តាមប្រភពព័ត៌មានបានឱ្យដឹងថា អ្នកបើកបររថយន្តផ្ទុកទំនិញធុនធំម្នាក់នៅប្រទេសប្រេស៊ីលបានរួចផុតពីការស្លាប់ដោយនឹកស្មានមិនដល់ ខណៈដែលរថយន្តរបស់គេបានរេចង្កូតទៅបុកបង្កាន់ដៃស្ពាន តែសំណាងល្អមិនធ្លាក់ទឹកដោយទើរពាក់កណ្តាលរថយន្តនៅលើស្ពានក្រោយមកក៏មានការជួយសង្គ្រោះទាន់ពេលវេលា ។ ហេតុការណ៍នេះកើតឡើងកាលពីរសៀលថ្ងៃទី២២ កញ្ញា ។
លោកអាគុយណាដូ ដាស៊ីលវ៉ា អាយុ៣៣ឆ្នាំ បង្ហើបឱ្យដឹងថា ខណៈពេលខ្លួនកំពុងបើកបររថយន្តផ្ទុកទំនិញនៅលើស្ពានឆ្លងទន្លេដែលតភ្ជាប់រវាងទីក្រុងសៅប៉ាវឡូ និងប៉ារ៉ាណា ស្របពេលនោះមានរថយន្តនៅខាងមុខបានបន្ថយល្បឿនដើម្បីទស្សនាទេសភាពក្នុងទន្លេពីលើស្ពានធ្វើឱ្យខ្លួនដែលកំពុងបញ្ជាយានយន្តលឿនដែរនោះបានវាក់អើក៏បួងចង្កូតគេចស្រាប់តែជ្រុលទៅបុកបង្កាន់ដៃស្ពានបណ្តាលឱ្យបាក់លយរថយន្តចេញពីស្ពានតែរថយន្តមិនធ្លាក់ចូលទន្លេទេបានទើរតែលតោលលើស្ពាន កម្ពស់ពីផ្ទៃទឹកប្រហែល៨ម៉ែត្រ ។
ហេតុការណ៍នៃគ្រោះថ្នាក់រថយន្តបុកបង្កាន់ដៃជាប់ទើរនៅលើស្ពាននេះទម្រាំមានអ្នកបើករថយន្តឆ្លងកាត់ប្រទះឃើញបានចំណាយពេលជិតកន្លះម៉ោង ក្រោយមកគេក៏ជួយសង្គ្រោះអ្នកបើកបរឱ្យចាកចេញពីកាប៊ីនដោយប្រើខ្សែទម្លាក់ចុះក្រោមទើបបុរសនោះផុតពីគ្រោះថ្នាក់ដោយពុំបានរងរបួសអ្វីទេ ។
តាមទីភ្នាក់ងារព័ត៌មានក្នុងស្រុកបានផ្សាយថា ក្រោយពេលកើតឧប្បត្តិហេតុ ខាងលើស្ពានចាប់ផ្តើមញ័រ ដែលបារម្ភថាអាចបាក់ស្រុត ។ ស្ពាននេះសាងសង់តភ្ជាប់រវាងទីក្រុង២មានប្រវែងប្រហែល១.៥០០ម៉ែត្រ ហើយត្រូវបានផ្អាកដំណើរការជាបណ្តោះអាសន្នចាប់តាំងពីកើតហេតុមក ៕
ចែករំលែកព័តមាននេះ