ខេត្តបាត់ដំបង ៖ ជនម្នាក់ដែលសមត្ថកិច្ចអះអាងថា ញៀនថ្នាំផងនោះ បានត្រូវឃាត់ខ្លួនកាលពីវេលាម៉ោង៩យប់ថ្ងៃទី២៣ កញ្ញា ២០១២ នៅចំណុចផ្ទះជួលមួយកន្លែង ស្ថិតក្នុងភូមិកំពង់ក្របី សង្កាត់ស្វាយប៉ោ ក្រុងបាត់ដំបង ក្រោយពីប្រើកាំបិត២ភ្ជង់គំរាមសម្លាប់អឌិតសង្សារ ព្រោះតែនាងមិនចែកប្រាក់ខ្លះឱ្យខ្លួនដែលជាកម្រៃលក់កូនតូចអាយុ២ខួប ជាចំណងដៃរួមគ្នាក្នុងការរួមរស់នាមជាសង្សាររយៈពេល៥ឆ្នាំ ។
សមត្ថកិច្ចប្រាប់ឱ្យដឹងថា ជននោះឈ្មោះប៉ែន ភត្រា អាយុ២៥ឆ្នាំ ជាបុគ្គលិកបម្រើការតាមហាង រីឯនារីរងគ្រោះជាអឌិតសង្សារឈ្មោះពៅ សុភា អាយុ២៣ឆ្នាំ ជាអ្នកធ្វើការក្នុងហាងខារ៉ាអូខេមួយក្នុងក្រុងបាត់ដំបង តែពួកគេជាអ្នករស់នៅភ្នំពេញដូចគ្នា ។ សមត្ថកិច្ចបន្តថា បុរសនេះត្រូវឃាត់ខ្លួនបន្ទាប់ពីបានវាយដំ និងប្រើកាំបិតបុ័ងតោភ្ជង់.ក រួចប្រើកូនកាំបិតស្នៀតភ្ជង់ពោះរកសម្លាប់នាងជាអឌិតសង្សារ តែសំណាងល្អបានអ្នកនៅក្បែរនោះជួយរំដោះនាងចេញបាន។ តាមការសាកសួរថា បុរសញៀនថ្នាំនេះខឹង និងអឌិតសង្សារយកកូនទៅលក់ឱ្យគេបាន៣០០ដុល្លារ ហើយមិនព្រមចែកប្រាក់មកខ្លួនខ្លះ ដែលកូនតូចអាយុ២ខួបនោះជាស្នាដៃរួមគ្នាកាលរួមរស់ជាមួយគ្នារយៈពេល៥ឆ្នាំ ក្នុងនាមជា «ប្តីប្រពន្ធហេងស៊យ» ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ