ខេត្តព្រះសីហនុ ៖ បន្ទាប់ពីបានឃើញសេចក្តីប្រកាសយ៉ាងតក់ក្រហល់របស់រោងចក្រដែលធ្វើការបិទទ្វារផ្អាកដំណើរការ ធ្វើឱ្យកម្មកររោងចក្របង្កកផលនេសាទសមុទ្រចេនឡាស៊ីហ៊្វូតខូអិលធីឌី ដែលមានទីតាំងស្ថិតនៅក្នុងភូមិ៣ សង្កាត់លេខ១ ក្រុងព្រះសីហនុ ប្រមាណជិត៣០០នាក់នាំគ្នាធ្វើកូដកម្មនៅក្នុងទីធ្លារោងចក្រដើម្បីតវ៉ាសូមបើកប្រាក់ខែពីចៅកែរោងចក្រកាលពីព្រឹកថ្ងៃទី១៥ កញ្ញា ។
កម្មការិនីម្នាក់បានឱ្យដឹងថា មូលហេតុដែលពួកគេធ្វើការតវ៉ានេះ គឺបណ្តាលមកពីក្រុមហ៊ុនបានបញ្ឈប់ពួកគេទាំងអស់គ្នាយ៉ាងតក់ក្រហល់ពីការងារ ដូចនេះពួកគេគ្រាន់តែស្នើសុំបើកប្រាក់ខែប៉ុណ្ណោះ តែថៅកែនិយាយថា រឿងប្រាក់ខែនេះចាំមានថៅកែថ្មីគេមកសិន ហើយដោយមានការមិនទុកចិត្តទើបពួកគេធ្វើការតវ៉ាបែបនេះ ។ ប្រភពដដែលបានបន្តថា ពួកគេមិនអាចរង់ចាំបើកប្រាក់ខែចាស់ជាមួយថៅថ្មីបានទេ ព្រោះថៅកែថ្មីគេមិនដឹងរឿងចាស់ឡើយ ។
ក្រោយពីផ្ទុះការតវ៉ារបស់ក្រុមកម្មករ គេឃើញមានតំណាងមន្ទីរការងារខេត្តចំនួន២នាក់ និងមន្ត្រីអាជ្ញាធរមូលដ្ឋានរួមនឹងសមត្ថកិច្ចចំនួន៥-៦នាក់បានទៅដល់ និងធ្វើការសម្របសម្រួលព្រោះខ្លាចកើតមានអំពើហិង្សាដោយប្រការណាមួយ ។ បន្ទាប់ពីធ្វើការសម្របសម្រួលរហូតដល់ម៉ោងប្រមាណជាង២រសៀល ទើបក្រុមកម្មករព្រមទទួលយកលក្ខខណ្ឌរបស់រោងចក្ររួមមាន ក្នុងរយៈពេល២ខែដែលរោងចក្រផ្អាកដំណើរការ ភាគីរោងចក្រសុំបើកប្រាក់ឧបត្ថម្ភក្នុងម្នាក់ចំនួន២០ដុល្លារក្នុងមួយខែ ។ ឯប្រាក់បៀវត្សចំនួន១៥ថ្ងៃដែលកម្មករបានធ្វើការនោះ ភាគីរោងចក្រសន្យាបើកនៅថ្ងៃទី៥ តុលា ខាងមុខដោយមានតំណាងមន្ទីរការងារជាសាក្សី៕
ចែករំលែកព័តមាននេះ