រាជធានីភ្នំពេញ ៖ នារសៀលថ្ងៃទី១៥ កញ្ញា ឆ្នាំ២០១២ នៅសាកលវិទ្យាល័យឯកទេសនៃកម្ពុជា ទីតាំងស្ទឹងមានជ័យ មានរៀបចំពិធីផ្សព្វផ្សាយកម្មវិធី«យុវជន និងទីក្រុងស្អាត» ក្រោមប្រធានបទ«កាត់បន្ថយ ប្រើប្រាស់ឡើងវិញ និងកែច្នៃសំណល់ប្លាស្ទិក ចាប់ផ្តើមពីយុវជន» ក្រោមអធិបតីភាពលោកគឹម សេរីរដ្ឋ តំណាងអគ្គលេខាធិការដ្ឋាននៃគណៈកម្មាធិការជាតិវាយតម្លៃទីក្រុងស្អាត លោកនួន ផារ័ត្ន តំណាងសមាគមយុវជនកម្ពុជា និងលោកឈុន ណុច សាកលវិទ្យាធិការងនៃសាកលវិទ្យាល័យឯកទេសនៃកម្ពុជា ដោយមានការចូលរួមពីសំណាក់គណៈគ្រប់គ្រងបុគ្គលិក សាស្ត្រាចារ្យ និងនិស្សិតនៃសាកលវិទ្យាល័យយ៉ាងច្រើនកុះករ ។
ដោយមើលឃើញពីបញ្ហាប្រឈមនៃការបំពុលបរិស្ថាន និងតម្រូវការចាំបាច់ក្នុងការចូលរួមចំណែករបស់យុវជនក្នុងចលនាប្រឡងប្រណាំងទីក្រុងស្អាត តម្រូវការនៃការស្វែងយល់អំពីខ្លឹមសារ ចំណេះដឹង បទពិសោធន៍ ពីកម្មវិធី«យុវជន និងទីក្រុងស្អាត» ក្រោមប្រធានបទ«កាត់បន្ថយ ប្រើប្រាស់ឡើងវិញ និងកែច្នៃសំណល់ប្លាស្ទិក ចាប់ផ្តើមពីយុវជន» របស់គណៈគ្រប់គ្រង បុគ្គលិក សាស្ត្រាចារ្យ ពិសេសយុវជនជានិស្សិតនៃសាកលវិទ្យាល័យឯកទេសនៃកម្ពុជា ក៏ដូចជាដើម្បីចូលរួមអនុវត្តតាមអនុសាសន៍ណែនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន ជាអគ្គមគ្គុទេ្ទសក៍ដ៏ឆ្នើមនៃយើង សំដៅធ្វើឱ្យគ្រប់ទីក្រុងទាំងអស់ក្លាយជាគោលដៅទេសចរណ៍ដែលផ្តោតភាពកក់ក្តៅ និងសុខុមាលភាពរស់នៅរបស់ប្រជាជនដោយឈរលើទស្សនាទាន«ទីក្រុងស្អាត ដើម្បីទាំងអស់គ្នា ទាំងអស់គ្នា ដើម្បីទីក្រុងស្អាត» ។
អគ្គលេខាធិការដ្ឋាននៃគណៈកម្មាធិការជាតិវាយតម្លៃទីក្រុងស្អាត សមាគមយុវជនកម្ពុជាបានសហការជាមួយសាកលវិទ្យាល័យឯកទេសនៃកម្ពុជា រៀបចំពិធីផ្សព្វផ្សាយកម្មវិធី«យុវជន និងទីក្រុងស្អាត» ក្រោមប្រធានបទ«កាត់បន្ថយប្រើប្រាស់ឡើងវិញ និងកែច្នៃសំណល់ប្លាស្ទិក ចាប់ផ្តើមពីយុវជន»នេះឡើង ។ គោលបំណងនៃការរៀបចំពិធីផ្សព្វផ្សាយលើប្រធានបទនេះ គឺ១- ដើម្បីបញ្ជ្រាបការយល់ដឹងពីខ្លឹមសារនៃប្រធានបទ និងអត្ថប្រយោជន៍នៃការចូលរួមរបស់យុវជនក្នុងការកាត់បន្ថយ ប្រើប្រាស់ឡើងវិញ និងកែច្នៃសំណល់ប្លាស្ទិក ក៏ដូចជាបទពិសោធន៍នៃការអនុវត្តកន្លងមកដល់ស្រទាប់បញ្ញាជន ពិសេសយុវជនជានិស្សិត ២- ដើម្បីសិក្ខាកាមទាំងអស់បានយល់ដឹងទូលំទូលាយ និងអាចចូលរួមផ្សព្វផ្សាយបន្តដល់ក្រុមគ្រួសារ មិត្តភក្តិ និងប្រជាពលរដ្ឋទូទៅ តាមលទ្ធភាពដែលអាចធ្វើបាន ៣- ដើម្បីជំរុញឱ្យយុវជនមានការចូលរួមយ៉ាងសកម្មក្នុងចលនាប្រឡងប្រណាំងទីក្រុងស្អាត និងកាត់បន្ថយ ប្រើប្រាស់ឡើងវិញ កែច្នៃសំណល់ប្លាស្ទិក ចាប់ផ្តើមពីយុវជន ឱ្យមានប្រសិទ្ធភាព និងទី៤- ដើម្បីរួមចំណែកអភិវឌ្ឍ និងកែលម្អទីក្រុងឱ្យសកិ្តសមជា«ទីក្រុងស្អាត» នៃ«កម្ពុជាព្រះរាជាណាចក្រអច្ឆរិយៈ» និងរក្សាបាននូវភាពថ្លៃថ្នូរ និងកិត្យានុភាពជាតិយើង ។
សាកលវិទ្យាល័យឯកទេសនៃកម្ពុជាមានជំនឿថា និស្សិតរបស់ខ្លួនទាំងអស់នឹងចូលរួមអនុវត្តចលនាយុវជន និងទីក្រុងស្អាត តាមរយៈការកាត់បន្ថយ ការប្រើប្រាស់ឡើងវិញ និងកែច្នៃសំណល់ប្លាស្ទិកឱ្យមានប្រសិទ្ធភាព ៕
ចែករំលែកព័តមាននេះ