ខេត្តព្រៃវែង ៖ សំរាម និងកាកសំណល់ផ្សេងៗ ត្រូវបានអ្នកស្រុកដែលរស់នៅជុំវិញផ្សារកអណ្តើកនាំគ្នាប្រមូលពីតាមផ្ទះរបស់ខ្លួននិងពីក្នុងផ្សារ យកមកចាក់គរលើគ្នាជារៀងរាល់ថ្ងៃ នៅលើចិញ្ចើមផ្លូវជាតិលេខ១ ត្រង់ចំណុចមុខវត្តកអណ្តើក ស្ថិតក្នុងឃុំប្រា សាទ ស្រុកកំពង់ត្របែក ។
ខេត្តព្រៃវែង ៖ សំរាម និងកាកសំណល់ផ្សេងៗ ត្រូវបានអ្នកស្រុកដែលរស់នៅជុំវិញផ្សារកអណ្តើកនាំគ្នាប្រមូលពីតាមផ្ទះរបស់ខ្លួននិងពីក្នុងផ្សារ យកមកចាក់គរលើគ្នាជារៀងរាល់ថ្ងៃ នៅលើចិញ្ចើមផ្លូវជាតិលេខ១ ត្រង់ចំណុចមុខវត្តកអណ្តើក ស្ថិតក្នុងឃុំប្រា សាទ ស្រុកកំពង់ត្របែក ។
សំរាមទាំងនេះបានគរច្រើនឡើងៗជារៀងរាល់ថ្ងៃ ធ្វើឱ្យមានក្លិនស្អុយអសោចិ៍សាយភាយពាសពេញ ហើយសម្រាប់អ្នកដំណើរឆ្លងកាត់ទីនេះ បើរថយន្តដែលបើកបរលឿន និងបិទកញ្ចក់ជិតមិនសូវធុំក្លិនប៉ុន្មានទេ ប៉ុន្តែសម្រាប់អ្នកធ្វើដំណើរដោយម៉ូតូ ឬរ៉ឺម៉កម៉ូតូវិញ ត្រូវតែយកដៃខ្ទប់ច្រមុះអត់ដង្ហើម ហើយងាកមុខចេញព្រោះធុំក្លិនខ្លាំងពេក ។ មិនតែប៉ុណ្ណោះ កាកសំណល់ និងសំរាមទាំងនោះបានហូរចូលទៅក្នុងទឹកប្រឡាយដែលនៅស្របតាមបណ្តោយផ្លូវជាតិ ធ្វើឱ្យទឹកមានក្លិនស្អុយ ពណ៌ខ្មៅល្អក់ ហើយពេលអ្នកស្រុកចុះទៅបាញ់ថ្នាំស្រូវ និងដកស្មៅក្នុងស្រែនៅជាប់ទីនោះក៏បណ្តាលឱ្យកើតជាកមរមាស់នៅដៃជើងគ្រប់ៗគ្នា ។
ពលរដ្ឋម្នាក់រស់នៅក្នុងផ្សារកអណ្តើកបានឱ្យកោះសន្តិភាពដឹងថា សំរាមទាំងនោះគឺប្រជាពលរដ្ឋចំនួន៣ភូមិដែលរស់នៅជុំវិញផ្សារកអណ្តើក និងក្នុងផ្សារកអណ្តើកជាអ្នកយកទៅចាក់នៅទីកន្លែងនោះ ដោយសារតែពួកគាត់ពុំមានទីកន្លែងផ្សេងសម្រាប់ចាក់ ព្រោះក្រៅពីផ្ទះអ្នកស្រុក និងផ្សារ នៅជុំវិញនោះគឺសុទ្ធតែជាស្រែរបស់អ្នកស្រុកទាំអស់ ។ ប្រភពដដែលនេះនិយាយថា ថ្វីដ្បិតតែអ្នកស្រុកយកសំរាមមកចាក់លើចិញ្ចើមផ្លូវមែន ប៉ុន្តែពូកគាត់ក៏ឧស្សហ៍មកប្រមូលគរដុតចោលជាញឹកញាប់ដែរ គឺមិនទុករហូតឱ្យក្លាយជាភ្នំនោះទេ ម្យ៉ាងទៀតអាជ្ញាធរដែនដីក៏មិនដែលឃើញមកហាមឃាត់ពួកគាត់មិនឱ្យចាក់សំរាមនៅលើចិញ្ចើមផ្លូវដែរ ដូច្នេះហើយទើបពួកគាត់នាំគ្នាយកសំរាមមកចាក់នៅទីកន្លែងនេះ។
ទោះជាយ៉ាងណាក៏ដោយ ក្រុមអ្នកដំណើរមួយចំនួនដែលធ្វើដំណើរឆ្លងកាត់ទីកន្លែងនេះបានបញ្ចេញទស្សនៈថា ផ្លូវជាតិលេខ១គឺជាផ្លូវជាតិដ៏សំខាន់ដែលមានអ្នកដំណើរឆ្លងកាត់ពិសេសជនបរទេសក្នុង១ថ្ងៃៗរាប់ម៉ឺននាក់ ដូច្នេះមិនគួរយកសំរាមមកចាក់នៅលើចិញ្ចើមផ្លូវបែបនេះទេ ៕
ចែករំលែកព័តមាននេះ