រាជធានីភ្នំពេញ ៖ ក្រសួងទេសចរណ៍កម្ពុជាបានបង្ហាញនូវតួលេខចុងក្រោយដោយបញ្ជាក់ថា សម្រាប់រយៈពេល៧ខែដើមឆ្នាំ២០១២ នេះភ្ញៀវទេសចរអន្តរជាតិដែលចូលមកទស្សនានៅប្រទេសកម្ពុជា មានការកើនឡើងប្រមាណ២៥,៦% បើប្រៀបធៀបរយៈពេលដូចគ្នានៃឆ្នាំ ២០១១ ។
តាមរបាយការណ៍ក្រសួងទេសចរណ៍រយៈពេល៧ខែឆ្នាំ២០១២ នេះ ភ្ញៀវអន្តរជាតិដែលមកទស្សនាកម្ពុជា មានចំនួន២.០៤០.៩៣៥នាក់ កើនឡើង២៥,៦% បើប្រៀបធៀបរយៈពេលដូចគ្នានៃឆ្នាំ២០១១ ក្នុងចំណោមនោះភ្ញៀវទេសចរដែលធ្វើដំណើរតាមផ្លូវអាកាសមានចំនួន៩៧៧.២៨៤នាក់ តាមផ្លូវគោកចំនួន១.០១៤.៤១៩នាក់ និងតាមផ្លូវទឹកចំនួន៤៩.២៣១នាក់ ។
លោកថោង ខុន រដ្ឋមន្ត្រីក្រសួងទេសចរណ៍ឱ្យដឹងថា ទីផ្សារទេសចរណ៍សំខាន់ៗទាំង១០ដែលមានភ្ញៀវចូលមកទស្សនានៅកម្ពុជារួមមានភ្ញៀវមកពីប្រទេសវៀតណាម មានចំនួន៤៥៣.៨៩៤នាក់មកពីកូរ៉េ ចំនួន២៥៦.៣១៥នាក់, មកពីចិនចំនួន១៧៩.២១៥នាក់, ឡាវចំនួន១២៧.២៩៧នាក់, ថៃចំនួន១០៥.៣៩៣នាក់, អាមេរិកចំនួន១០៣.៨១២នាក់, ជប៉ុនចំនួន៩៥.៨៧៧នាក់, បារាំងចំនួន៧០.៨៦៦នាក់, អូស្ត្រាលីចំនួន៦៧.២០២នាក់ និងអង់គ្លេសចំនួន៦៥.៨៧៣នាក់។ លោករដ្ឋមន្ត្រីបានអះអាងថា ចំនួនភ្ញៀវទេសចរដែលមកពីបណ្តាប្រទេសទាំង១០នោះ គឺសុទ្ធតែមានចំនួនកើនឡើង បើប្រៀបធៀបរយៈពេលដូចគ្នានៃឆ្នាំ ២០១១ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ