រាជធានីភ្នំពេញ ៖ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នាព្រឹកថ្ងៃទី២៤ ខែកញ្ញា បានយាងទៅកាន់សាធារណរដ្ឋសង្គមនិយមវៀតណាម ដើម្បីបំពេញព្រះរាជទស្សនកិច្ចជាផ្លូវរដ្ឋចាប់ពីថ្ងៃទី២៤ដល់ថ្ងៃទី២៦ ខែកញ្ញា ឆ្នាំ២០១២ តាមការអញ្ជើញរបស់លោកប្រធានាធិបតីនៃសាធារណរដ្ឋសង្គមនិយមវៀតណាម ។
យាងនិងអញ្ជើញជូនព្រះរាជដំណើរព្រះមហាក្សត្រដល់អាកាសយានដ្ឋានអន្តរជាតិភ្នំពេញមានវត្តមានព្រះរាជវង្សានុវង្ស សម្តេចអគ្គមហាពញាចក្រីហេង សំរិន ប្រធានរដ្ឋសភា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងខណៈសម្តេចអញ្ជើញត្រឡប់មកពីប្រទេសព្រុយណេដារូសាឡឹម មុន១៥នាទី មន្ត្រីជាន់ខ្ពស់ព្រឹទ្ធសភា-រដ្ឋសភា រាជរដ្ឋាភិបាល លោកឯកអគ្គរដ្ឋទូតសាធារណរដ្ឋសង្គមនិយមវៀតណាមប្រចាំព្រះរាជាណាចក្រកម្ពុជា និងមន្ត្រីអ្នកមុខ អ្នកការ ជាច្រើនរូបទៀត ។
ក្នុងឱកាសយាងទៅបំពេញព្រះរាជទស្សនកិច្ចផ្លូវរដ្ឋនៅសាធារណរដ្ឋសង្គមនិយមវៀតណាមនេះ ព្រះករុណា ព្រះមហាក្សត្រនៃព្រះរាជាណាចក្រកម្ពុជាបានសម្តែងនូវការសព្វព្រះទ័យចំពោះទំនាក់ទំនងជិតខាងល្អ មិត្តភាពជាប្រពៃណី និងកិច្ចសហប្រតិបត្តិការប្រកបដោយផ្លែផ្កាយ៉ាងល្អបំផុតរវាងប្រទេសទាំង២ ៕
ចែករំលែកព័តមាននេះ