ខេត្តបន្ទាយមានជ័យ ៖ ប្តីប្រពន្ធ២នាក់ជិះម៉ូតូូឌុបគ្នាមិនបានមើលឧបសគ្គខាងមុខជ្រុលទៅបុករថយន្តកាមរីមួយគ្រឿង ដែលចតស្ងៀមលើចិញ្ចើមផ្លូវបណ្តាលឱ្យម៉ូតូដួលខ្ទាតទៅលើទ្រូងផ្លូវ ស្របពេលនោះមានរថយន្តកាមរីមួយគ្រឿងផ្សេងទៀតមកពីក្រោយកិនបណ្តាលឱ្យបុរសជាប្តីបាក់ជើងខាងស្តាំ របួសធ្ងន់ឯស្ត្រីជាប្រពន្ធរងរបួសស្រាល កាលពីវេលាម៉ោងជាង៣រសៀលថ្ងៃទី១៩ កញ្ញា លើកំណាត់ផ្លូវជាតិលេខ៥ ចំណុចជិតមណ្ឌលសុខភាពសង្កាត់អូរអំបិល ស្ថិតក្នុងភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ។
លោកអនុសេនីយ៍ឯកតោ សារូ នាយការិយាល័យនគរបាលចរាចរខេត្តបានឱ្យដឹងថា បុរសជាប្តីឈ្មោះយិន ធិ អាយុ៤៨ឆ្នាំ ប្រពន្ធឈ្មោះធឹម ញ៉ឹង អាយុ៤៧ឆ្នាំ ២នាក់ប្តីប្រពន្ធមានទីលំនៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ បើកម៉ូតូម៉ាកហុងដាឌ្រីមពណ៌ខ្មៅ ស៊េរី២០០២។មន្ត្រីនគរបាលរូបនោះបានបញ្ជាក់ថា តាមសម្តីសាក្សីបានប្រាប់សមត្ថកិច្ចថា មុនពេលកើតហេតុបុរសខាងលើបានជិះម៉ូតូឌុបប្រពន្ធពីលិចទៅកើត ពេលមកដល់កន្លែងកើតហេតុគាត់មិនបានមើលឧបសគ្គខាងមុខ ក៏ជ្រុលទៅបុកគូទរថយន្តកាមរីមួយគ្រឿងពណ៌ទឹកប្រាក់ ដែលចតស្ងៀមលើចិញ្ចើមផ្លូវ បណ្តាលឱ្យដួលម៉ូតូខ្ទាតបុរសអ្នកបើកទៅកណ្តាលទ្រូងផ្លូវ ស្របពេលនោះមានរថយន្តកាមរីមួយគ្រឿងទៀត ពណ៌បៃតងចាស់ មកពីក្រោយជាន់ហ្វ្រាំងមិនទាន់ក៏កិនត្រូវជើងស្តាំ បណ្តាលឱ្យបាក់ ។ អ្នកបើករថយន្តឈ្មោះស៊ុន ហៀត ភេទប្រុស អាយុ៣៧ឆ្នាំ ស្នាក់នៅបណ្តោះអាសន្នភូមិគោរដ្ឋាន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។
ក្រោយពេលកើតហេតុជនរងគ្រោះទាំង២នាក់ប្តីប្រពន្ធត្រូវបានរថយន្តសង្គ្រោះរបស់ស្នងការដ្ឋាននគរបាលខេត្ត ដឹកយកទៅសង្គ្រោះនៅមន្ទីរពេទ្យបង្អែកមិត្តភាពកម្ពុជា-ជប៉ុន ស្រុកមង្គលបូរី ចំណែកម៉ូតូនិងរថយន្តត្រូវសមត្ថកិច្ចយកទៅរក្សាទុកនៅការិយាល័យចរាចរណ៍ខេត្ត ប៉ុន្តែដោយឡែករថយន្តកាមរីដែលចតស្ងៀមនោះ បន្ទាប់ពីមានគ្រោះថ្នាក់បានបើកគេចបាត់ ៕
ចែករំលែកព័តមាននេះ