រាជធានីភ្នំពេញ ៖ យុវជនធ្លាក់ភ្នែក២នាក់ជិះម៉ូតូជ្រែគេឯងចុះឡើងយ៉ាងលឿនពេលជួបហេតុការណ៍ចំពោះមុខក៏ចាប់ហ្រ្វាំងដៃ បណ្តាលឱ្យម៉ូតូដួលបោកជាមួយរឺុម៉កម៉ូតូ ដែលបើកក្នុងទិសដៅបញ្រ្ចាសគ្នាបណ្តាលឱ្យអ្នកបើកម៉ូតូរងរបួសធ្ងន់ រីឯអ្នករួមដំណើររបួសស្រាល កាលពីវេលាម៉ោង៣និង៥៥នាទីរសៀលថ្ងៃទី២១ កញ្ញា នៅខាងត្បូងស្ថានីយទូរទស្សន៍អាស៊ីអាគ្នេយ៍ តាមបណ្តោយផ្លូវណតប្រ៊ីត ក្នុងសង្កាត់ទឹកថ្លា ខណ្ឌសែនសុខ ។
សាក្សីនិយាយថា មុនពេលកើតហេតុគេឃើញយុវជន២នាក់ខាងលើ ជិះម៉ូតូហុងដាធុនសេ១២៥ ស៊េរី២០០៥ ជ្រែគេឯងលេងតាមដងផ្លូវណតប្រ៊ីតពីជើងទៅត្បូងលឿនស្លេវក្នុងស្ថានភាពស្រវឹងជោក ។ ប្រភពបន្តថា ដោយយុវជនទាំងពីរខាងលើជិះលឿន ពេលវាក់ជាមួយយានយន្តខាងមុខចាប់ហ្វ្រាំងដៃមួយទំហឹងក៏បណ្តាលឱ្យដួលបោកអូសទៅបុកចំហៀងខាងឆ្វេងរឺុម៉កម៉ូតូបើកបរដោយបុរសម្នាក់ក្នុងទិសដៅបញ្ច្រាសគ្នាធ្វើឱ្យយុវជនបើកបរម៉ូតូហុងដាសេ១២៥ ខ្ទាតទៅជាប់ជាមួយរឺុម៉កម៉ូតូចំហៀងខាងឆ្វេងរងរបួសធ្ងន់ត្រូវមិត្តភក្តិដែលរងរបួសស្រាលទូរស័ព្ទហៅមិត្តភក្តិម្នាក់ទៀត យកម៉ូតូមកជួយដឹកទៅសង្គ្រោះនៅមន្ទីរពេទ្យដោយខ្លួនឯង ។
ចំណែកម៉ូតូរងការខូចខាតផ្នែកខាងមុខយ៉ាងដំណំ ។ ចំពោះម្ចាស់រឺុម៉កម៉ូតូ មិនបណ្តាលឱ្យរងរបួសទេគ្រាន់តែវៀចឈ្នាន់រឺុម៉កខាងឆ្វេងប៉ុណ្ណោះ ។ក្រោយពេលកើតហេតុប៉ូលិសចរាចរបានចុះទៅវាស់វែង ដោយមិនអាចនិយាយគ្នាបានព្រោះភាគីខាងម្ចាស់ម៉ូតូហុងដាសេ១២៥ សុទ្ធតែស្រវឹងក៏យកម៉ូតូនិងរឺុម៉កម៉ូតូទៅរក្សាទុកនៅអធិការដ្ឋានខណ្ឌសែនសុខ រង់ចាំដោះស្រាយតាមនីតិវិធី៕
ចែករំលែកព័តមាននេះ