ខេត្តក្រចេះ ៖ លោកឧត្តមសេនីយ៍ឯក សួស អង្គារ អគ្គស្នងការរងនគរបាលជាតិតំណាង លោកនាយឧត្តមសេនីយ៍អគ្គស្នងការនគរបាលជាតិ កាលពីព្រឹកថ្ងៃទី២២ កញ្ញា បានអញ្ជើញជាអធិបតីក្នុងពិធីកាត់ខ្សែបូសម្ពោធដាក់ឲ្យប្រើប្រាស់ជាផ្លូវការនូវអគារប៉ុស្តិ៍រដ្ឋបាលសំបុកមួយខ្នង មានទីតាំងនៅមុខរមណីយដ្ឋានកាំពី ក្នុងឃុំសំបុក ស្រុកចិត្របុរី ក្រោយពីបានស្ថាបនារួចជាស្ថាពរមាន
ខេត្តក្រចេះ ៖ លោកឧត្តមសេនីយ៍ឯក សួស អង្គារ អគ្គស្នងការរងនគរបាលជាតិតំណាង លោកនាយឧត្តមសេនីយ៍អគ្គស្នងការនគរបាលជាតិ កាលពីព្រឹកថ្ងៃទី២២ កញ្ញា បានអញ្ជើញជាអធិបតីក្នុងពិធីកាត់ខ្សែបូសម្ពោធដាក់ឲ្យប្រើប្រាស់ជាផ្លូវការនូវអគារប៉ុស្តិ៍រដ្ឋបាលសំបុកមួយខ្នង មានទីតាំងនៅមុខរមណីយដ្ឋានកាំពី ក្នុងឃុំសំបុក ស្រុកចិត្របុរី ក្រោយពីបានស្ថាបនារួចជាស្ថាពរមានរយៈពេល៥ខែមក ។
ថ្លែងនៅក្នុងពិធីសម្ពោធនាព្រឹកនោះ លោកឧត្តមសេនីយ៍ត្រី ជួង ស៊ាងហាក់ ស្នងការនគរ បាលខេត្តបានថ្លែងថា ក្រោមការជួយឧបត្ថម្ភគាំទ្រថវិកាពីប្រទេសអូស្រ្តាលីហៅកាត់ថា AUSAID ជាមួយនឹងអគ្គស្នងការដ្ឋាននគរបាលជាតិ ទើបបានចាប់ផ្តើមសាងសង់នូវអគារប៉ុស្តិ៍រដ្ឋបាលនគរបាលឃុំសំបុកនេះឡើង ។
លោកស្នងការបានបញ្ជាក់ថា អគារប៉ុស្តិ៍រដ្ឋបាលដ៏ថ្មីសន្លាងនេះ បានចាប់ផ្តើមសាងសង់តាំងពីថ្ងៃទី៨ ឧសភា ឆ្នាំ២០១២ រហូតមកដល់ថ្ងៃទី៨ កញ្ញា ឆ្នាំ២០១២ ទើបបានរួចរាល់ជាស្ថាពរ ដោយចំណាយថវិកាអស់ជិត៣ម៉ឺនដុល្លារ និងសម្រេចសម្ពោធដាក់ឲ្យប្រើប្រាស់ជាផ្លូវការនៅថ្ងៃទី២២ កញ្ញា ឆ្នាំ២០១២ ក្រោមវត្តមានរបស់លោកឧត្តមសេនីយ៍ឯក សួស អង្គារ អគ្គស្នងការរងនគរបាលជាតិតំណាងលោកនាយឧត្តមសេនីយ៍អគ្គស្នងការនគរបាលជាតិ លោកអភិបាលរងខេត្តក្រចេះ លោកស្រី មីហ្គែល អាន់ឌឺសុន ប្រធានទីភ្នាក់ងារអភិវឌ្ឍន៍អូស្រ្តាលីដើម្បីអភិវឌ្ឍន៍អន្តរជាតិប្រចាំប្រទេសកម្ពុជា ។
មានប្រសាសន៍សំណេះសំណាលក្នុងឱកាសនោះ លោកឧត្តមសេនីយ៍ឯក សួស អង្គារ អគ្គស្នងការរងនគរបាលជាតិ បានចាត់ទុកថា អគារប៉ុស្តិ៍នគរបាលរដ្ឋបាលដែលជាសំណង់ថ្មីសន្លាងនេះ គឺជាហេដ្ឋារចនាសម្ព័ន្ធដ៏មានតម្លៃយ៉ាង វិសេសវិសាលក្នុងការរួមចំណែកយ៉ាងសំខាន់លើតួនាទីភារកិច្ចរបស់នគរបាលប៉ុស្តិ៍រដ្ឋបាលតាមរយៈការអនុវត្តផែនការសកម្មភាពពង្រឹងនគរបាលប៉ុស្តិ៍រដ្ឋបាល ដើម្បីសុវត្ថិភាពសហគមន៍ និងជាការចូលរួមអនុវត្តគោលនយោបាយភូមិ-ឃុំមានសុវត្ថិភាព ។
លោកឧត្តមសេនីយ៍ឯកបានបញ្ជាក់ទៀតថា ក្រៅពីជួយធ្វើឲ្យប្រសើរឡើងដល់កិច្ចបំពេញ ការងារប្រចាំថ្ងៃរបស់មន្រ្តីនគរបាល សំណង់អគារនេះក៏បានគាំទ្រដ៏សំខាន់ដល់ការសម្រួល និងផ្តល់ភាពងាយស្រួលផងដែរ ក្នុងការធ្វើទំនាក់ ទំនង ការជួបប្រាស្រ័យទាក់ទងជាមួយជនរងគ្រោះ សាក្សី ឬប្រជាពលរដ្ឋ ទូទៅដែលមករាយការណ៍ ឬស្វែងរកជំនួយពីនគរបាល និងផ្តល់សេវាប្រកបដោយប្រសិទ្ធភាពជូនប្រជាពលរដ្ឋទូទៅ ។ ជាពិសេសគឺជនដែលងាយរងគ្រោះ មានដូចជាស្រ្តី និងកុមារ និងអាចឲ្យនគរបាលអនុវត្តការងាររបស់ខ្លួនស្របទៅតាមបទដ្ឋានអន្តរជាតិស្តីពីការគោរពសិទ្ធិមនុស្ស និងសិទ្ធិបុគ្គល ៕
ចែករំលែកព័តមាននេះ