រាជធានីភ្នំពេញ ៖ រថយន្តមួយគ្រឿងម៉ាកកាមរីបាឡែន ពណ៌ទឹកប្រាក់ ត្រូវអ្នកបើកបរងោកមួយភាំងបើកបោះពួយបុកចូលផ្ទះសំណាក់យីហោផ្កាយមាស ដែលមានទីតាំងតាមបណ្តោយផ្លូវលេខ៣៧១ ក្នុងសង្កាត់បឹងទំពុន ខណ្ឌមានជ័យ កាលពីវេលាម៉ោង១១យប់ ថ្ងៃទី២២ កញ្ញា បណ្តាលឱ្យជញ្ជាំងផ្ទះខូចខាតបាក់បែកយ៉ាងដំណំ ។
រាជធានីភ្នំពេញ ៖ រថយន្តមួយគ្រឿងម៉ាកកាមរីបាឡែន ពណ៌ទឹកប្រាក់ ត្រូវអ្នកបើកបរងោកមួយភាំងបើកបោះពួយបុកចូលផ្ទះសំណាក់យីហោផ្កាយមាស ដែលមានទីតាំងតាមបណ្តោយផ្លូវលេខ៣៧១ ក្នុងសង្កាត់បឹងទំពុន ខណ្ឌមានជ័យ កាលពីវេលាម៉ោង១១យប់ ថ្ងៃទី២២ កញ្ញា បណ្តាលឱ្យជញ្ជាំងផ្ទះខូចខាតបាក់បែកយ៉ាងដំណំ ។
តាមប្រភពព័ត៌បានឲ្យដឹងថា មុនពេលកើតហេតុគេឃើញរថយន្តបង្កហេតុខាងលើបើកបរតាមបណ្តោយផ្លូវលេខ៣៧១ ក្នុងទិសដៅពីលិចទៅកើត ពេលកំពុងបើកនោះស្រាប់តែអ្នកបើកបរងោកមួយភាំងក៏រេចង្កូតបុកចូលផ្ទះសំណាក់ផ្កាយមាសតាមច្រកទ្វារបាក់ជញ្ជាំងអស់មួយផ្ទាំងបណ្តាលឲ្យរថយន្តធ្លាក់ក្បាលដាំគូទឡើងលើមើលទៅគួរឲ្យញាក់សាច់ ។ ក្រោយពេលមានហេតុការណ៍កើតឡើងសមត្ថកិច្ចមូលដ្ឋានបានចុះអន្តរាគមន៍វាស់វែងពេលនោះត្រូវភាគីម្ចាស់ផ្ទះទារសំណង៣.០០០ដុល្លារ ភាគីម្ចាស់រថយន្តសុំសង២.២០០ដុល្លារប៉ុន្តែដោយភាគីម្ចាស់ផ្ទះមិនយល់ព្រម ទើបសមត្ថកិច្ចសម្រេចស្ទូចរថយន្តខាងលើទៅរក្សាទុកនៅអធិការដ្ឋាននគរបាលខណ្ឌមានជ័យ ដើម្បីចាត់ការតាមផ្លូវច្បាប់ ។
ប៉ូលិសដែលចុះទៅអន្តរាគមន៍ក្នុងហេតុការណ៍ខាងលើនិយាយថា ម្ចាស់រថយន្តខាងលើមានអាការស្រវឹងទើបបើកបររថយន្តបុកចូលផ្ទះសំណាក់ទាំងយប់ ។ ដោយឡែកអ្នកបើករថយន្តបាននិយាយថា ខ្លួនងោកមួយភាំងទើបបើករថយន្តជួបគ្រោះថ្នាក់បែបនេះ ។ ប៉ូលិសនិយាយបន្តថា អ្នករួមដំណើរក្នុងរថយន្តមានគ្នា២នាក់សុទ្ធសឹងជាមនុស្សប្រុសដូចគ្នា ។ នេះចាត់ទុកជាសំណាងហើយដែលហេតុការណ៍ដ៏ញាក់សាច់បែបនេះកើតឡើង តែមិនបណ្តាលឱ្យមនុស្សណាម្នាក់គ្រោះថ្នាក់ ៕
ចែករំលែកព័តមាននេះ