ខេត្តព្រះសីហនុ ៖ នៅថ្ងៃទី២៧ ខែមិថុនា ឆ្នាំ២០២៥ កងទ័ពជើងទឹកកម្ពុជាបានបណ្តេញកប៉ាល់ដឹកប្រេងថៃមួយគ្រឿងឈ្មោះ Chetthanabodi 6 ដែលបានលួចដឹកចូលមកក្នុងដែនទឹកកម្ពុជា ក្នុងភូមិសាស្ត្រខេត្តព្រះសីហនុ…
ខេត្តព្រះសីហនុ ៖ នៅថ្ងៃទី២៧ ខែមិថុនា ឆ្នាំ២០២៥ កងទ័ពជើងទឹកកម្ពុជាបានបណ្តេញកប៉ាល់ដឹកប្រេងថៃមួយគ្រឿងឈ្មោះ Chetthanabodi 6 ដែលបានលួចដឹកចូលមកក្នុងដែនទឹកកម្ពុជា ក្នុងភូមិសាស្ត្រខេត្តព្រះសីហនុ ឱ្យវិលត្រឡប់ទៅស្រុកវិញ ។
ការបណ្ដេញចេញនេះ ត្រូវបានមន្ត្រីទ័ពជើងទឹកប្រាប់ថា ជាការអនុវត្តវិធានការម៉ឺងម៉ាត់ដាក់ចុះដោយរាជរដ្ឋាភិបាលកម្ពុជា ។ មិនត្រឹមតែប្រេងទេ កងទ័ពជើងទឹកកម្ពុជា ក៏នឹងអនុវត្តយ៉ាងម៉ឺងម៉ាត់ ដោយមិនអនុញ្ញាតឱ្យមានការលួចនាំចូលនូវបន្លែផ្លែឈើថៃ តាមជើងទឹកផងដែរ ។
សូមបញ្ជាក់ថា កាលពីថ្ងៃទី២២ ខែមិថុនា ឆ្នាំ២០២៥ រាជរដ្ឋាភិបាលកម្ពុជា បានប្រកាសផ្អាកការនាំចូលប្រេងឥន្ធនៈ និងឧស្ម័នគ្រប់ប្រភេទពីប្រទេសថៃ ។ សម្តេចបវរធិបតី ហ៊ុន ម៉ាណែត នាយករដ្ឋមន្ត្រី បានគូសបញ្ជាក់ថា បណ្ដាក្រុមហ៊ុនចែកចាយប្រេងឥន្ធនៈនៅកម្ពុជា មានលទ្ធភាពនាំចូលប្រេងឥន្ធនៈ និងឧស្ម័នពីប្រភពផ្សេងគ្រប់គ្រាន់ហើយ ដើម្បីផ្គត់ផ្គង់តម្រូវការប្រើប្រាស់ក្នុងស្រុករបស់ប្រជាពលរដ្ឋយើង កុំថាឡើយត្រឹមមួយខែ ទោះជារៀងរហូតក៏មិនជាបញ្ហា ។
ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានថ្លែងនៅថ្ងៃទី២៧ ខែមិថុនា ឆ្នាំ២០២៥ នេះផងដែរថា ចាប់តាំងពីឱសានវាទរបស់រាជរដ្ឋាភិបាលចូលជាធរមានមក មិនមានការអនុញ្ញាតឱ្យនាំចូលប្រេង និងឧស្ម័នពីថៃមកកម្ពុជាដាច់ខាត ហើយកម្ពុជាមានសមត្ថភាពគ្រប់គ្រាន់ក្នុងការផ្គត់ផ្គង់ប្រេង និងឧស្ម័នសម្រាប់តម្រូវការរបស់ខ្លួនពេញលេញ ។
លួចនាំផ្លែដូងពីប្រទេសថៃ សមត្ថកិច្ចកម្ពុជាចាប់ដុតកម្ទេចចោលខេត្តព្រះវិហារ ៖ អាជ្ញាធរ និងសមត្ថកិច្ចចម្រុះ កាលពីព្រឹកថ្ងៃទី២៧ ខែមិថុនា ឆ្នាំ២០២៥ បានធ្វើការដុតកម្ទេចចោលផ្លែដូងក្រអូបប្រមាណជាងមួយតោន ក្រោយរកឃើញអំពីការលួចលាក់នាំចូលឆ្លងដែនដោយមិនស្របច្បាប់ ។
យោងតាមប្រភពព័ត៌មានឲ្យដឹងថា មុនឈានដល់ការបង្ក្រាបរឹបអូសផ្លែដូងខាងលើ សមត្ថកិច្ចបានចុះធ្វើការស្រាវជ្រាវលើទំនិញបន្លែស្ពៃក្តោប ដែលដឹកជញ្ជូនតាមផ្លូវទឹកពីប្រទេសឡាវមកកម្ពុជាខុសច្បាប់ ត្រង់ចំណុចកំពង់ចម្លងកំពង់ស្រឡៅ ស្រុកឆែប ។ សមត្ថកិច្ចបានបន្តការសិក្សាស្រាវជ្រាវ ដល់គោលដៅឫសគល់នៃប្រភពទំនិញ ក៏បានរកឃើញថា បន្លែស្ពៃក្តោបនោះជាផលិតផលដាំដុះក្នុងប្រទេសឡាវ សមត្ថកិច្ចក៏បានផាកពិន័យអន្តរការណ៍ និងដោះលែងទៅវិញ ។
ខណៈត្រឡប់មកវិញ កម្លាំងសមត្ថកិច្ចក៏ប្រទះឃើញរថយន្តមួយគ្រឿងពាក់ផ្លាកលេខក្រុងព្រះសីហនុ ២A-២៣៤៣ កំពុងដឹកជញ្ជូនផ្លែដូងនៅចំណុចកំពង់ចម្លងដដែល ក៏បានឃាត់សាកសួរ និងបន្តស្រាវជ្រាវករណីនេះជាថ្មី ។ លុះក្រោយមកទើបដឹងថា ផ្លែដូងទាំងនោះត្រូវបានឈ្មួញលួចលាក់នាំចូលពីប្រទេសថៃ ។
កម្លាំងសមត្ថកិច្ចចម្រុះបានត្រួតពិនិត្យឃើញផ្លែដូងក្រអូបទាំងនោះ មានចំនួន២ ៨៥០ផ្លែ ស្នើនឹង១ ៥០០គីឡូក្រាម ទឹកដូងច្រកដាក់ដបចំនួន២៨០ដប ស្មើនឹង៤២០លីត្រ និងសាច់ដូង២៤គីឡូក្រាម ។ ភ្លាមនោះដែរ កម្លាំងសមត្ថកិច្ចចម្រុះ ក៏បានសម្រេចឃាត់ទុក និងធ្វើរបាយការណ៍រាយការណ៍ រង់ចាំការសម្រេចពីប្រមុខថ្នាក់ដឹកនាំ ។
យោងតាមអាជ្ញាធរស្រុកឆែបឱ្យដឹងថា ក្រោយទទួលបានការណែនាំ និងឯកភាពពីឯកឧត្ដម គីម រិទ្ធី អភិបាលខេត្តព្រះវិហារ លោក ឃិត សុធារ៉ា អភិបាលស្រុកឆែប បានដឹកនាំកម្លាំងគណៈបញ្ជាការរដ្ឋបាលស្រុក ដោយបានសហការជាមួយពីមន្ត្រីគយនៃការិយាល័យស្រាវជ្រាវ និងបង្ក្រាបអំពើរត់ពន្ធតំបន់៥ មន្ត្រីសាខាគយ និងរដ្ឋាករខេត្តកំពង់ធំ កម្លាំងកងរាជអាវុធហត្ថលើផ្ទៃប្រទេស នៅព្រឹកថ្ងៃទី២៧ ខែមិថុនា ឆ្នាំ២០២៥ យកទំនិញទាំងនោះ ទៅធ្វើការដុតកម្ទេចចោល នៅក្នុងបរិវេណសាលាស្រុកឆែប ធ្វើឡើងនៅចំពោះមុខអ្នកបើកបររថយន្តដឹកដូងក្រអូបនោះផងដែរ ។
ប្រតិបត្តិការបង្ក្រាបរឹបអូសផលិតផលដែលនាំចូលពីប្រទេសថៃមកកាន់កម្ពុជា ហើយអនុវត្តនីតិវិធីក្នុងការកម្ទេចចោលនោះ វាជាសញ្ញាមួយនៃការព្រមានដល់ក្រុមឈ្មួញឆ្មក់នាំចូល ទំនិញឆ្លងដែនដោយគ្មានការអនុញ្ញាត ៕
ចែករំលែកព័តមាននេះ