រាជធានីភ្នំពេញ ៖ រថយន្តមីតស៊ុយប៊ីស៊ីធុនធំដឹកទំនិញមួយគ្រឿងបានបើកបុករថយន្តកាមរីឆ្លាមពណ៌ស្ករមួយគ្រឿងដែលកំពុងឆ្លងវិថីឧកញ៉ាទេពផន ចំក្បាលខ្ទាតចេញរងការខូចខាតហើយរថយន្តធំបានជ្រុលឡើងចិញ្ចើមផ្លូវទៅត្របាក់ដើមក្ងោកមួយដើមឱ្យរលើងទាំងឫសរួចបុកចូលសំងំក្នុងផ្ទះ ។ គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១០និង៤៥នាទីយប់ថ្ងៃទី២៤ កញ្ញា នៅចំណុចវិថីឧកញ៉ាទេពផនកែងផ្លូវលេខ២២៣ សង្កាត់ផ្សារដេប៉ូទី១ ខណ្ឌទួលគោក ។
ក្នុងហេតុការណ៍នេះបណ្តាលឱ្យអ្នកបើករថយន្តធុនធ្ងន់ឈ្មោះផុស ហន ភេទប្រុស អាយុ២៤ឆ្នាំ មានលំនៅភូមិភ្នំជី ឃុំត្រពាំងធំ ស្រុកបាគង ខេត្តសៀមរាប ត្រូវរថយន្តកៀបជាប់ជើងរងរបួសបញ្ជូនទៅកាន់គ្លីនិកគីម សុង ។ ចំណែកផ្ទះលេខ១៧១AEoដែលត្រូវរថយន្តបុកចូលនោះបានបាក់ដំបូលសំយាបទ្វារនិងជញ្ជាំង។តាមព័ត៌មានឱ្យដឹងថា មុនពេលកើតហេតុគេឃើញរថយន្តដឹកទំនិញមួយគ្រឿងខាងលើបើកតាមវិថីឧកញ៉ាទេពផនក្នុងទិសដៅពីលិចទៅកើត ។
ពេលធ្វើដំណើរមកដល់កន្លែងកើតហេតុក៏បានបុករថយន្តកាមរីឆ្លាម ពណ៌ស្ករមួយគ្រឿងជិះគ្នា២នាក់ដែលធ្វើដំណើរតាមផ្លូវលេខ២២៣ ក្នុងទិសដៅពីត្បូងទៅជើងខ្វែងគ្នា កំពុងឆ្លងផ្លូវចំក្បាលបណ្តាលឱ្យកាមរីឆ្លាមខ្ទាតចេញរងការខូចខាតក្រពឹតមុខមួយចំហៀងតែពុំបង្កឱ្យមនុស្សរងរបួសទេ ។ប្រភពបន្តថា បន្ទាប់ពីបុកកាមរីឆ្លាមរួចរថយន្តដឹកទំនិញបានរេចង្កូតទៅឆ្វេងដៃឡើងចិញ្ចើមផ្លូវទៅបុកដើមក្ងោកមួយដើមទំហំប្រមាណ១ឱបរលើងទាំងឫសប៉ើងជាប់រថយន្តទៅបុកចូលលំនៅឋានចំទ្វារ បណ្តាលឱ្យសំយាបទ្វារ និងជញ្ជាំងរងការខូចខាតធ្ងន់ធ្ងរ ។ ចំណែកអ្នកបើកបរត្រូវរថយន្តកៀបជាប់បានប្រជាពលរដ្ឋនាំគ្នាជួយចាប់ទាញចេញបញ្ជូនទៅកាន់មន្ទីរពេទ្យ ។
គ្រោះថ្នាក់នេះបង្កឱ្យប្រជាពលរដ្ឋដែលមានលំនៅឋានជាប់គ្នា ភ្ញាក់ផ្អើលភ័យស្រឡាំងកាំងដោយកម្លាំងរថយន្តបុកលាន់ឮរញ្ជួយដី ។ លំនៅឋានដែលរថយន្តបុកចូលទាំងយប់នោះពុំមានមនុស្សសម្រាន្តឡើយ ហើយផ្ទះនោះជាប់គ្នា៣ល្វែង ។តាមសម្តីឈ្មោះផុស ហន អ្នកបើករថយន្តដឹកទំនិញបានឱ្យដឹងថា មុនពេលកើតហេតុរូបគេបានដឹកទំនិញមកពីឃ្លាំងនៅវត្តសំបូរជ្រៃធំព្រំប្រទល់វៀតណាមក្នុងគោលបំណងមកដាក់នៅម្តុំផ្សារដេប៉ូ ។
ពេលធ្វើដំណើរតាមផ្លូវឧកញ៉ាទេពផនមកដល់កន្លែងកើតហេតុមានរថយន្តកាមរីឆ្លាមមួយគ្រឿងបើកឆ្លងផ្លូវក៏បានជាន់ហ្វ្រាំងគេចតែគេចមិនផុតបុកចំក្បាលកាមរីឆ្លាមនោះបណ្តាលឱ្យក្រពឹតមួយចំហៀងហើយជ្រុលចង្កូតទៅបុកដើមឈើនិងផ្ទះតែម្តង ។រថយន្តទាំង២គ្រឿងត្រូវប៉ូលិសការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញចុះមកស្ទូចយកទៅរក្សាទុកដើម្បីដោះស្រាយតាមច្បាប់ ៕
ចែករំលែកព័តមាននេះ