ខេត្តកំពត ៖ បុរស២នាក់ជិះម៉ូតូគុបឌុបគ្នាយ៉ាងលឿនទៅបុកគូទរ៉ឺម៉កម៉ូតូដែលកំពុងឈប់ស្ងៀមស្របទិសគ្នាពីលិចទៅកើត បណ្តាលឱ្យម៉ូតូដួលរុលចូលក្រោមគូទរ៉ឺម៉កម៉ូតូរបួសធ្ងន់ស្រាល៣នាក់ ។ ហេតុការណ៍នេះកើតឡើងកាលពីវេលាម៉ោង១០និង៣០នាទីព្រឹកថ្ងៃទី២១ កញ្ញា នៅលើកំណាត់ផ្លូវជាតិលេខ៣ កំពត-ភ្នំពេញ ចំណុចផ្សារចាស់ ស្រុកឈូក ស្ថិតក្នុងភូមិជ្រៃ ឃុំសត្វពង ស្រុកឈូក ខេត្តកំពត ។
មន្ត្រីសមត្ថកិច្ចនគរបាលចរាចរបានឱ្យដឹងថា មនុស្ស២នាក់ខាងភាគីម៉ូតូគុបបានរងរបួសធ្ងន់ម្នាក់ស្រាលម្នាក់ និងមនុស្សម្នាក់ទៀត ខាងអ្នកបើករ៉ឺម៉កម៉ូតូរងរបួសធ្ងន់ ត្រូវបានគេដឹកទៅសង្គ្រោះភ្លាមៗនៅក្នុងមន្ទីរពេទ្យស្រុកឈូក ។ តាមប្រភពពីសាក្សីដែលឃើញហេតុការណ៍បានឱ្យដឹងថា នៅវេលាម៉ោងខាងលើគេឃើញរ៉ឺម៉កម៉ូតូបើកមកពីលិចរួចឈប់ស្ងៀមហើយអ្នកបើកបរចុះរើសមីញ៉ុងច្រវាក់ពេលកំពុងឱនរើសនោះ ស្រាប់តែម៉ូតូគុបបើកមកពីក្រោយយ៉ាងលឿនបុកខ្ទាតម្ចាស់រ៉ឺម៉ករួមទាំងអ្នកបើកម៉ូតូចូលទៅក្រោមរ៉ឺម៉កម៉ូតូរងរបួសធ្ងន់ ហើយអ្នកទាំង៣ត្រូវបានដឹកទៅសង្គ្រោះភ្លាមៗនៅមន្ទីរពេទ្យបង្អែកស្រុកឈូក ។ ប៉ុន្តែម្ចាស់រ៉ឺម៉កម៉ូតូក្រោយពេលដឹកដល់មន្ទីរពេទ្យស្រុកឈូកដោយរបួសធ្ងន់ពេកក៏ដឹកបន្តទៅសង្គ្រោះនៅមន្ទីរពេទ្យខេត្តតាកែវ ។
មន្ត្រីនគរបាលចរាចរបានឱ្យដឹងថា ភាគីខាងម៉ូតូគុបបើកបរលឿនពេក និងធ្វេសប្រហែសទើបបុករ៉ឺម៉កម៉ូតូកំពុងតែចងស្ងៀមបែបនេះ ។ អ្នកបើកម៉ូតូគុបឈ្មោះសេង សាំង ភេទប្រុស អាយុ៣៣ឆ្នាំ រស់នៅភូមិត្រពាំងគគីរ ឃុំល្បើក ស្រុកឈូក ខេត្តកំពត ម៉ូតូគុប50ពណ៌សម្បកឪឡឹក ។ រីឯអ្នកបើករ៉ឺម៉កម៉ូតូឈ្មោះស៊ឹង ភួង ភេទប្រុស អាយុ៥៥ឆ្នាំ រស់នៅភូមិខ្ជាយខាងត្បូង ឃុំដងទុង ស្រុកដងទុង ខេត្តកំពត ។ ម៉ូតូនិងរ៉ឺម៉កម៉ូតូត្រូវកម្លាំងនគរបាលចរាចរយកទៅរក្សាទុកនៅអធិការដ្ឋាននគរបាលស្រុកឈូករង់ចាំការដោះស្រាយតាមច្បាប់នៅពេលក្រោយ ៕
ចែករំលែកព័តមាននេះ