ខេត្តបន្ទាយមានជ័យ ៖ ភូមិចំនួន២ និងកំណាត់ផ្លូវនៅតាមបន្ទាត់ព្រំដែនជិត២គីឡូម៉ែត្រក្នុងចំណោមភូមិចំនួន៥ក្នុងឃុំអូរបីជាន់ បាននិងកំពុងរងការជន់លិចដោយទឹកជំនន់ហូរបុកពីប្រទេសថៃ ហើយពេលនេះគិតត្រឹមល្ងាចថ្ងៃ១៦ កញ្ញា អាជ្ញាធរស្រុកកំពុងសិក្សាដើម្បីរកទីទួលសុវត្ថិភាពឱ្យប្រជាពលរដ្ឋស្នាក់នៅ ។
តាមដងផ្លូវនៅតាមបន្ទាត់ព្រំដែនក្នុងឃុំអូរបីជាន់ ទឹកជំនន់ពីប្រទេសថៃបានបុកផ្តាច់ជាច្រើនកន្លែង ក្នុងនោះលំនៅឋានប្រជាពលរដ្ឋជាច្រើនគ្រួសារក៏រងការជន់លិចដែរ ។ លោកកែវ សែន អភិបាលស្រុកអូរជ្រៅបានប្រាប់តាមទូរស័ព្ទថា ទឹកជំនន់ដែលជន់លិចលំនៅឋាននិងដងផ្លូវនៅឃុំអូរបីជាន់ ជាទឹកជំនន់ហូរបុកពីប្រទេសថៃ ។ លោកថ្លែងថា ក្នុងឃុំអូរបីជាន់មានការជន់លិចភូមិចំនួន៥រួមមាន ភូមិអូរបីជាន់ ភូមិព្រៃចាន់ ភូមិជោគជ័យ ភូមិទំនប់ដាច់ និងភូមិសិលាខ្មែរ និងដងផ្លូវប្រវែងជិត២គីឡូម៉ែត្រ។
លោកកែវ សែន បន្តថា ក្នុងចំណោមភូមិទាំង៥ខាងលើមានភូមិចំនួន២ រងការជន់លិចខ្លាំងជាងគេ គឺភូមិទំនប់ដាច់ និងភូមិសិលាខ្មែរ ។ សរុបទាំង២ភូមិមានប្រជាពលរដ្ឋជាង៦០០គ្រួសារ និងលំនៅឋាន៥៦១ខ្នងត្រូវទឹកជន់លិច។ នៅភូមិសិលាខ្មែរមានពលរដ្ឋ៤២៤គ្រួសារ លិច២១០គ្រួសារផ្ទះ១៨៩ខ្នង ឯនៅភូមិទំនប់ដាច់លិច៤០១គ្រួសារ ស្មើនឹង៣៧២ខ្នងផ្ទះ ។ លោកកែវ សែន បន្តថា ពេលនេះផ្លូវជិត២គីឡូម៉ែត្រក្នុងភូមិទាំង២ខាងលើស្ទើរមិនអាចធ្វើដំណើរបានទៅហើយ ដោយកន្លែងខ្លះរាក់ តែកន្លែងខ្លះទឹកត្រឹមចង្កេះ ហើយពេលនេះជាគោលការណ៍អាជ្ញាធរស្រុកកំពុងរកទីទួលសុវត្ថិភាពដើម្បីឱ្យប្រជាពលរដ្ឋទៅជ្រកកោន ។
លោកអភិបាលស្រុកបន្តថា ដោយទឹកហូរពីប្រទេសថៃពេលនេះកំពុងបន្តហូរមកយ៉ាងខ្លាំង អាជ្ញាធរបានឱ្យប្រជាពលរដ្ឋនៅតាមផ្ទះសិន បើសភាពការណ៍យប់ថ្ងៃទី១៦ កញ្ញា ទឹកនៅតែបុកខ្លាំង នឹងត្រូវជម្លៀសចេញទៅរកទីទួលសុវត្ថិភាពភ្លាម ។ លោកបានប្រាប់ប្រជាពលរដ្ឋទាំងអស់ថា បើចាំបាច់ត្រូវប្រើគោយន្តឬយានយន្តរៀងខ្លួន ឯថ្លៃប្រេងឬសាំងខាងលោកជាអ្នកជួយ ។ បញ្ហាស្បៀងក៏ដូចគ្នាដែរ អាជ្ញាធរស្រុកនឹងជួយឧបត្ថម្ភបើមានការខ្វះខាត ។ លោកអភិបាលស្រុកប្រាប់ថា អាជ្ញាធរស្រុកកំពុងធ្វើរបាយការណ៍ស្នើសុំថ្នាក់លើដើម្បីជួយជាអំណោយបន្ទាន់ ។
គួរបញ្ជាក់ថា ក្រៅពីឃុំអូរបីជាន់ នៅក្រុងប៉ោយប៉ែតពិសេសភូមិមួយចំនួនខាងត្បូងផ្លូវជាតិលេខ៥ ដូចជាភូមិអូរជ្រៅ ភូមិក្បាលកោះ ក្នុងសង្កាត់ប៉ោយប៉ែត ភូមិអូរខៃដន ភូមិកូនដំរី ក្នុងសង្កាត់និមិត្ត ក៏រងការជន់លិចដោយជំនន់ទឹកភ្លៀង និងជំនន់ហូរបុកពីប្រទេសថៃដូចគ្នាដែរ ។
ភ្លៀងធំស្ទើរពេញមួយយប់ ជន់លិចចំណតរថយន្តតូចធំ និងផ្លូវមួយចំនួននៅក្រុងប៉ោយប៉ែត ក្រោយពីភ្លៀងធ្លាក់មិនឈប់ឈរស្ទើរតែពេញមួយយប់កាលពីយប់ថ្ងៃទី១៤ កញ្ញា រហូតដល់វេលាទៀបភ្លឺថ្ងៃទី១៥ កញ្ញា នៅក្រុងប៉ោយប៉ែត គេឃើញកន្លែងមួយចំនួនដូចជាចំណតរថយន្តធំតូច ដងផ្លូវលំនានា និងទីធ្លាសាលារៀនមួយចំនួនរងការជន់លិច ។ ការជន់លិច ដោយជំនន់ទឹកភ្លៀងនេះ បង្កឱ្យចំណតរថយន្តមានការលំបាកដោយរថយន្តតូចធំបាននាំគ្នាមកចតលក់សំបុត្រ និងដាក់មនុស្សលើដងផ្លូវបេតុង ឯរថយន្តធំៗក៏ត្រូវផ្ទេរទំនិញតាមដងផ្លូវធំដែរ ។
អ្នកធ្វើដំណើរត្រូវបើកបរយានយន្ត និងដើរក្នុងទឹក ដូចជាផ្លូវមួយខ្សែក្នុងភូមិបាលិលេយ្យ២(ផ្លូវសុខភាព) ដែលតភ្ជាប់ពីផ្លូវជាតិលេខ៥ឆ្ពោះទៅអនុវិទ្យាល័យអូរជ្រៅជាដើម ហើយទីធ្លាសាលាមួយចំនួនដូចជា អនុវិទ្យាល័យអូរជ្រៅ និងសាលារៀនមួយចំនួនទៀតក៏កំពុងរងការជន់លិច ដែរ ។ មានការគិតថា បើភ្លៀងនៅតែបន្តធ្លាក់ នាពេលខាងមុខ ជំនន់ទឹកភ្លៀងនឹងកាន់តែជន់លិចលើសនេះទៅទៀត ព្រោះផ្ទៃេមឃនាពេលនេះនៅតែបន្តអួអាប់ ពពកខ្មៅមីដេរដាស គ្មានឃើញពន្លឺថ្ងៃទេ បើគិតត្រឹមម៉ោង១០ព្រឹកថ្ងៃទី១៥ កញ្ញា ៕
ចែករំលែកព័តមាននេះ