ខេត្តបាត់ដំបង ៖ រថយន្តម៉ាកតូយ៉ូតា Prius ពណ៌ទឹកប្រាក់ មួយគ្រឿង ត្រូវគេប្រទះឃើញទុកចោលនៅកណ្តាលផ្លូវមួយកន្លែង កាលពីព្រឹកថ្ងៃទី២១ កញ្ញា ក្បែរផ្ទះសំណាក់៧៧៧ ក្នុងក្រុមទី៤ ភូមិកម្មករ សង្កាត់ស្វាយប៉ោ ក្រុងបាត់ដំបង ដែលមានស្នាមបុកផ្នែកខាងមុខ និងធ្លាក់ម៉ាស៊ីនជិតដល់ដីមិនអាចបើកទៅមុខបាន ។ អ្នកស្គាល់រថយន្តនេះបានបង្ហើបប្រាប់សមត្ថកិច្ចថា គេសង្ស័យជារថយន្តរបស់ក្រុមអ្នកចែកចាយគ្រឿងញៀនពេលយប់ ។
សមត្ថកិច្ចនិយាយថា រថយន្តនេះម៉ាកតូយ៉ូតា Prius ពណ៌ទឹកប្រាក់ មានស្នាមបុកផ្នែកខាងមុខ ធ្វើឱ្យម៉ាស៊ីនធ្លាក់ជិតដល់ដី និងបែកធ្លាយប្រេងម៉ាស៊ីនត្រូវបានអ្នកភូមិប្រទះឃើញចតចោលតាំងពីយប់ រហូតដល់ម៉ោងប្រហែល១០ព្រឹកថ្ងៃទី២១ កញ្ញា នៅតែមិនឃើញម្ចាស់មកយក ទើបរាយការណ៍ប្រាប់សមត្ថកិច្ចតែម្តងទៅ ។
ដោយឡែកមានអ្នកធ្លាប់ស្គាល់រថយន្តនេះបានប្រាប់សមត្ថកិច្ចថា រថយន្តនេះជារបស់បុរសម្នាក់ដែលមានផ្ទះនៅខាងជើងកន្លែងចតរថយន្តនេះ ប្រហែល៣០០ម៉ែត្រ ហើយសមាសភាពនៃក្រុមនោះជាមុខសញ្ញាចែកចាយថ្នាំញៀនយ៉ាងសកម្ម ដែលសុទ្ធសឹងជាក្រុមកូនចៅអ្នកមានអំណាច និងមានទ្រព្យស្តុកស្តុម្ភក្នុងក្រុងបាត់ដំបង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ