ខេត្តបន្ទាយមានជ័យ ៖ យុវជន៣នាក់ដែលជាប់ពាក់ព័ន្ធនឹងអំពើចោរកម្មលួចម៉ូតូ និងទ្រព្យសម្បត្តិរបស់ប្រជាពលរដ្ឋ ហើយប្រើអំពើហិង្សាផងនោះ ត្រូវបានលោកធាម ច័ន្ទពិសិដ្ឋ ចៅក្រមជំនុំជម្រះក្តី និងលោកឡុង ជាប តំណាងអយ្យការអមសាលាដំបូងខេត្ត ប្រកាសសាលក្រមផ្តន្ទាទោសដាក់ពន្ធនាគារក្នុងម្នាក់ៗ១ឆ្នាំ កាលពីរសៀលថ្ងៃទី១៤ កញ្ញា កន្លងមក ។
មុនការប្រកាសសាលក្រម អង្គសវនាការបានសួរដេញដោលជនជាប់ចោទឈ្មោះធី សាលី អាយុ២៦ឆ្នាំ និងឈ្មោះឆៃ ណា អាយុ២៥ឆ្នាំ រស់នៅក្នុងសង្កាត់ប៉ោយប៉ែត និងបានឆ្លើយនៅក្នុងសវនាការថា ពួកគេទាំង២នាក់មិនបានលួចអ្វីទេ គ្រាន់តែប្រើអំពើហិង្សាដោយចេតនាវាយជនរងគ្រោះនឹងដំបង តែមិនត្រូវឡើយ ។ ចំណែកអង្គហេតុមួយទៀត ជនជាប់ចោទឈ្មោះយ៉ា ត្រូ អាយុ២៤ឆ្នាំ រស់នៅភូមិក្បាលកោះ សង្កាត់ប៉ោយប៉ែត បានឆ្លើយសារភាពថា ខ្លួនពិតជាបានលួចម៉ូតូកាលពីថ្ងៃទី២៥ មីនា ឆ្នាំ២០១២ យកទៅលក់មែន តែក៏ត្រូវម្ចាស់ប្តឹងប៉ូលិសឱ្យចាប់ខ្លួន ។
លោកឡុង ជាប តំណាងអយ្យការបានសន្និដ្ឋានការសួរដេញដោលជនជាប់ចោទទាំង៣នាក់ ដែលឆ្លើយក្នុងសវនាការ ដោយនៅតែចោទប្រកាន់ដដែលពីបទប្រើហិង្សា និងចោរកម្ម ។ យោងតាមការសួរដេញដោលនិងចម្លើយរបស់ជនជាប់ចោទទាំង៣នាក់ តុលាការសម្រេចផ្តន្ទាទោសក្នុងម្នាក់ៗដាក់ពន្ធនាគារ១ឆ្នាំពីបទប្រើអំពើហិង្សាដោយចេតនា និងចោរកម្មគិតចាប់ពីថ្ងៃឃាត់ខ្លួន ៕
ចែករំលែកព័តមាននេះ