣ផ្ទាំងទៀតបានបាក់ដួលរលំ ។
តាមសាក្សីបានឱ្យដឹងថា គ្រោះថ្នាក់បុករនាំងដែកនេះបណ្ដាលឱ្យអ្នកបើកបររងរបួសម្រាមដៃ និងរលាត់ជើងហើយម៉ូតូសណ្ដោងរ៉ឺម៉កម៉ាកYAMAHA SIRIUS ពណ៌ស្លាទុំលាយខ្មៅបានរងការខូចខាត ។ បន្ទាប់ពីជួបគ្រោះថ្នាក់អ្នកបើកបរបានប្រាប់ក្រុមអ្នករត់ម៉ូតូឌុបថា មូលហេតុបណ្ដាលឱ្យបុកក្បាលរនាំងដែកនេះដោយសារគេដេកលក់មួយភាំង ក្រោយមកអ្នកបើកបរនោះបានជិះម៉ូតូឌុបទៅមន្ទីរពេទ្យបាត់ទៅ ។
ចំណុចមុខវិទ្យាស្ថានបច្ចេកវិទ្យាកម្ពុជាតែងតែកើតមានគ្រោះថ្នាក់ចរាចរណ៍ជាបន្តបន្ទាប់ជាច្រើនលើកមកហើយតាំងពីនៅជារបាំងថ្មមិនទាន់ដាក់របាំងដែកម្ល៉េះ ។ គួររំលឹកថាកាលពីវេលាម៉ោង៨ និង៥នាទីយប់ថ្ងៃទី២២ កញ្ញា មានរថយន្តកូរ៉ូឡាស៊េរី២០០៥ពណ៌ខៀវចាស់មួយគ្រឿងបានបើកបោះពួយបុកក្បាលរនាំងដែកបាក់ទ្រេត និងរនាំងដែកបាក់រាប៣ផ្ទាំងផងដែរតែទើបជួលជុលបានតែ២ថ្ងៃ និងមិនទាន់ដោះស្រាយសងការខូចខាតផងត្រូវរ៉ឺម៉កម៉ូតូនេះមកបុកបាក់ទៀត ។រ៉ឺម៉កម៉ូតូត្រូវប៉ូលិសការិយាល័យចរាចរណ៍ផ្លូវគោកបញ្ជូនទៅកាន់សាលារាជធានីភ្នំពេញដើម្បីដោះស្រាយសងការខូចខាត ។
តាមមន្រ្តីជំនាញបានឱ្យដឹងថា ក្បាលរនាំងដែក១មានតម្លៃ៧០០ដុល្លារ ហើយរនាំងដែក១ផ្ទាំងមាន២៥០ដុល្លារ ។ រាល់ការបុកបំផ្លាញអ្នកបង្កត្រូវសងការខូចខាតគុណនឹង២ និងរក្សាទុកយានយន្តរយៈពេល១ខែទើបដោះស្រាយដើម្បីជាការព្រមាន ។ បើគិតពីទំហំការខូចខាតខាងលើ រ៉ឺម៉កម៉ូតូដ៏កញ្ចាស់នេះមិនអាចសងគ្រាន់នោះទេ ៕
ចែករំលែកព័តមាននេះ