ខេត្តកណ្តាល ៖ ផ្លូវលំក្រាលថ្មមួយខ្សែប្រវែង៥.៥២០ម៉ែត្រ ស្ថិតក្នុងភូមិទួលស្ពឺ ភូមិព្រែកស្លែង ឃុំតាលន់ ស្រុកស្អាង បានធ្វើពិធីសម្ពោធដាក់ឲ្យប្រើប្រាស់ជាផ្លូវការ កាលពីព្រឹកថ្ងៃទី១៣ កញ្ញា ឆ្នាំ២០១២ ក្រោមអធិបតីភាពលោកបណ្ឌិតឧកញ៉ា ជា រតនា ទីប្រឹក្សារាជរដ្ឋាភិបាល អនុប្រធានគណៈពង្រឹងមូលដ្ឋានស្រុកស្អាង និងជាប្រធានគណៈពង្រឹងមូលដ្ឋានឃុំតាលន់ ចូលរួមក្នុងពិធី
ខេត្តកណ្តាល ៖ ផ្លូវលំក្រាលថ្មមួយខ្សែប្រវែង៥.៥២០ម៉ែត្រ ស្ថិតក្នុងភូមិទួលស្ពឺ ភូមិព្រែកស្លែង ឃុំតាលន់ ស្រុកស្អាង បានធ្វើពិធីសម្ពោធដាក់ឲ្យប្រើប្រាស់ជាផ្លូវការ កាលពីព្រឹកថ្ងៃទី១៣ កញ្ញា ឆ្នាំ២០១២ ក្រោមអធិបតីភាពលោកបណ្ឌិតឧកញ៉ា ជា រតនា ទីប្រឹក្សារាជរដ្ឋាភិបាល អនុប្រធានគណៈពង្រឹងមូលដ្ឋានស្រុកស្អាង និងជាប្រធានគណៈពង្រឹងមូលដ្ឋានឃុំតាលន់ ចូលរួមក្នុងពិធីនេះមានមន្ត្រីរាជការ កងកម្លាំងប្រដាប់អាវុធ លោកគ្រូ អ្នកគ្រូ តាជី យាយជី សិស្សានុសិស្ស និងប្រជាពលរដ្ឋយ៉ាងច្រើនកុះករ ។
លោក ខឹម ច័ន្ទគិរី ប្រធានគណៈកម្មាធិការគណបក្សប្រជាជនកម្ពុជាស្រុកនិងជាអភិបាលស្រុកស្អាងបានថ្លែងថា ក្នុងនាមគណៈអភិបាលស្រុកស្អាង មន្ត្រីរាជការ កងកម្លាំង ប្រជាពលរដ្ឋ និងសមាជិកសមាជិកាគណបក្សប្រជាជនកម្ពុជាទាំងអស់ មានបីតិសោមនស្សរំភើបរីករាយក្រៃលែង ដោយបានទទួលកិត្តិយសចំពោះវត្តមានលោកបណ្ឌិត ជា រតនា ទីប្រឹក្សារាជរដ្ឋាភិបាលជាអនុប្រធានគណៈពង្រឹងមូលដ្ឋានស្រុកស្អាង និងជាប្រធានគណៈពង្រឹងមូលដ្ឋានឃុំតាលន់ ដែលបានអញ្ជើញជាអធិបតីក្នុងពិធីសម្ពោធដាក់ឲ្យប្រើប្រាស់ផ្លូវលំក្រាលថ្មមួយខ្សែប្រវែង ៥.៥២០ម៉ែត្រនាឱកាសដ៏ថ្លៃថ្លានេះ ។
លោកប្រធានគណបក្សស្រុកបានបន្តទៀតថា ដោយការយកចិត្តទុកដាក់គិតគូរដល់សុខទុក្ខរបស់ប្រជាពលរដ្ឋលោកបណ្ឌិត ជា រតនា បានលះបង់នូវធនធានថវិកាផ្ទាល់ខ្លួន ដ៏ច្រើនសន្ធឹកសន្ធាប់ស្ថាបនាផ្លូវលំមួយខ្សែក្រាលថ្មនេះឡើង ដែលផ្លូវនេះជាសមិទ្ធផលដ៏វិសេសវិសាល ជាឧត្តមប្រយោជន៍ដ៏មានតម្លៃសម្រាប់ប្រជាពលរដ្ឋទូទៅ ។ ផ្លូវលំក្រាលថ្មដែលបានដាក់សម្ពោធឲ្យប្រើប្រាស់នៅពេលនេះ គឺពិតជាចំណងដៃដ៏ពិសិដ្ឋរបស់លោកបណ្ឌិត ជា រតនា និងលោកជំទាវព្រមទាំងក្រុមការងារដែលបានបង្ហាញយ៉ាងប្រាកដដល់ទឹកចិត្តករុណាទិគុណ ដ៏ជ្រាលជ្រៅបំផុត ។
លោកអភិបាលស្រុកបានបន្តទៀតថា សមិទ្ធផលផ្លូវលំមួយខ្សែនេះបានស្ថាបនាឡើងកាលពីថ្ងៃទី៦ សីហា ឆ្នាំ២០១២ និងបានរួចរាល់ជាស្ថាពរនៅថ្ងៃទី១២ កញ្ញា ឆ្នាំ២០១២ ។ ផ្លូវនេះស្ថាបនាឡើងដោយក្រាលថ្មមានប្រវែង៥.៥២០ម៉ែត្រ ឆ្លងកាត់ភូមិចំនួន២ភូមិ គឺភូមិទួលស្ពឺ និងភូមិព្រែកស្លែង ឃុំតាលន់ ស្រុកស្អាង ដោយចំណាយថវិកាអស់ជាង៤ម៉ឺនដុល្លារសហរដ្ឋអាមេរិក ដែលជាថវិកាផ្ទាល់ខ្លួនរបស់លោកបណ្ឌិត ជា រតនា និងលោកជំទាវ ។ ផ្លូវនេះស្ថាបនាបានលឿនដោយសារតែមានគ្រឹះស្រាប់ពីមុនមក ។
លោក ជា រតនា បានថ្លែងថា នេះជាលើកទី២ហើយដែលលោកបានមកកាន់ទឹកដីឃុំតាលន់ ក្រោយពីការដង្ហែទៀនវស្សាចូលវត្តពោធិ៍ព្រែកស្លែង ។
លោកបានក្រើនរំលឹកថា បើបងប្អូនប្រជាពលរដ្ឋក្នុងគ្រួសារណាមួយមិនអាចទទួលបានការអនុញ្ញាតឲ្យធ្វើបុណ្យសព ធ្វើលិខិតរៀបអាពាហ៍ពិពាហ៍ ធ្វើអត្តសញ្ញាណប័ណ្ណ ឯកសារទាំងឡាយណាពាក់ព័ន្ធ បើមេភូមិ ឬក៏អនុភូមិមិនស៊ីញ៉េទេ សូមបងប្អូនទាក់ទងទៅជំនួយការភូមិ គាត់នឹងចេញមុខធ្វើការងារនេះជូនបងប្អូន តែមិនមែនគាត់ស៊ីញ៉េជំនួសអាជ្ញាធរទេ មានន័យថា គាត់នឹងជួយសម្រួលជូនបងប្អូន ។ រាល់តម្រូវការចាំបាច់ដែលបងប្អូនត្រូវការប្រញាប់ឧទាហរណ៍ដូចជា គ្មានអត្តសញ្ញាណប័ណ្ណចុះឈ្មោះបោះឆ្នោត ដល់ពេលបោះឆ្នោតបងប្អូនត្រូវរាយការណ៍មកក្រុមជំនួយការភូមិ ហើយក្រុមជំនួយការភូមិនឹងរាយការណ៍មកលោក ដើម្បីធ្វើការសម្រួលដល់បងប្អូន ។
ចំពោះប្រជាពលរដ្ឋណាដាច់ស្បៀងអាហារ ដែលកើតមាននៅក្នុងឃុំតាលន់នេះ មេភូមិ អនុភូមិ ឬក៏ជំនួយការភូមិត្រូវរាយការណ៍ លោកនឹងផ្តល់អង្ករចំនួនមួយបាវទន្ងន់២៥គីឡូក្រាម និងថវិកា៥ម៉ឺនរៀល ដើម្បីធ្វើការដោះទាល់ដល់គ្រួសារនោះ។ ជាមួយនេះគ្នាលោកក៏បានធ្វើការផ្តាំផ្ញើដល់អាជ្ញាធរត្រូវខឹតខំថែរក្សាផ្លូវលំមួយខ្សែនេះឲ្យបានគង់វង្សយូរអង្វែងទៅមុខទៀត ។
ក្នុងពិធីនេះដែរ លោកបណ្ឌិតឧកញ៉ា ជា រតនា ក៏បាននាំយកអំណោយចែកជូនដល់តាជី យាយជីចំនួន២០០នាក់ ក្នុងម្នាក់ៗទទួលបានក្រមាមួយ និងថវិកាចំនួន១ម៉ឺនរៀល សិស្សានុសិស្សចំនួន២០០នាក់ ម្នាក់ៗទទួលបានសៀវភៅ២ក្បាល ប៊ិច២ដើម និងថវិកាចំនួន៥ពាន់រៀល៕
ចែករំលែកព័តមាននេះ