រាជធានីភ្នំពេញ ៖ កាលពីថ្ងៃពុធទី១២ កញ្ញា ឆ្នាំ២០១២ នៅការិយាល័យសម្ព័ន្ធសមាគមសហគ្រាសធុនតូចនិងមធ្យមកម្ពុជា ក្រោមកិច្ចសហការរៀបចំដោយ ក្រុមប្រឹក្សាស្តារអភិវឌ្ឍន៍វិស័យកសិកម្មនិងជនបទ ក្រសួងពាណិជ្ជកម្ម និងក្រសួងកសិកម្មរុក្ខាប្រមាញ់ និងនេសាទ បានរៀបចំនូវសន្និសីទមួយស្តីពីវេទិកាស្រូវអង្ករកម្ពុជា ដែលនឹងប្រារព្ធធ្វើឡើងចំនួន២ថ្ងៃគឺនៅថ្ងៃទី១-២ ខែតុលា ឆ្នាំ
រាជធានីភ្នំពេញ ៖ កាលពីថ្ងៃពុធទី១២ កញ្ញា ឆ្នាំ២០១២ នៅការិយាល័យសម្ព័ន្ធសមាគមសហគ្រាសធុនតូចនិងមធ្យមកម្ពុជា ក្រោមកិច្ចសហការរៀបចំដោយ ក្រុមប្រឹក្សាស្តារអភិវឌ្ឍន៍វិស័យកសិកម្មនិងជនបទ ក្រសួងពាណិជ្ជកម្ម និងក្រសួងកសិកម្មរុក្ខាប្រមាញ់ និងនេសាទ បានរៀបចំនូវសន្និសីទមួយស្តីពីវេទិកាស្រូវអង្ករកម្ពុជា ដែលនឹងប្រារព្ធធ្វើឡើងចំនួន២ថ្ងៃគឺនៅថ្ងៃទី១-២ ខែតុលា ឆ្នាំ២០១២ នៅសណ្ឋាគារសូហ្វីតែល ភ្នំពេញភូគីត្រា (Sofitel Phnom Penh Phokeetra) ក្រោមអធិបតីភាពបើកអង្គវេទិកាដោយលោកឧបនាយករដ្ឋមន្ត្រីយឹម ឆៃលី តំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងប្រារព្ធបិទអង្គវេទិកាក្រោមអធិបតីភាពលោកទេសរដ្ឋមន្ត្រីចម ប្រសិទ្ធ រដ្ឋមន្ត្រីក្រសួងពាណិជ្ជកម្ម ។
គោលបំណងរបស់សន្និសីទនេះ គឺដើម្បីប្រកាសព័ត៌មានស្តីពីវេទិកាស្រូវអង្ករកម្ពុជា ដែលរៀបចំឡើងដើម្បីកៀងគរបណ្តាភាគីពាក់ព័ន្ធនៅក្នុងខ្សែសង្វាក់ផលិតកម្មស្រូវអង្ករ ដើម្បីចែករំលែកចំណេះដឹងនិងធ្វើបច្ចុប្បន្នភាពចរន្តទីផ្សារពិភពលោក និងអាចជួយសម្រួលដល់អ្នកដើរតួនាទី នៅក្នុងសហគមន៍អង្ករកម្ពុជា បានក្រេបជញ្ជក់យកចំណេះដឹងដ៏មានតម្លៃនេះពីបណ្តាជំនាញការដែលមកពីស្ថាប័នឯកជននិងស្ថាប័នរដ្ឋ និងបណ្តាអ្នកចូលរួមទាំងថ្នាក់ជាតិ និងអន្តរជាតិនៅក្នុងវេទិកានេះ ។
សូមបញ្ជាក់ផងដែរថា វេទិកាស្រូវអង្ករលើកទី២នេះបានរៀបចំធ្វើឡើងនៅក្នុងប្រទេសកម្ពុជា ដើម្បីផ្តល់ជាប្រយោជន៍ដ៏សំខាន់ដល់សហគមន៍អង្ករកម្ពុជា ក្នុងការឈានឆ្ពោះទៅសម្រេចឱ្យបានគោលដៅរបស់រដ្ឋាភិបាលកម្ពុជាក្នុងការនាំចេញអង្ករឱ្យបាន១លានតោននៅក្នុងឆ្នាំ២០១៥ ។ វេទិកានេះបានបង្ហាញពីចំណាប់អារម្មណ៍របស់អ្នកចូលរួម និងកំណត់នូវជំហានសំខាន់ៗនិងថ្មីៗដែលប្រកាន់យកតាំងពីមុនមកដោយស្ថាប័នឯកជន និងសាធារណៈក្នុងការប្រឹងប្រែងសម្រេចឱ្យបាននូវគោលដៅនាំចេញតាមការកំណត់ ថែមទាំងមានប្រធានបទថ្មីៗដែលនឹងត្រូវបានធ្វើបទបង្ហាញដោយវាគ្មិន និងអ្នកឯកទេសជាតិ និងអន្តរជាតិ ។
វេទិកានេះ មានគោលបំណងអញ្ជើញអ្នកទិញអន្តរជាតិ និងអ្នកនាំចេញពីបណ្តាទីផ្សារសំខាន់ៗរបស់អង្ករកម្ពុជា ដូចជា ទីផ្សារអឺរ៉ុបខាងកើត និងអឺរ៉ុបខាងលិច មជ្ឈិមបូពា៌ អាហ្វ្រិក និងអាស៊ីដែលជាឱកាសដ៏ល្អក្នុងការរៀនសូត្រពីបណ្តាស្ថាប័នរបស់រដ្ឋាភិបាល និងវិស័យឯកជន ក្នុងការទទួលយកវិធានការចំពោះមុខ និងអនាគតដើម្បីកែលម្អវិស័យនេះឱ្យកាន់តែមានការអភិវឌ្ឍ។
វេទិកាខាងមុខនេះ នឹងនាំពាណិជ្ជករអន្តរជាតិប្រមាណជាង៤០ប្រទេស មកជួបជុំគ្នាក្នុងវេទិកានេះ ដើម្បីទទួលយកព័ត៌មានថ្មីបំផុតអំពីស្រូវអង្ករកម្ពុជា និងគោលនយោបាយបើកច្រកទ្វារទីផ្សារនាំចេញអង្ករកម្ពុជា ទៅកាន់ពិភពលោកឱ្យបាន១លានតោនក្នុងឆ្នាំ២០១៥ដែលបានទទួលការឧបត្ថម្ភធំដោយក្រុមហ៊ុន RMA Cambodia និងអ្នកសហការឧបត្ថម្ភដោយធនាគារ FTB, ធនាគារ ANZ Royal, Maersk Line ,MCC Transport, SH Dryer, Pan Condinental, Agro Idustry ។
លោកឧកញ៉ាតែ តាំងប៉ ប្រធានសម្ព័ន្ធសមាគមសហគ្រាសធុនតូចនិងមធ្យមកម្ពុជាបានថ្លែងថា នេះជាលើកទី២ហើយ ដែលសម្ព័ន្ធសមាគមសហគ្រាសធុនតូច និងមធ្យមកម្ពុជា បានរៀបចំវេទិកាស្រូវ-អង្ករកម្ពុជា បន្ទាប់ពីយើងសម្រេចបានជោគជ័យយ៉ាងធំធេងលើការរៀបចំវេទិកាស្រូវ-អង្ករកម្ពុជាលើកទី១ ដែលបានធ្វើឡើងកាលពីថ្ងៃទី១៧ តុលា ឆ្នាំ២០១១ នៅមជ្ឈមណ្ឌលកោះពេជ្រ ក្រោមអធិបតីភាពបើកអង្គវេទិកាដោយលោកឧបនាយករដ្ឋមន្ត្រីយឹម ឆៃលី តំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន និងប្រារព្ធបិទកម្មវិធីក្រោមអធិបតីភាពលោកឧបនាយករដ្ឋមន្ត្រីគាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដែលវេទិកានោះស្រូបយកក្រុមហ៊ុនក្រៅស្រុកចំនួន៤០ក្រុមហ៊ុន ដែលបានចូលរួមមានដូចជាប្រទេសជប៉ុន កូរេ៉ អីុតាលី អង់គ្លេស អាមេរិក រុស្ស៊ី ស្វ៊ីស អាល្លឺម៉ង់ ប៊ុលហ្គារី ហុងគ្រី ចិន សិង្ហបុរី ម៉ាឡេស៊ី ហ្វ៊ីលីពីន ថៃ និងវៀតណាម ហើយភ្ញៀវក្នុងស្រុកសរុប៥០០នាក់(ទាំងស្ថាប័នរដ្ឋ និងឯកជន) ។
ដូច្នេះ ដើម្បីបន្តជំហាននៃយន្តការអភិវឌ្ឍន៍ លើការជំរុញគោលនយោបាយដ៏ស៊ីជម្រៅនេះ សម្ព័ន្ធសមាគមសហគ្រាសធុនតូច និងមធ្យមកម្ពុជា ក្រោមកិច្ចសហការជាមួយក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ក្រសួងពាណិជ្ជកម្ម និងក្រសួងកសិកម្មរុក្ខាប្រមាញ់និងនេសាទ នឹងរៀបចំបង្កើតវេទិកានេះឡើង ដោយធ្វើយ៉ាងណាឱ្យអង្ករកម្ពុជាអាចបើកចំហទីផ្សាររបស់ខ្លួនក្នុងបរិបទថ្មី ជាមួយនឹងគុណភាពដែលអន្តរជាតិទទួលស្គាល់ ។
ការរៀបចំវេទិកាស្រូវ-អង្ករ កម្ពុជានេះឡើង ក្នុងគោលបំណងពីរធំៗគឺ ទី១-ជំរុញផលិតកម្មស្រូវ និងការនាំចេញអង្ករក្នុងសន្ទុះ និងទំហំថ្មីមួយនៅលើទីផ្សារពិភពលោក ។ ទី២-ធ្វើឱ្យអង្ករកម្ពុជាត្រូវបានគេទទួលស្គាល់ជាអន្តរជាតិផងដែរ ។ ការរៀបចំវេទិកានេះឡើង គឺធ្វើឡើងដើម្បីប្រមូលផ្តុំតួអង្គសំខាន់់ៗនៅក្នុងខ្សែសង្វាក់ផលិតកម្មស្រូវនិងអង្ករកម្ពុជា និងអ្នកផ្គត់ផ្គង់សម្ភារកសិកម្មដើម្បីផ្តល់នូវចំណេះដឹងថ្មីៗ ការផ្សព្វផ្សាយគោលនយោបាយ ការវិភាគ ការប្រមូលផ្តុំនានា និងពិភ្សារកដំណោះស្រាយនៅក្នុងវិស័យស្រូវអង្ករ ដើម្បីសម្រេចឱ្យបាននូវគោលដៅក្នុងការនាំចេញអង្ករតាមគោលនយោបាយរបស់រាជរដ្ឋាភិបាល ។
លើសពីនេះទៀត វេទិកានេះនឹងធ្វើការពិនិត្យ និងកំណត់នូវជំហានសំខាន់ថ្មីៗដែលប្រកាន់យកតាំងពីមុនមកដោយស្ថាប័នរដ្ឋ និងវិស័យឯកជន ក្នុងការប្រឹងប្រែងសម្រេចឱ្យបានតាមគោលដៅនាំចេញដែលបានកំណត់ និងដោះស្រាយឱ្យទាន់សភាពការណ៍នូវរាល់បញ្ហាប្រឈមដែលបាននិងកំពុងកើតឡើង។ វេទិកានេះ មានគោលបំណងអញ្ជើញអ្នកទិញអន្តរជាតិនិងអ្នកនាំចេញពីបណ្តាទីផ្សារសំខាន់ៗរបស់អង្ករកម្ពុជា ដូចជាអឺរ៉ុប អាស៊ី អាមេរិកខាងជើង ដែលជាឱកាសដ៏ល្អក្នុងការរៀនសូត្រពីបណ្តាស្ថាប័នរដ្ឋ និងឯកជនក្នុងការទទួលយកវិធានការចំពោះមុខ និងអនាគតដើម្បីកែលម្អវិស័យនេះឱ្យកាន់តែមានការអភិវឌ្ឍ ។
ដើម្បីលើកស្ទួយដល់វិស័យស្រូវ-អង្ករកម្ពុជា ឱ្យមានការរីកចម្រើន និងបើកផ្លូវឆ្ពោះទៅរកភាពប្រកួតប្រជែងខ្ពស់ទាំងក្នុងតំបន់ និងអន្តរជាតិស្របពេលដែលយើងកំពុងត្រៀមខ្លួនធ្វើសមាហរណកម្មសេដ្ឋកិច្ចតំបន់អាស៊ាន (សេដ្ឋកិច្ចតែមួយវាសនាតែមួយ ) នៅឆ្នាំ២០១៥ ខាងមុខ វេទិកានេះអាចជួយពាណិជ្ជករជាតិនិងអន្តរជាតិបានជួបសំណេះសំណាលការងារពាណិជ្ជកម្មក្នុងផ្នែកស្រូវអង្ករ និងមានឱកាសពង្រីកទីផ្សាររបស់ខ្លួនឱ្យបានកាន់តែទូលំទូលាយថែមទៀត ។ ម្យ៉ាងទៀត វេទិកានេះនឹងផ្តល់ជូននូវព័ត៌មានថ្មីបំផុតអំពីស្រូវ-អង្ករ នៅកម្ពុជា និងទីផ្សារថ្មី ៗ របស់កម្ពុជា ក៏ដូចជានយោបាយក្នុងការបើកច្រកទ្វារទីផ្សារអង្ករកម្ពុជាទៅកាន់ទីផ្សារពិភពលោកក្នុងបរិបទថ្មី ៕
ចែករំលែកព័តមាននេះ