ខេត្តបាត់ដំបង ៖ រថយន្តម៉ាកតូយ៉ូតាPriusពណ៌ទឹកប្រាក់មួយគ្រឿង ត្រូវគេប្រទះឃើញទុកចោលនៅកណ្តាលផ្លូវមួយកន្លែង កាលពីព្រឹកថ្ងៃទី២១ កញ្ញា ក្បែរផ្ទះសំណាក់៧៧៧ ក្នុងក្រុមទី៤ ភូមិកម្មករ សង្កាត់ស្វាយប៉ោ ក្រុងបាត់ដំបង ដែលមានស្នាមបុកផ្នែកខាងមុខ និងធ្លាក់ម៉ាស៊ីនជិតដល់ដី មិនអាចបើកទៅមុខបាន ។ អ្នកស្គាល់ពីប្រវត្តិរថយន្តនេះបានបង្ហើបប្រាប់សមត្ថកិច្ចថា គេសង្ស័យជារថយន្តរបស់ក្រុមអ្នកចែកចាយគ្រឿងញៀនពេលយប់ ។
សមត្ថកិច្ចនិយាយថា រថយន្តនេះម៉ាកតូយូ៉តាPriusពណ៌ទឹកប្រាក់ មានស្នាមបុកផ្នែកខាងមុខធ្លាក់ម៉ាស៊ីនជិតដល់ដី និងបែកធ្លាយប្រេងម៉ាស៊ីនទៀតផង ។ អ្នកភូមិប្រទះឃើញរថយន្តនេះចតចោលតាំងពីយប់រហូតដល់ម៉ោងប្រហែល១០ព្រឹកថ្ងៃទី២១ កញ្ញា នៅតែមិនឃើញម្ចាស់មកយកទើបគេរាយការណ៍ប្រាប់សមត្ថកិច្ចតែម្តងទៅ ។
តាមការបំភ្លឺពីអ្នកភូមិបានប្រាប់សមត្ថកិច្ចថា គេបានឃើញមនុស្សប៉ុន្មាននាក់ជិះក្នុងរថយន្តហើយបើកមកឈប់នៅចំណុចនោះតាំងពីវេលាម៉ោង៤ទៀបភ្លឺថ្ងៃទី២១ កញ្ញា រហូតដល់ម៉ោង១០ព្រឹកទៅហើយនៅតែមិនឃើញម្ចាស់មក
យក ។ សាក្សីបញ្ជាក់ថា ដោយមានការសង្ស័យទើបគេផ្តល់ព័ត៌មាននេះទៅសមត្ថកិច្ចឱ្យដឹង ។ ដោយឡែកមានអ្នកធ្លាប់ស្គាល់ពីប្រវត្តិរថយន្តនេះបានប្រាប់សមត្ថកិច្ចថា ជារបស់បុរសម្នាក់ដែលមានផ្ទះនៅខាងជើងកន្លែងកើតហេតុនេះប្រហែល៣០០ម៉ែត្រ ហើយសមាសភាពនៃក្រុមនោះជាមុខសញ្ញាចែកចាយថ្នាំញៀនយ៉ាងសកម្ម ដែលសុទ្ធសឹងជាក្រុមកូនចៅអ្នកមានអំណាចនិងមានទ្រព្យស្តុកស្តម្ភក្នុងក្រុងបាត់ដំបង ។
សមត្ថកិច្ចក៏បានឱ្យដឹងដែរថា នៅវេលារំលងអធ្រាត្រឈានចូលថ្ងៃទី២១ កញ្ញា សមត្ថកិច្ចបានតាមប្រមាញ់មុខសញ្ញាចែកចាយថ្នាំញៀនមួយហ្វូងនៅលើសួនច្បារ ស ខេង ដែលមានទាំងរថយន្តនិងម៉ូតូ តែក្រុមនោះបានបែកហ្វូងទាំងយប់បាត់ស្រមោល ។ សមត្ថកិច្ចក៏បានដាក់ការសង្ស័យដែរថា រថយន្តដែលធ្លាក់ម៉ាស៊ីន ហើយចតចោលនៅចំណុចខាងលើនេះ ទំនងជារថយន្តរបស់ក្រុមអ្នកចែកចាយថ្នាំញៀនហ្នឹងហើយ ដែលបើករត់ទៅបុកអ្វីមួយទៅមុខមិនរួច ក៏ទុកចោលរហូតមិនហា៊នមកយកបែបនេះ។
ទោះជាបែបណានៅពេលសមត្ថកិច្ចចរាចរយករថយន្តទៅស្ទូច គេឃើញមានមន្ត្រីយោធាម្នាក់ទៅអន្តរាគមន៍ដោយអះអាងថា ម្ចាស់រថយន្តមិនហា៊ានមកយកទេ ដោយទូរស័ព្ទប្រាប់ឱ្យខ្លួនមកដោះស្រាយជំនួស ។ បុរសនេះបានព្យាយាមសុំសម្រួលបញ្ចប់ជាមួយសមត្ថកិច្ចដោយមិនចាំបាច់ស្ទូចរថយន្តយកទៅស្នងការដ្ឋានខេត្តទេ ។ ប៉ុន្តែដោយចង់ដឹងការពិតថា តើរថយន្តនេះបុកស្អី ហើយមូលហេតុអ្វីបានជាម្ចាស់មិនចេញមុខដោះស្រាយ សមត្ថកិច្ចចរាចរបានស្ទូចយករថយន្តទៅទុកនៅការិយាល័យជំនាញដើម្បីឱ្យសាម៉ីខ្លួនចូលទៅបំភ្លឺពីមូលហេតុពិតប្រាកដ ។
ប្រភពពីសមត្ថកិច្ចដែលបានស្គាល់ពីសមាសភាពនៃក្រុមនេះដែរបញ្ជាក់ថា ក្រុមនេះជាមុខសញ្ញាចែកចាយគ្រឿងញៀនយ៉ាងសកម្មពេលយប់ ហើយគេសង្ស័យថា មានមន្ត្រីសមត្ថកិច្ចមួយចំនួននៅពីក្រោយខ្នងដែលគេស្គាល់ទាំងមុខ ទាំងឈ្មោះទៀតផង ៕
ចែករំលែកព័តមាននេះ