រាជធានីភ្នំពេញ ៖ រថយន្តក្រុងដឹកអ្នកដំណើររបស់ក្រុមហ៊ុនមួយបានបើកក្នុងល្បឿនលឿននៅពេលផ្លូវកំពុងចង្អៀតបានជ្រុលទៅបុកអ្នកជិះកង់ដែលកំពុងធ្វើចរាចរខាងមុខពេញទំហឹង បណ្តាលឱ្យរងរបួសបាក់ភ្លៅខាងឆ្វេងត្រូវបានបញ្ជូនទៅសង្គ្រោះ និងព្យាបាលនៅមន្ទីរពេទ្យសែនសុខភ្លាមៗផងដែរ កាលពីវេលាម៉ោង៨និង៥នាទីព្រឹកថ្ងៃទី២០ កញ្ញា ទៅទល់មុខក្លិបអេឡិចត្រូ តាមបណ្តោយផ្លូវលេខ៥៩៨ ក្នុងសង្កាត់ភ្នំពេញថ្មី ខណ្ឌសែនសុខ ។ អ្នកបើករថយន្តបង្កភ្លាមៗនោះបានរត់គេចខ្លួនចោលរថយន្តបាត់។
សាក្សីឃើញហេតុការណ៍បានឱ្យដឹងថា មុនពេលកើតហេតុរថយន្តក្រុងដឹកអ្នកដំណើររបស់ក្រុមហ៊ុនមួយបើកបរដោយបុរសម្នាក់មានល្បឿនលឿនតាមបណ្តោយផ្លូវលេខ៥៩៨ ពីជើងទៅត្បូងដោយផ្លូវកំពុងមានស្ថានភាពចង្អៀតផងនោះ រថយន្តក៏មិនព្រមបន្ថយល្បឿនហើយជាន់ហ្វ្រាំងមិនទាន់ក៏ជ្រុលទៅបុកស្ត្រីម្នាក់កំពុងជិះកង់ចំពីក្រោយពេញទំហឹង បណ្តាលឱ្យកង់ខ្ទាតចេញពីរថយន្ត តែជាសំណាងអាក្រក់ស្ត្រីអ្នកជិះកង់បានកៀបជាប់ជាមួយកង់មុខរថយន្តខាងស្តាំ អូសប្រមាណណ១០០ម៉ែត្ររងរបួសបាក់ភ្លៅ ។
ភ្លាមៗត្រូវបានរថយន្តសាមុយរបស់មន្ទីរពេទ្យសែនសុខដឹកយកទៅសង្គ្រោះ និងព្យាបាលផងដែរ ។ រីឯកង់របស់ស្ត្រីរងគ្រោះគ្រាន់តែរងការខូចខាតតិចតួចប៉ុណ្ណោះ ។ក្រោយពីកើតហេតុប៉ូលិសចរាចរខណ្ឌសែនសុខបានចុះទៅធ្វើការវាស់វែង រួចសហការជាមួយប៉ូលិសចរាចរផ្លូវគោកយករថយន្ត និងកង់ទៅរក្សាទុកនៅការិយាល័យផ្លូវគោក រាជធានីភ្នំពេញរង់ចាំការដោះស្រាយតាមនីតិវិធី ៕
ចែករំលែកព័តមាននេះ