អតីតម្ចាស់ជើងឯកពិភពលោក២ស្ថាប័នទម្ងន់រីកគី ហាតតុនគ្រោងនឹងធ្វើសេចក្តីប្រកាសស្តីពីការវិលចូលវិស័យកីឡាប្រដាល់ជាថ្មីនៅថ្ងៃស្អែកនេះ ។ ហាតតុនវ័យ៣៣ឆ្នាំមិនបានឡើងសង្វៀនប្រកួតនោះទេចាប់តាំងពីចាញ់កីឡាករហ្វុីលីពីនម៉ានី ប៉ាក់គីអាវដោយសន្លប់ក្នុងទឹកទី២កាលពីខែឧសភាឆ្នាំ ២០០៩មក ។ ទោះជាយ៉ាងណា ការប្រកាសចូលនិវត្តន៍ជាផ្លូវការណ៍របស់គេទើបតែធ្វើកាលពីឆ្នាំទៅមិញប៉ុណ្ណោះ ។ បច្ចុប្បន្ន គេកំពុងដឹកនាំនិងគ្រប់គ្រងក្រុមហ៊ុនរៀបចំការប្រកួតផ្ទាល់ខ្លួនមួយ ។
នៅក្នុងសន្និសីទសារព័ត៌មានថ្ងៃស្អែកនេះ រូបគេគ្រោងនឹងធ្វើសេចក្តីប្រកាសដ៏ធំមួយ ។ ហាតតុនធ្លាប់ជាជើងខ្លាំងម្នាក់ក្នុងប្រភេទទម្ងន់ Light-welterweight ហើយជ័យជម្នះដ៏ត្រចះត្រចង់របស់គេក្នុងប្រភេទទម្ងន់នេះគឺលើម្ចាស់ខ្សែក្រវាត់ស្ថាប័ន IBF Kostya Tszyuក្នុងឆ្នាំ២០០៥ ។ ឆ្នាំបន្ទាប់មកទៀត គេបានយកឈ្នះកីឡាករព័រតូរីកូ Luis Collazoដណ្តើមបានខ្សែក្រវាត់ក្នុងប្រភេទទម្ងន់ welterweight របស់ស្ថាប័ន WBA ។ ក្រោយមកក្នុងឆ្នាំដដែលនោះ គេដណ្តើមបានខ្សែក្រវាត់ស្ថាប័ន IBF បន្ទាប់ពីយកឈ្នះកីឡាករ Juan Urango ។
នៅឆ្នាំ២០០៧ គេបានចាញ់ក្រោមកណ្តាប់ដៃកីឡាករអាមេរិក ហ្វ្លយ មេវេដឌ័រ ហើយបន្តចាញ់ជាថ្មីទៀតក្រោមកណ្តាប់ដៃម៉ានី ប៉ាក់គីអាវ ។ កាន់តែអាក្រក់ជាងនេះ នៅឆ្នាំ២០១០អាជ្ញាបណ្ណប្រកួតរបស់គេត្រូវបានក្រុមប្រឹក្សាប្រដាល់អង់គ្លេស(BBBC)ដកហូតពោលគឺបន្ទាប់ពីរូបគេរងការចោទប្រកាន់ពីបទប្រើប្រាស់សារធាតុកូកាអុីន ។
ត្រឡប់វិលចូលជាថ្មីនេះ ហាតតុនមានគម្រោងឡើងសង្វៀនក្នុងខែវិច្ឆិកាខាងមុខ ។ សូមបញ្ជាក់ថា កីឡាករអង់គ្លេសរូបនេះមានឯតទគ្គកម្មប្រកួត៤៧លើក ឈ្នះ៤៥ ចាញ់២ មិនដែលស្មើ និងធ្លាប់ផ្តួលដៃគូឱ្យសន្លប់ចំនួន ៣២លើក ៕
ចែករំលែកព័តមាននេះ