ខេត្តតាកែវ ៖ បើទោះជាសារិកាជាប្រភេទសត្វព្រៃក៏ពិតមែន តែឆ្លងកាត់ការចិញ្ចឹមបីបាច់ថែរក្សា បូករួមទាំងការហ្វឹកហាត់យ៉ាងយកចិត្តទុកដាក់ គឺមិនត្រឹមតែចេះនិយាយភាសាមនុស្សទេ ថែមទាំងមានអត្តចរិតបីដូចជាមនុស្សដែរ ។បុរសធីវ ប៉ោង រស់នៅភូមិស្វាយខាងជើង ឃុំបាស្រែ ស្រុកអង្គរបុរី ខេត្តតាកែវ និងជាអ្នកដែលធ្លាប់មានបទពិសោធន៍ទាំងការចិញ្ចឹម និងបង្ហាត់សារិកាបានរៀបរាប់ប្រាប់ឱ្យដឹងកាលពីពេលថ្មីៗនេះថា គាត់ចូលចិត្តចិញ្ចឹមសត្វមួយចំនួនដូចជា សត្វព្រាប សត្វកុក សារិកាធម្មតា និងសារិកាភ្នំ ។ ចំពោះសត្វដែលគាត់អាចបង្ហាត់ឱ្យចេះនិយាយភាសាមនុស្សបាននោះ គឺពពួកសត្វសារិកានៅក្នុងព្រៃភ្នំ ព្រោះវាមានរូបរាងខុសពីពួកសត្វសារិកាដែលរស់នៅតាមស្រុកភូមិធម្មតា ។
បុរសដដែលបន្ថែមទៀតថា សត្វសារិកាភ្នំមានមាឌធំ សម្បុរខ្មៅ ចំពុះពណ៌លឿង មានដុះស្លឹកត្រចៀក ហើយវាមានសំបុកនៅដើមឈើធំៗនៅតំបន់ភ្នំ ។ ភាគច្រើនសារិកានេះចាប់ផ្តើមពងនៅអំឡុងខែមេសា និងញាស់នៅក្នុងខែមិថុនា ។ ប្រភេទសារិកាដែលចាប់មកចិញ្ចឹម និងបង្ហាត់ឱ្យចេះនិយាយនោះជាកូនសារិកាដែលទើបនឹងញាស់ និងមានអាយុយ៉ាងច្រើនបំផុត១៥ថ្ងៃ ព្រោះបើយកសារិកាដែលមានអាយុច្រើនមកចិញ្ចឹមនោះមិនងាយបង្ហាត់ឱ្យចេះនិយាយបានទេ។
ចំពោះការចិញ្ចឹម និងការបង្ហាត់ឱ្យសារិកាចេះនិយាយលោកធីវ ប៉ោង បង្ហើបឱ្យដឹងថា កូនសារិកានៅពេលយកមកចិញ្ចឹមយើងត្រូវស្រឡាញ់ចាត់ទុកបីដូចជាកូនរបស់យើងដែរ គឺមានន័យថា មើលថែផ្តល់ចំណីអាហារឱ្យបានគ្រប់គ្រាន់ គ្រប់ពេលវេលា ហើយចំណីទៀតសោតមានដូចជាសាច់គោ ម្ទេសទុំគ្រប់ប្រភេទ ឬប្រភេទចំណីរបស់សត្វជ្រូក ។ រយៈពេលចាប់តាំងពីចិញ្ចឹមរហូតដល់ពេលចេះនិយាយប្រហែលជា៩ទៅ១០ខែគឺអាចចេះនិយាយបានខ្លះៗអាស្រ័យទៅលើការបង្ហាត់ ។
នៅពេលសារិកាមានមាឌធំ និងចេះនិយាយនោះគឺប្រៀបបីដូចជាម៉ាស៊ីនថតសំឡេង និងចាក់ផ្សាយឡើងវិញ ។ ដំបូងឡើយក្នុងខណៈពេលចិញ្ចឹមបីបាច់ថែរក្សា យើងត្រូវតែព្យាយាមក្នុងការនិយាយឆ្លើយឆ្លងជាមួយវាញឹកញាប់រាល់ថ្ងៃ ។ លើសពីនេះយើងត្រូវបើកវិទ្យុ ដាក់នៅក្បែរទ្រុងរបស់សារិកា ដើម្បីឱ្យវាហាត់និយាយធ្វើត្រាប់តាមនូវសំឡេងផ្សេងៗដែលកើតមាននៅជុំវិញខ្លួនវា ។ ការបង្ហាត់ឱ្យវានិយាយគឺពាក្យធម្មតាៗដូចជា បាទ ចាស វងអើយ ម៉ាក់ ប៉ា អ៊ុំ និងសំឡេងសើច ជាដើម ។ យ៉ាងហោចណាស់ក្នុងមួយថ្ងៃចំណាយពេលពី១៥ទៅ២០នាទី ក្នុងការបង្ហាត់សារិកាឱ្យចេះនិយាយ ។
បុរសឈ្មោះធីវ ប៉ោង ឱ្យដឹងថា នៅពេលសារិកាចេះនិយាយភាសាសាមញ្ញៗទាំងនោះហើយ ពេលក្រោយមិនចាំបាច់ចំណាយពេលបង្ហាត់បន្ថែមទៀតទេ គឺនៅពេលឮសំឡេងអ្វីប្លែកដែលវាមិនធ្លាប់ឮពីមុនមក វាក៏អាចធ្វើត្រាប់បានដូចសំឡេងនោះដែរ ។
យោងតាមអ្នកទិញសារិកាមួយចំនួនពីលោកធីវ ប៉ោង យកទៅចិញ្ចឹមឱ្យដឹងថា សារិកាដែលគាត់ចិញ្ចឹមនោះចេះនិយាយភាសាខ្មែរ ចេះបង្អើលសត្វមាន់ដែលស៊ីស្រូវហាល និងចេះស្រែកហៅសត្វជ្រូកឱ្យស៊ីបាយទៀតផង ៕
ចែករំលែកព័តមាននេះ