ខេត្តកំពត ៖ អ្នកម៉ៅការសំណង់ម្នាក់បានត្រូវចរន្តអគ្គិសនីឆក់ ខណៈពេលយកម៉ែត្រកៀរស៊ីម៉ង់ត៍ ហើយប៉ះនឹងខ្សែភ្លើងស្រាតនៅក្បែរលំនៅឋានដែលកំពុងសាងសង់នោះ បណ្តាលឱ្យឆេះរោលពេញដងខ្លួន រួចធ្លាក់មកដីប៉ះលើគំនរក្តារពុម្ព ដែលមានដែកគោលផង និងសន្លប់ស្តូកស្តឹងនៅកន្លែងកើតហេតុ ។ ហេតុការណ៍នេះកើតឡើងកាលពីវេលាម៉ោង១និង១៥នាទីរសៀលថ្ងៃទី៨
ខេត្តកំពត ៖ អ្នកម៉ៅការសំណង់ម្នាក់បានត្រូវចរន្តអគ្គិសនីឆក់ ខណៈពេលយកម៉ែត្រកៀរស៊ីម៉ង់ត៍ ហើយប៉ះនឹងខ្សែភ្លើងស្រាតនៅក្បែរលំនៅឋានដែលកំពុងសាងសង់នោះ បណ្តាលឱ្យឆេះរោលពេញដងខ្លួន រួចធ្លាក់មកដីប៉ះលើគំនរក្តារពុម្ព ដែលមានដែកគោលផង និងសន្លប់ស្តូកស្តឹងនៅកន្លែងកើតហេតុ ។ ហេតុការណ៍នេះកើតឡើងកាលពីវេលាម៉ោង១និង១៥នាទីរសៀលថ្ងៃទី៨ កញ្ញា នៅផ្លូវកែងចូលទៅរមណីយដ្ឋានទេសចរណ៍ទឹកឈូ ស្ថិតក្នុងភូមិទ្វីខាងជើង សង្កាត់អណ្តូងខ្មែរ ក្រុងកំពត ។
មន្ត្រីសមត្ថកិច្ចដែលទៅពិនិត្យហេតុការណ៍បានឱ្យដឹងថា មេការសំណង់នេះឈ្មោះ តេង លាង ភេទប្រុស អាយុ៤៨ឆ្នាំ មានទីលំនៅភូមិក្រាំង សង្កាត់ក្រាំងអំពិល ក្រុងកំពត ។ តាមការរៀបរាប់របស់កម្មករសំណង់បានឱ្យសមត្ថកិច្ចដឹងថា មុនពេលកើតហេតុមេការរបស់ខ្លួន កំពុងធ្វើការនៅជាន់ទី២នៃសំណង់ដែលមានកម្ពស់ស្មើនឹងកម្ពស់ខ្សែកាបគ្មានស្រោម ហើយខ្សែភ្លើងនេះ ឃ្លាតពីរន្ទាសម្រាប់ជាន់រៀបឥដ្ឋ ឬបូកជញ្ជាំងប្រហែលជាកន្លះម៉ែត្រប៉ុណ្ណោះ ។ ប្រភពដដែលបន្តទៀតថា មេជាងអាចកាន់ម៉ែត្រកៀរអាចម៍កំបោរ រួចជ្រុលទៅប៉ះនឹងខ្សែកាប ស្រាតក៏បណ្តាលឱ្យទុស្សេចរន្តឆក់តែម្តង ។
ភ្លាមៗនោះ អ្នកជិតខាងនិងកម្មករបានស្ទុះទៅលើកជនរងគ្រោះដែលធ្លាក់ទើរលើគំនរក្តារពុម្ពសន្លប់ស្តូក ស្តឹង ព្រមទាំងឆេះរោលពេញដងខ្លួន ហើយមុតនឹងដែកគោលឈាមហូរពេញខ្លួនផងនោះ សែងមកដាក់មុខផ្ទះសំណង់ រួចដងទឹកមកស្រោចមួយសន្ទុះទើបដឹងខ្លួន ប៉ុន្តែក្នុងសភាពខ្សោយបំផុត ឯសមត្ថកិច្ចក៏បានហៅរថយន្តដឹកទៅសង្គ្រោះនៅមន្ទីរពេទ្យខេត្តភ្លាមៗដែរ ។ ជុំវិញការសង់លំនៅឋានកៀកនឹងខ្សែភ្លើង ដែលមានថាមពលរាប់ម៉ឺនគីឡូវ៉ាត់យ៉ាងនេះ អាចប្រឈមនឹងគ្រោះថ្នាក់ខ្លំាងបំផុត ។
ប្រជាពលរដ្ឋ មន្ត្រីរាជការ និងសាធារណជនទូទៅដែលគេមើលឃើញការសាងសង់លំនៅឋានដែលច្បាប់មិនគួរអនុញ្ញាតនោះឆ្ងល់ថា ហេតុដូចម្តេចបានជាអាជ្ញាធរក្រុង រួមនឹងភូមិបាលក្រុងផងអនុញ្ញាតឱ្យគេសាងសង់សំណង់រឹងកៀកនឹងខ្សែភ្លើងគ្មានស្រោមដូច្នេះទៅវិញ ។ ប៉ុន្តែមានប្រភពព័ត៌មានមួយឱ្យដឹងថា សំណង់នេះខាងជំនាញភូមិបាលបានចុះត្រួតពិនិត្យតាំងពីមិនទាន់សាងសង់ទ្រង់ទ្រាយធំមកម្លេ៉ះ រួចក៏បានធ្វើរបាយការណ៍ជូនសាលាក្រុងផងដែរ ។
ប្រភពនោះបន្តទៀតថា សាលាក្រុងក៏បានជូនដំណឹងមកម្ចាស់សំណង់ស្តីពីការមិនអនុញ្ញាតឱ្យសាងសង់ដែរ ហើយសាលាក្រុងបានទាំងចេញលិខិតបញ្ជាឱ្យផ្អាកទៀតផង ពីព្រោះកន្លែងសំណង់នេះជាចំណីផ្លូវ ហើយកៀកនឹងខ្សែភ្លើង ដែលមានកម្លាំងថាមពលរាប់ម៉ឺនគីឡូវ៉ាត់អាចប្រឈមនឹងគ្រោះថ្នាក់បំផុត ៕
ចែករំលែកព័តមាននេះ