រាជធានីភ្នំពេញ ៖ កាលពីព្រឹកថ្ងៃទី២៤ ខែកញ្ញា ឆ្នាំ២០១២ លោកឧកញ៉ា អូស្មាន ហាស្សាន់ រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ ជាទីប្រឹក្សាសម្ដេចអគ្គមហាសេនាបតីតេជោ ហ៊ុន សែន និងជាប្រធានអង្គការមូលនិធិអភិវឌ្ឍន៍មូស្លីមកម្ពុជាបានចុះពិនិត្យការដ្ឋានសាងសង់វិហារអ៊ិស្លាម អាល់ស៊ែរកាល (AL.SERKAL) បឹងកក់ ដែលជាវិហារធំជាងគេនៅកម្ពុជា
រាជធានីភ្នំពេញ ៖ កាលពីព្រឹកថ្ងៃទី២៤ ខែកញ្ញា ឆ្នាំ២០១២ លោកឧកញ៉ា អូស្មាន ហាស្សាន់ រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ ជាទីប្រឹក្សាសម្ដេចអគ្គមហាសេនាបតីតេជោ ហ៊ុន សែន និងជាប្រធានអង្គការមូលនិធិអភិវឌ្ឍន៍មូស្លីមកម្ពុជាបានចុះពិនិត្យការដ្ឋានសាងសង់វិហារអ៊ិស្លាម អាល់ស៊ែរកាល (AL.SERKAL) បឹងកក់ ដែលជាវិហារធំជាងគេនៅកម្ពុជា ដែលគ្រោងនិងបញ្ចប់នាខែកក្កដា ឆ្នាំ២០១៣ខាងមុខនេះ ។ ក្នុងឱកាសនេះក៏មានការអញ្ជើញអមដំណើរពីសំណាក់សមាជិកសភារាជរដ្ឋាភិបាលដែលជាថ្នាក់ដឹកនាំអ៊ិស្លាមយ៉ាងច្រើនកុះករ ។
លោកឧកញ៉ាអូស្មាន ហាស្សាន់បានឱ្យដឹងថា វិហារអ៊ិស្លាមបឹងកក់នេះ ជាវិហារដ៏ធំស្កឹមស្កៃ និងធំជាងគេនៅក្នុងព្រះរាជាណាចក្រកម្ពុជាដែលបានបើការដ្ឋានសាងសង់ កាលពីថ្ងៃទ២៩ ខែកក្កដា ឆ្នំា២០១១កន្លងមក ហើយបានប្រមាណ៦០ភាគរយ ។ ដោយគ្រោងចំណាយថវិកាអស់ប្រមាណ១លាន៥សែនដុល្លារអាមេរិក ដែលជាជំនួយរបស់លោកអ៊ីសាត ប៉េនណាស៊ារ ជាពាណិជ្ជករប្រទេសអារ៉ាប់រួមអេមីរ៉ាត់ ។
លោកឧកញ៉ាបានបញ្ជាក់ឱ្យដឹងថាវិហារនេះ ស្ថិតនៅភូមិ៦ សង្កាត់ស្រះចក ខណ្ឌដូនពេញ រាជធានីភ្នំពេញ ជាវិហារខ្នាតអន្តរជាតិ អាចទទួលសាសនិកអ៊ិស្លាមចូលសូត្រធម៌ ថ្វាយបង្គំបានចំនួន១.៥០០នាក់ទៅ២.០០០នាក់ ។ វិហារនេះក៏ជាកន្លែងសម្រាប់ផ្ដល់ជាទីកន្លែងឱ្យថ្នាក់ដឹកនំាធំៗ ដើម្បីជូបជុំគ្នាពិភាក្សាលើការងារអភិវឌ្ឍន៍របស់សង្គម ហើយក៏ជាទីកន្លែងប្រមូលផ្ដុំរបស់សិស្ស និស្សិត បញ្ញវន្ត ទំាងអស់ដែលបានមកធ្វើការសិក្សានៅភ្នំពេញ ពិសេសសិស្ស និសិ្សត ដែលមកពីតាមបណ្ដាខេត្ដនានា មកស្នាក់នៅ រៀនសូត្រ នៅរាជធានីភ្នំពេញផងដែរ ។
លោកឧកញ៉ាអូស្មាន ហាស្សាន់ បន្ដថា វិហារនេះមានមួយផ្នែកជាកន្លែងបណ្ណាល័យ មួយកន្លែងទៀតជាថ្នាក់សម្រាប់បណ្ដុះបណ្ដាលអប់រំដល់សិស្ស និស្សិតអ៊ិស្លាម និងមួយផ្នែកទៀត សម្រាប់បម្រើដល់វិស័យសាសនាអាចចូលមកទីនេះដើម្បីសិក្សារៀនសូត្រ ស្វែងយល់ ។ ម្យ៉ាងទៀតវិហារនេះជាកន្លែងថ្វាយបង្គំរបស់ថ្នាក់ដឹកនាំអ៊ិស្លាមនៅលើពិភពលោក និងជាកន្លែងទេសចរណ៍សម្រាប់អន្តរជាតិផងដែរ ។
លោកឧកញ៉ាបានឱ្យដឹងទៀតថា ក្នុងរបបប្រល័យពូជសាសន៍ខ្មែរក្រហម វត្តអារាម វិហារ ស៊ូរ៉ាវ សាលារៀន ត្រូវបានបំភ្លេចបំផ្លាញស្ទើរតែទាំងអស់ សាសនិកអ៊ិស្លាម ក៏ដូចជាពុទ្ធបរិស័ទ និងហាមឃាត់មិនឱ្យគោរពប្រតិបត្តិអ្វីឡើយ ។ ក្រោយថ្ងៃរំដោះ៧ មករា សាសនិកអ៊ិស្លាមកម្ពុជា ក៏ដូចជាពុទ្ធបរិស័ទបានរស់រានឡើងវិញហើយមានសិទ្វិពេញលេញក្នុងការគោរពប្រតិបត្តិរៀងៗខ្លួន ។ ក្រោមការដឹកនាំប្រកបដោយគតិបណ្ឌិតរបស់សម្តេចទាំង៣ ជាពិសេសក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាធ្វើឱ្យប្រទេសជាតិមានការរីកចម្រើនលើគ្រប់វិស័យ ទាំងវិស័យអាណាចក្រ និងពុទ្ធចក្រ និងអ៊ិស្លាមសាសនាផងដែរ ។
លោកឧកញ៉ាអូស្មាន ហាស្សាន់ ក៏បានថ្លែងអំណរគុណដល់សម្ដេចតេជោ ហ៊ុន សែន ដែលសម្តេចបានផ្ដល់ឱកាសដល់សហគមអ៊ិស្លាមឱ្យមានសិទ្ធិគ្រប់យ៉ាងក្នុងការគោរពប្រតិបត្តិទៅតាមជំនឿសាសនារបស់ខ្លួន និងថ្លែងអំណរអរគុណដល់សប្បុរសជនរបស់ប្រទេសអារ៉ាប់រួមអេមីរ៉ាត ដែលបានផ្ដល់ជាថវិកាយ៉ាងច្រើនក្នុងការកសាងវិហារអ៊ិស្លាមនេះ និងសាងសង់សមិទ្ធផលនានានៅកម្ពុជា ដើម្បីលើកកម្ពស់ ជីវភាពរស់នៅរបស់ប្រជាពលរដ្ឋ ក្នុងន័យរួមចំណែកកាត់បន្ថយភាពក្រីក្ររបស់ប្រជាពលរដ្ឋ ស្របតាមយុទ្ធសាស្ត្ររបស់រាជរដ្ឋាភិបាលកម្ពុជា ៕
ចែករំលែកព័តមាននេះ