ក្រុងប៉ោយប៉ែត ៖ ភ្លើងស្នេហ៍ដែលនៅតែមិនអស់អាល័យក្រោយពីការលែងលះ បុរសជាអតីតប្តីបានលួចមកជួបប្រពន្ធ តែការចង់ត្រឡប់មករួមរស់ជានានឹងគ្នាវិញនោះត្រូវបានអតីតម្តាយក្មេក និងអតីតប្រពន្ធស្តីបន្ទោស ព្រមទាំងបណ្តេញឱ្យចេញពីផ្ទះទៀត ធ្វើឱ្យអតីតកូនប្រសារូបនេះមានកំហឹងក៏បបួលបក្សពួកមកកាប់បណ្តាលឱ្យរងរបួសទាំងយប់ និងមានការភ្ញាក់ផ្អើលផងដែរ ។ ហេតុការណ៍នេះ បានកើតឡើងកាលពីវេលាម៉ោង៨ និង៣០នាទីយប់ថ្ងៃទី១៥ កញ្ញា នៅភូមិក្បាលកោះ សង្កាត់ប៉ោយប៉ែត ។
នៅចំណុចកើតហេតុ គេឃើញស្ត្រី២នាក់ដែលម្តាយឈ្មោះអឹុម ណេង អាយុ៥៨ឆ្នាំ និងកូនស្រីឈ្មោះឆែ លី អាយុ៣៦ឆ្នាំ រងរបួសយ៉ាងធ្ងន់ក្រោយពីត្រូវជនសង្ស័យដែលជាអតីតកូនប្រសា និងអតីតប្តីនាំបក្សពួកមកកាប់ដល់ក្នុងផ្ទះ ព្រោះតែខឹងរឿងហាមមិនឱ្យជួបគ្នានៅពេលយប់ ។ ជនសង្ស័យជាអតីតប្តីរូបនេះឈ្មោះរ៉ង អាយុ២៧ឆ្នាំ នៅក្រុងប៉ោយប៉ែត និងមានស្រុកកំណើតនៅខេត្តស្វាយរៀង ។
តាមប្រភពព័ត៌មានពីកន្លែងកើតហេតុឱ្យដឹងថា មុនមានហេតុការណ៍កើតឡើងគឺឈ្មោះរ៉ង បានលួចមកជួបប្រពន្ធ ក្រោយពីគេមានជម្លោះក្នុងគ្រួសារ ហើយលែងលះគ្នាអស់រយៈពេលជិត៣ខែមកហើយ។ ខណៈឈ្មោះរ៉ង មកជួបប្រពន្ធ ត្រូវម្តាយក្មេកដឹង ក៏ប្រាប់ថាបើចង់ជួបសុំឱ្យមកជួបគ្នាពេលថ្ងៃមិនត្រូវមកជួបពេលយប់ទេ ។ ការនិយាយបែបនេះ ធ្វើឱ្យឈ្មោះរ៉ងខឹងក៏ត្រឡប់ទៅវិញបាត់ទៅ លុះប្រហែល២ម៉ោងក្រោយមកស្រាប់តែត្រឡប់មកវិញជាមួយបក្សពួក៤នាក់ផ្សេងទៀតប្រដាប់ដោយដាវសាមូរ៉ៃគ្រប់ដៃ។ ដំបូងឈ្មោះរ៉ង បានចូលទៅកាប់ប្រពន្ធ ប៉ុន្តែដោយស្ត្រីជាម្តាយឃើញស្ទុះទៅជួយក៏ត្រូវបក្សពួកឈ្មោះរ៉ង ព្រួតគ្នាកាប់តែម្តង ។ ការកាប់ប្រហារនោះ បណ្តាលឱ្យនាងឆែ លី អតីតប្រពន្ធរងរបួសក្បាលខាងស្តាំម្តុំក្រោមត្រចៀក និងលើត្រចៀកចំនួន២កន្លែង និងកដៃទាំងសងខាង ឯស្ត្រីឈ្មោះអឹុម ណេង ជាម្តាយរងរបួសក្រោមត្រចៀកខាងស្តាំរហូតដល់មាត់ ។
ក្រោយហេតុការណ៍កើតឡើង ជនសង្ស័យ និងបក្សពួកបានរត់គេចខ្លួនអស់ ខណៈអ្នកស្រុកផ្អើលឆោឡោស្រែកហៅគ្នា ។ ជនរងគ្រោះ ត្រូវបានអ្នកស្រុកគ្នាជួយនាំយកទៅកាន់មន្ទីរពេទ្យបង្អែកក្រុងប៉ោយប៉ែត ។ ប្រភពព័ត៌មានប្រាប់ថា ក្រោយហេតុការណ៍កើតឡើង អាជ្ញាធរភូមិ និងប៉ូលិសប៉ុស្តិ៍រដ្ឋបាល ក៏ដូចជាប៉ូលិសព្រំដែនបានចុះមកធ្វើកំណត់ហេតុរួមគ្នា និងតាមស្រាវជ្រាវដើម្បីចាប់ខ្លួនជនសង្ស័យ ៕
ចែករំលែកព័តមាននេះ