រាជធានីភ្នំពេញ ៖ សន្និសីទផ្នែកធនធានមនុស្ស គឺជាផ្នែកមួយនៃការអភិវឌ្ឍយន្តការធនធានមនុស្ស ដែលត្រូវបានរៀបចំឡើងជាទៀងទាត់ដោយCAMFEBAសម្រាប់បុគ្គលិកផ្នែកធនធានមនុស្ស ក្នុងការចែករំលែកបទពិសោធន៍ការងារនិងពង្រីកបណ្តាញទំនាក់ទំនងរបស់ខ្លួន ។
រាជធានីភ្នំពេញ ៖ សន្និសីទផ្នែកធនធានមនុស្ស គឺជាផ្នែកមួយនៃការអភិវឌ្ឍយន្តការធនធានមនុស្ស ដែលត្រូវបានរៀបចំឡើងជាទៀងទាត់ដោយCAMFEBAសម្រាប់បុគ្គលិកផ្នែកធនធានមនុស្ស ក្នុងការចែករំលែកបទពិសោធន៍ការងារនិងពង្រីកបណ្តាញទំនាក់ទំនងរបស់ខ្លួន ។
កាលពីរសៀលថ្ងៃទី២១ កញ្ញា កន្លងទៅនៅសណ្ឋាគារអាំងទែរកុងទីណង់តាល់ សហព័ន្ធនិយោជក និងសមាគមពាណិជ្ជកម្មកម្ពុជា ហៅ កាត់ថា CAMFEBA បានរៀបចំសន្និសីទផ្នែកធនធានមនុស្សមួយឡើងស្តីពី ផលប្រយោជន៍របស់បុគ្គលិក និងធានារ៉ាប់រងអាយុជីវិត និងធនធានមនុស្ស គឺជាយុទ្ធសាស្រ្តចម្បងនៅក្នុងអាជីវកម្ម ក្រោមជំនួយឧបត្ថម្ភផ្នែកថវិកាដោយក្រុមហ៊ុនធានារ៉ាប់រងអាយុជីវិតកម្ពុជា «កម្ពុជា ឡៃហ្វ»ដែលជាក្រុមហ៊ុនចម្រុះរដ្ឋរវាងរដ្ឋាភិបាលកម្ពុជា តំណាងដោយក្រសួងសេដ្ឋកិច្ច និងហិរញ្ញវត្ថុ ជាមួយដៃគូឯកជនចំនួនបួនមកពី ឥណ្ឌូណេស៊ី ហុងកុង និងថៃ ។
កម្ពុជា ឡៃហ្វ គឺជាក្រុមហ៊ុនធានារ៉ាប់រងអាយុជីវិតទី១ ដែលមានវត្តមានជាប្រវត្តិសាស្រ្តនៅក្នុងព្រះរាជាណាចក្រកម្ពុជា ។ ពិធីនេះមានការចូលរួមយ៉ាងច្រើនកុះករពីតំណាងនិយោជក តំណាងសហគ្រាស ក្រុមហ៊ុននានាដែលជានាយកមន្ត្រីប្រតិបត្តិ និងទីប្រឹក្សាផ្នែកធនធានមនុស្សប្រមាណជា១៥០នាក់ ។
ថ្លែងមតិស្វាគមន៍ទៅកាន់សិក្ខាកាមនៅក្នុងកម្មវិធី លោក សេណាកា ហ្វឺណាន់ដូ អគ្គលេខាធិការរង និងជាហេរញ្ញិករបស់សហព័ន្ធនិយោជក និងសមាគមពាណិជ្ជកម្មកម្ពុជា(CAMFEBA)បានមានប្រសាសន៍ថា នេះគឺជាព្រឹត្តិការណ៍ដ៏សំខាន់មួួយដែលត្រូវបានបង្កើត និងរៀបចំឡើងដោយCAMFEBA តាំងពីឆ្នាំ២០០៥មកម្លេះ។ កម្មវិធីនេះមានការប្រជុំជារៀងរាល់២ខែម្តង ដើម្បីផ្តល់ឱកាសឱ្យសមាជិកទាំងអស់បានជួបជុំគ្នាពិភាក្សាផ្លាស់ប្តូរយោបល់ទៅលើបញ្ហាធនធានមនុស្ស ក៏ដូចជាការអនុវត្តច្បាប់ការងារ ចែករំលែកបទពិសោធន៍ការងារ និងជាពិសេសដើម្បីបង្កើននូវទំនាក់ទំនងជិតស្និទ្ធរវាងសមាជិកទាំងអស់ ។ លោកបានបន្តទៀតថា នៅក្នុងដំណាក់កាលដែលសេដ្ឋកិច្ចពិភពលោកប្រែប្រួល បញ្ហា ធនធាន និងបញ្ហាការងារបានក្លាយជាសម្ពាធមួយសម្រាប់ពួកយើងទាំងអស់គ្នាត្រូវដោះស្រាយ ។
ថ្នាក់ដឹកនាំទាំងអស់ត្រូវតែចាត់ទុកបុគ្គលិកក្រោមបង្គាប់គឺជាប្រភពធនធានដ៏សំខាន់សម្រាប់អាជីវកម្ម ដែលជានិច្ចកាលនៅក្នុងប្រតិបត្តិការអាជីវកម្មទាំងអស់ គេបង្រួមនៅត្រឹមតែបុគ្គលិក ផលិតកម្ម និងផលចំណេញ ។ ជាចុងក្រោយ លោកក៏បានថ្លែងអំណរគុណយ៉ាងជ្រាលជ្រៅ ចំពោះក្រុមហ៊ុនធានារ៉ាប់រងអាយុជីវិតកម្ពុជា ដែលបានចូលរួមជ្រោមជ្រែងទាំងផ្នែកថវិកានិងស្មារតី ដើម្បីឱ្យកម្មវិធីនេះប្រព្រឹត្តទៅដោយភាពរលូន និងជោគជ័យដូចពេលនេះ ។
គួរបញ្ជាក់ផងដែរថា សហព័ន្ធនិយោជកនិងសមាគមពាណិជ្ជកម្មកម្ពុជា(CAMFEBA)គឺជាសមាគមនិយោជកឯករាជ្យមួយដែលមានទស្សនវិស័យធ្វើឱ្យធុរកិច្ចទទួលបានជោគជ័យ ដែលនឹងធ្វើឱ្យប្រទេសកម្ពុជាមានភាពរុងរឿង ។CAMFEBAត្រូវបានបង្កើតឡើងក្នុងឆ្នាំ២០០០និងបានចុះបញ្ជីព្រមទាំងទទួលស្គាល់ដោយរាជរដ្ឋាភិបាលកម្ពុជានិងអង្គការពលកម្មអន្តរជាតិ ILOថា ជាសមាគមតែមួយគត់ដែលតំណាងឱ្យនិយោជកនៅលើវិស័យការងារនៅក្នុងប្រទេសកម្ពុជា ។ សព្វថ្ងៃនេះCAM FEBAតំណាងឱ្យ សហគ្រាសជាង១.៥០០រាប់បញ្ចូលទាំងសហគ្រាសមានសហជីពនិងគ្មានសហជីព ។ CAMFEBAបានផ្តល់នូវសេវាកម្មយ៉ាងទូលំទូលាយទៅឱ្យសមាជិកតាមរយៈសេវាប្រឹក្សាយោបល់បញ្ហា ការងារការចែកចាយនិងផ្សព្វផ្សាយព័ត៌មាន ការបណ្តុះបណ្តាលនិងការអភិវឌ្ឍ ការតស៊ូ ការផ្តល់សេវាឯកសារគតិយុត្ត ការស្រាវជ្រាវនិងបោះពុម្ពផ្សាយ ។
លើសពីនេះទៅទៀត CAMFEBAគឺជាសមាជិករបស់អង្គការនិយោជកអន្តរជាតិ(IOE)សម្ព័ន្ធនិយោជកអាស៊ីបា៉ស៊ីហ្វិក(CAPE)និងសម្ព័ន្ធនិយោជកអាស៊ាន(ACE) ៕
ចែករំលែកព័តមាននេះ