រាជធានីភ្នំពេញ ៖ ឧបនាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុអមដំណើរដោយមន្ត្រីជាន់ខ្ពស់នៃក្រសួងជាច្រើននាក់បានចូលរួមប្រកាសតែងតាំង និងផ្ទេរតំណែងប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុកាលពីព្រឹកថ្ងៃទី១០ កញ្ញា ២០១២ ដែលរៀបចំឡើងនៅសាលាជាតិពន្ធដារ ស្ថិតក្នុងសង្កាត់ផ្សារដេប៉ូ៣ ខណ្ឌទួលគោក ។
ក្នុងឱកាសនោះលោកស៊ឹម អៀង ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកពន្ធដារដែលត្រូវផ្លាស់ចេញបានឡើងអានរបាយការណ៍ស្តីពីការរីកចម្រើនរបស់អគ្គនាយកដ្ឋានពន្ធដារកន្លងមកក្នុងនោះការប្រមូលពន្ធក៏ដូចជាកសាងអង្គភាពពន្ធដារតាមបណ្តារាជធានី-ខេត្ត ។ លោកស៊ឹម អៀង ត្រូវបានប្រកាសតែងតាំងជាអនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
ដោយឡែកលោកគង់ វិបុល ត្រូវបានតែងតាំងជាប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារដោយរក្សាតួនាទីជាអនុប្រធានក្រុមប្រឹក្សាអភិវឌ្ឍន៍កម្ពុជា និងជាទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
ឧបនាយករដ្ឋមន្ត្រី គាត ឈន់ បានមានមតិផ្តាំផ្ញើដល់លោកប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារដែលទើបនឹងត្រូវបានតែងតាំងថ្មីថា ត្រូវតែជំរុញការរៀបចំការគ្រប់គ្រងការប្រមូលចំណូលពន្ធលើប្រភេទពន្ធថ្មីដូចជា ពន្ធលើអចលនទ្រព្យ និងកែលំអ និងបង្កើនការគ្រប់គ្រងប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ, បន្តពង្រឹង និងកែលំអរដ្ឋបាលពន្ធដារពង្រីកការងារសវនកម្មពន្ធពិនិត្យលទ្ធភាពពង្រីកមូលដ្ឋានយកពន្ធឱ្យបានត្រឹមត្រូវច្បាស់លាស់ និងរុករកបង្កើនមូលដ្ឋានអាជីវកម្មថ្មី ដើម្បីបញ្ចូលក្នុងបញ្ជីពន្ធបង្កើនប្រសិទ្ធភាពនៃការប្រមូលពន្ធ និងការធ្វើវិចារណកម្ម ប្រព័ន្ធវាយតម្លៃ និងការលើកទឹកចិត្តឱ្យបានល្អប្រសើរ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ