ខេត្តបាត់ដំបង ៖ យុវជនម្នាក់ត្រូវសមត្ថ កិច្ចឃាត់ខ្លួនកសាងសំណុំរឿងបញ្ជូនទៅតុលា ការកាលពីព្រឹកថ្ងៃទី៩កញ្ញា តាមបណ្តឹងរបស់នារីម្នាក់ដែលបានប្តឹងចោទថា យុវជននេះបានព្យាយាមដោះដៃមិនទទួលខុសត្រូវក្រោយពីចាប់បង្ខំរួមមេត្រីជាមួយនាងឆ្អែតឆ្អន់មិនខុសពីចោរប្លន់ព្រហ្មចារីនោះទេ កាលពីរាត្រីថ្ងៃអាទិត្យចុងសប្តាហ៍មុន នៅក្រោមផ្ទះរបស់នាងស្ថិតក្នុងសង្កាត់ចំការសំរោង ក្រុងបាត់ដំបង ខណៈនាងនៅផ្ទះម្នាក់ឯង ។
មន្រ្តីនគរបាលព្រហ្មទណ្ឌកម្រិតធ្ងន់បានឱ្យដឹងថា ជនត្រូវចោទឈ្មោះម៉ូច សាម៉ុល អាយុ២៦ឆ្នាំ នៅភូមិស្វាយជ្រុំ ឃុំអូរដំបង២ ស្រុកសង្កែ រីឯនារីរងគ្រោះអាយុ២០ឆ្នាំ ។ សមត្ថកិច្ចបន្ថែមថា នារីរងគ្រោះបានអះអាងថា យុវជននេះបានចាប់រំលោភនាងកាលពីវេលាម៉ោង៩យប់ថ្ងៃទី ២កញ្ញា នៅលើគ្រែក្រោមផ្ទះរបស់នាងក្នុងគ្រាដែលនាងនៅផ្ទះជាមួយក្មួយប្រុសម្នាក់នាយប់នោះ ។ សមត្ថកិច្ចបញ្ជាក់ថា នាងសម្រេចមកប្តឹងក្រោយពីជននេះបដិសេធមិនទទួលខុសត្រូវ និងព្យាយាមគេចវេះបន្ទាប់ពីរួមមេត្រីជាមួយនាងបានសម្រេចកាលពី៥ថ្ងៃមុន ។ ក្រោយពីទទួលបណ្តឹងសមត្ថកិច្ចក៏បានឃាត់ខ្លួនយុវជននេះនៅ រសៀលថ្ងៃទី៧ កញ្ញា តែម្តង ។
តាមបណ្តឹងនារីរងគ្រោះបានឱ្យដឹងថា នាងទើបមានទំនាក់ទំនងជាមួយយុវជននេះក្នុងរយៈពេលខ្លីប៉ុណ្ណោះ ។ នាងថា យុវជននេះតែងទូរស័ព្ទមកជួបនាងជាញឹកញាប់ លុះនៅយប់កើតហេតុជននេះបានមកលេងផ្ទះនាង ខណៈម្តាយនាងមិននៅ ។ នាងនិយាយថា ពេលឈ្មោះម៉ុល មកដល់នាងក៏បានចុះមកជួបនិយាយគ្នាលេងខាងក្រោមផ្ទះខណៈក្មួយប្រុសនាងកំពុងមើលទូរទស្សន៍លើផ្ទះ ។ ពេលជជែកគ្នាលេងបានបន្តិចស្រាប់តែឈ្មោះម៉ុល បានពន្លត់ភ្លើង រួចចាប់ឱបផ្តួលនាងទៅលើគ្រែ រួចធ្វើសកម្មភាពរំលោភរហូតបានសម្រេច ។ នាងបានបញ្ជាក់ដែរថា ឈ្មោះម៉ុលបានចាប់ក្បាលនាងអុកលើគ្រែដែលជាហេតុធ្វើឱ្យនាងហឹងត្រចៀកអស់កម្លាំងរើមិនរួច បណ្តោយឱ្យជននេះរំលោភដល់ទីបញ្ចប់ ។ នាងបញ្ជាក់ដែរថា នាងបានទូរស័ព្ទហៅឈ្មោះម៉ុល នេះមកដោះស្រាយ ដើម្បីឱ្យទទួលខុសត្រូវតែជននេះបដិ សេធទើបនាងប្តឹងតែម្តង ។
ជនត្រូវចោទឈ្មោះម៉ូច សាម៉ុល វិញបាននិយាយថា ខ្លួននិងរូបនាងរួមមេត្រីជាមួយគ្នាដោយមានការយល់ព្រមមិនមែនជាការចាប់បង្ខំទេ ហើយក៏មិនបានចាប់បោកក្បាលនោះដែរ ។ យុវជននេះពន្យល់ថា មូលហេតុដែលនាងប្តឹងគឺដោយសារនាងខឹងនឹងខ្លួនដែលមិនប្រាប់ឱ្យឪពុកម្តាយចូលដណ្តឹងនាង តាមការសន្យា ។ សាម៉ុលបញ្ជាក់ថា ក្រោយពីកើតហេតុនាយប់នោះព្រឹកឡើងនាង បានទូរស័ព្ទមកប្រាប់ខ្លួនឱ្យចូលស្តីដណ្តឹងនាង តែខ្លួនថា មិនអាចដណ្តឹងបានទេព្រោះឪពុកម្តាយក្រអត់មានលុយ ។ ដោយសារខ្លួននិយាយបែបនេះទើបនាងក្តៅក្រហាយប្តឹងចោទខ្លួនថាចាប់រំលោភតែម្តង ។
បើទោះជាបែបនេះក្តីមន្រ្តីការិយាល័យជំនាញបាននិយាយថា ពិតមែនតែជនសង្ស័យបានបដិសេធថា មិនបានចាប់បង្ខំដើម្បីរំលោភក្តី តែលោកស្នងការបានបញ្ជាឱ្យកម្លាំងជំនាញកសាងសំណុំរឿងបញ្ជូនជនសង្ស័យទៅ កាន់តុលាការហើយ ៕
ចែករំលែកព័តមាននេះ