រាជធានីភ្នំពេញ ៖ ក្រុមហ៊ុនអេឡិចត្រូនិក Samsung ឈានមុខគេលើបច្ចេកវិជ្ជាព័ត៌មានឌីជីថល និងដំណើរការកម្មវិធី Roadshow ជាច្រើនកន្លែង ដោយលើកដំបូងនៅថ្ងៃទី២២-២៣ កញ្ញា នៅហាង Kfour ក្នុងផ្សារទំនើប City Mall ដើម្បីផ្តល់ឱកាសជូនអតិថិជនទទួលយកបទពិសោធន៍ពីទូរទស្សន៍ Samrt TV ដោយផ្ទាល់ ។ យោងតាមប្រសាសន៍លោក Gwihan Lee នាយកក្រុមហ៊ុនអេឡិចត្រូនិក Samsung ប្រចាំនៅឥណ្ឌូចិន ឱ្យដឹងថា កម្មវិធីនេះ ជាការឆ្លើយតបចំពោះអតិថិជនដែលចាប់អារម្មណ៍លើទូរទស្សន៍ Samsung Smart TV ។ «យើងទទួលបានការពេញចិត្តជាច្រើនពីអតិថិជនចាប់តាំងពីយើងបានដាក់បង្ហាញទូរទស្សន៍ Smart TV ជាច្រើនម៉ូដែល ដូចជាប្រភេទ LED ES8000 និង ES7500 ព្រមទាំងស៊េរី Plasma E8000 នៅលើទីផ្សារប្រទេសកម្ពុជាមក ។ ទោះជាយ៉ាងណា យើងនៅតែមានឱកាសដ៏ធំមួយដើម្បីបង្ហាញជូនអតិថិជនរបស់យើងនូវមុខងារ Smart Interaction, Smart Content និង Smart Evolution ដែលអាចជាបទពិសោធន៍ដ៏ល្អបំផុតសម្រាប់ម៉ូដែលចុងក្រោយនៃទូរទស្សន៍ Samsung Smart TV 2012»។
បច្ចេកវិជ្ជា Smart Interaction របស់ Samsung បានផ្តល់ឱ្យអ្នកប្រើប្រាស់ទូរទស្សន៍ Smart TV នូវជម្រើសប្រកបដោយអព្ភន្តរញ្ញាណច្រើនសម្រាប់ការបញ្ជា និងប្រើប្រាស់ទូរទស្សន៍រវាងអ្នកប្រើប្រាស់ និងអេក្រង់ទូរទស្សន៍ ។ ប្រព័ន្ធបញ្ជាបែបថ្មី ដោយសំឡេង ដោយដៃ និងដោយការចំណាំផ្ទៃមុខមនុស្សរបស់ Samsung បានបង្កើតនូវបទពិសោធន៍ដ៏អស្ចារ្យដល់អ្នកប្រើប្រាស់ ។ អ្នកប្រើអាចបើក ឬបិទទូរទស្សន៍ ប្តូរប៉ុស្តិ៍ និងដំឡើងសំឡេង ឆែកឆេរអីុនធើរណេត កម្សាន្តលើ Facebook ឬលេងហ្គេម ដូចជា Angry Birds និងអាចប្រើ Video Calls លើកម្មវិធី Skype ដោយមិនចាំបាច់ប្រើតេឡេបញ្ជា ។ ស៊េរីទូរទស្សន៍ Samsung Smart TV 2012 មានភ្ជាប់មកជាមួយនូវកាមេរ៉ាដែលអាចកំណត់ចលនានៅខាងមុខ ព្រមទាំងមីក្រូហ្វូនដែលអាចចំណាំសំឡេងបានផងដែរ ។
លោក Gwihan Lee បានបញ្ជាក់ថា «ទូរទស្សន៍ Samsung Smart TV នាំមកនូវបទពិសោធន៍ថ្មីនៃការប្រើប្រាស់ទូរទស្សន៍ក្នុងកម្រិតមួយដ៏ខ្ពស់ ដោយផ្តល់នូវពណ៌ដ៏ស្រស់បំព្រងពិតៗដល់ជីវិត និងភាពភ្លឺច្បាស់ល្អ ខណៈពេលទស្សនាភាពយន្ត លេងហ្គេម កម្សាន្តជាមួយហ្គេមជាទីពេញចិត្តរបស់អ្នកដូចជា Angry Birds ព្រមទាំងអាចរីករាយនឹងសំឡេង Surround Sound នៅពេលទស្សនាវីដេអូតន្ត្រី K-Pop លើអីុនធើរណេត ។ បន្ថែមលើនេះ ទូរទស្សន៍ Samsung Smart TV រចនាឡើងយ៉ាងល្អឥតខ្ចោះដែលអាចដាក់តាំងយ៉ាងស្រស់ស្អាតនៅលើតុក្នុងបន្ទប់គេង ឬចាប់ព្យួរនៅលើជញ្ជាំងនៃបន្ទប់ទទួលភ្ញៀវរបស់អ្នក ។ ប៉ុន្តែដើម្បីឱ្យជាក់ច្បាស់សូមអញ្ជើ្មកទស្សនាផលិតផលដោយផ្ទាល់» ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ