រាជធានីភ្នំពេញ ៖ លោកស្រីវេជ្ជបណ្ឌិត Ayda Yurekli អ្នកសេដ្ឋសាស្ត្រត្រួតពិនិត្យថ្នាំជក់នៃអង្គការសុខភាពពិភពលោក បានលើកឡើងពីសារប្រយោជន៍នៃការដំឡើងពន្ធលើផលិតផលថ្នាំជក់ថា វាអាចធ្វើឱ្យប្រទេសកម្ពុជាក៏ដូចជាប្រទេសដទៃទៀតក្នុងពិភពលោកយើងនេះរកចំណូលបានច្រើនក្នុងវិស័យសេដ្ឋកិច្ចជាតិនិងវិស័យសុខាភិបាលសាធារណៈ ។
រាជធានីភ្នំពេញ ៖ លោកស្រីវេជ្ជបណ្ឌិត Ayda Yurekli អ្នកសេដ្ឋសាស្ត្រត្រួតពិនិត្យថ្នាំជក់នៃអង្គការសុខភាពពិភពលោក បានលើកឡើងពីសារប្រយោជន៍នៃការដំឡើងពន្ធលើផលិតផលថ្នាំជក់ថា វាអាចធ្វើឱ្យប្រទេសកម្ពុជាក៏ដូចជាប្រទេសដទៃទៀតក្នុងពិភពលោកយើងនេះរកចំណូលបានច្រើនក្នុងវិស័យសេដ្ឋកិច្ចជាតិនិងវិស័យសុខាភិបាលសាធារណៈ ។
ការលើកឡើងនេះ លោកស្រី Ayda Yurekli បានមានប្រសាសន៍ប្រាប់អ្នកសារព័ត៌មានក្នុងសន្និសីទកាសែតមួយ កាលពីរសៀលថ្ងៃទី១៨ កញ្ញា នៅសណ្ឋាគារភ្នំពេញ ឱ្យដឹងទៀតថា ចំពោះវិស័យសេដ្ឋកិច្ច បើយើងដំឡើងពន្ធលើផលិតផលថ្នាំជក់ឱ្យបានកាន់តែខ្ពស់នោះ ផលិតផលទាំងអស់នោះនឹងឡើងថ្លៃ ហើយប្រជាពលរដ្ឋដែលមានជីវភាពសមល្មមពួកគាត់នឹងកាត់បន្ថយចំណាយក្នុងការទិញបារីជក់ ដូចនេះពួកគាត់នឹងសល់លុយសម្រាប់ទ្រទ្រង់ជីវភាពគ្រួសាររបស់ពួកគាត់បានស្រួលជាងមុន ។
ម្យ៉ាងទៀត ក្នុងការដំឡើងពន្ធលើផលិតផលថ្នាំជក់នេះផងដែរ លោកស្រីបន្តទៀតថា អាចធ្វើឱ្យចំណូលពន្ធរបស់រដ្ឋកើនឡើង ហើយយើងក៏អាចយកថវិកាដែលទទួលបានទាំងនោះទៅអភិវឌ្ឍលើវិស័យផ្សេងៗដែលប្រទេសយើងកំពុងត្រូវការដូចជាវិស័យសុខាភិបាល សាធារណៈជាដើម ។ លោកស្រីវេជ្ជបណ្ឌិតបន្ថែមឱ្យដឹងទៀតថា វិស័យសុខាភិបាលសាធារណៈក៏នឹងប្រសើរឡើងដែរ ប្រសិនណាប្រទេសកម្ពុជាយើងក៏ដូចជាប្រទេសដទៃទៀតដំឡើងពន្ធលើផលិតផលថ្នាំជក់កាន់តែខ្ពស់ ព្រោះវាអាចធ្វើឱ្យកាត់បន្ថយអ្នកជក់ ពេលណាកាត់បន្ថយអ្នកជក់បាន ពេលនោះក៏អាចកាត់បន្ថយជំងឺមិនឆ្លងដែលបណ្ដាលមកពីការជក់បារីដែរ ដូចជាជំងឺមហារីកផ្សេងៗ ។
ជាក់ស្ដែងសហរដ្ឋអាមេរិកមានការថយចុះពីការជក់បារី និងអ្នកជំងឺដែលកើតមហារីកយ៉ាងច្រើន ដោយសាររដ្ឋាភិបាលរបស់គេយកពន្ធលើផលិតផលថ្នាំជក់ខ្ពស់ ។ ទាក់ទងនឹងការយកពន្ធថ្នាំជក់កាន់តែខ្ពស់លោកស្រីបន្តថា កុមារ សិស្សសាលា និងមនុស្សពេញវ័យ នឹងកាត់បន្ថយការជក់ ហើយអត្រាអ្នកស្លាប់ដោយសារជំងឺមិនឆ្លងក៏ធ្លាក់ចុះដែរ ។
ចំណែកលោកវេជ្ជបណ្ឌិត Ulysess Dorotheo ជាតំណាងសម្ព័ន្ធត្រួតពិនិត្យថ្នាំជក់ អាស៊ីអាគ្នេយ៍ បានរៀបរាប់ពីបទពិសោធន៍ និងលទ្ធផលនៃការដំឡើងពន្ធលើផលិតផលថ្នាំជក់ពីប្រទេសនានាឱ្យដឹងនៅក្នុងសន្និសីទនៅថ្ងៃនោះដែរថា បារីមានតម្លៃថោកពេកនៅតាមបណ្ដាប្រទេសជាច្រើន ដោយសារពន្ធនៅមានកម្រិតទាប ប៉ុន្តែនៅពេលដែលគេបានដំឡើងពន្ធលើផលិតផលថ្នាំជក់កាន់តែខ្ពស់ តម្លៃបារីក៏ឡើងថ្លៃ ខ្ពស់ដែរ ហើយចំណូលរដ្ឋក៏កើនឡើង ។ ជាក់ស្ដែងប្រទេសថៃដែលជាប្រទេសជិតខាងរបស់យើង នៅឆ្នាំ១៩៨៩ ពន្ធលើផលិតផលមានពី៣៥% ទៅ៥៥% ប៉ុណ្ណោះនៃតម្លៃលក់រាយតែដល់ឆ្នាំ២០១២ ថៃបានដំឡើងដល់៨៧% នៃតម្លៃលក់រាយហើយថៃអាចរកចំណូលបានរាប់រយ កោដិបាត ។
គួរបញ្ជាក់ថា បច្ចុប្បន្នកម្ពុជាមានតម្លៃពន្ធលើផលិតផលថ្នាំជក់ត្រឹមតែ៥%នៃតម្លៃលក់រាយ ហើយគេចង់ឱ្យប្រទេសកម្ពុជាយកពន្ធពីផលិតផលថ្នាំជក់កើនដល់៧០%នៃតំលៃលក់រាយ ដូចនេះវាត្រូវការរយៈពេលវែងទៀតដើម្បីឱ្យបានសម្រេចដូចបំណង ។ ការដំឡើងពន្ធលើផលិតផលថ្នាំជក់អាចជួយសង្គ្រោះជីវិតប្រជាពលរដ្ឋឱ្យរួចផុតពីសេចក្ដីស្លាប់បានច្រើន ៕
ចែករំលែកព័តមាននេះ