រាជធានីភ្នំពេញ ៖ បុរសជនជាតិអាមេរិកម្នាក់បានគាំងបេះដូងលង់ទឹកស្លាប់ភ្លាមៗកនៅក្នុងស្រះទឹកមួយ ខណៈកំពុងហែលទឹកលេងជាមួយក្មេងៗដែលបង្កឱ្យមានការភ្ញាក់ផ្អើលកាលពីវេលាម៉ោង៤និង៥នាទីរសៀលថ្ងៃទី២០ កញ្ញា ២០១២ ក្នុងស្រះទឹកមួយ ស្ថិតក្នុងក្រុម៦ ភូមិទឹកថ្លា សង្កាត់ទឹកថ្លា ខណ្ឌសែនសុខ ។ សពបុរសជនជាតិអាមេរិកដែលគាំងបេះដូងលង់ទឹកស្លាប់នោះឈ្មោះ JEFFREYG EVANSON អាយុ៦០ឆ្នាំ ជាគ្រូបង្រៀន ស្នាក់នៅផ្ទះលេខ១៧៧G ផ្លូវលេខ១០១៥ សង្កាត់ភ្នំពេញថ្មី ខណ្ឌសែនសុខ ។
យោងតាមសម្តីលោកប៉ែន ថុល នាយប៉ុស្តិ៍រដ្ឋបាលនគរបាលទឹកថ្លាឱ្យដឹងថា មុនពេលកើតហេតុនៅវេលាម៉ោង២និង៣០នាទីរសៀលថ្ងៃទី២០ កញ្ញា ២០១២ គេឃើញបុរសជនជាតិអាមេរិកម្នាក់បានបបួលក្មេងៗនៅក្នុងភូមិទៅហែលទឹកលេងនៅស្រះទឹកមួយនៅក្នុងភូមិពេលនោះក្មេងប្រុសប្រហែល៥នាក់បានទៅហែលទឹកលេងជាមួយគាត់បានប្រហែលជាង២ម៉ោង ស្រាប់តែក្មេងៗទាំងអស់នោះរត់មកផ្ទះវិញ ហើយប្រាប់ឪពុកម្តាយថា បុរសជនជាតិអាមេរិកនោះលង់ទឹកស្លាប់ហើយ បង្កឱ្យមានការភ្ញាក់ផ្អើល និងមានមនុស្សទៅចោមរោមមើលពេញភូមិ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ