រាជធានីភ្នំពេញ ៖ អ្នកដើរទាក់សត្វស្លាបម្នាក់ ប្រទះឃើញសពស្ត្រីម្នាក់នៅក្នុងគុម្ពស្មៅ នៃបរិវេណដីឡូត៍ទំនេរមួយនៅភូមិបឹងឈូក សង្កាត់និរោធ ខណ្ឌមានជ័យ កាលពីវេលាម៉ោង១១ព្រឹកថ្ងៃទី៩ កញ្ញា និងធ្វើឱ្យមានការភ្ញាក់ផ្អើលទៅដល់សមត្ថកិច្ចចុះមកត្រួតពិនិត្យផងដែរ ។
សពស្ត្រីខាងលើនេះត្រូវបានគេប្រទះឃើញស្លាប់ដេកផ្កាប់មុខ ហើយមានចងស្លាបសេកដៃមកក្រោយផងដែរ ។ សមត្ថកិច្ចសន្និដ្ឋានជាជំហានដំបូងថា ជាអំពើឃាតកម្ម ដែលឃាតករនាំស្ត្រីរងគ្រោះយកមកសម្លាប់នៅក្នុងគុម្ពស្មៅខាងលើនាវេលាយប់ស្ងាត់។ សពស្ត្រីនេះ ត្រូវបានក្រុមឃាតករមិនស្គាល់អត្តសញ្ញាណធ្វើសកម្មភាពសម្លាប់ ហើយយកស្បោងខ្មៅច្រកក្បាលមិនឱ្យមានមនុស្សស្គាល់ និងវាយ ។
តាមប្រភពព័ត៌មាននានា ដែលបាននិយាយនៅកន្លែងប្រទះឃើញសពស្ត្រីខាងលើនេះ បានឱ្យដឹងថា សពត្រូវឃាតករសម្លាប់ពីកន្លែងផ្សេងហើយដឹកមកទម្លាក់ចោលនៅភូមិសាស្ត្រខាងលើ រីឯប្រភពព័ត៌មានខ្លះទៀត បាននិយាយថា សពស្ត្រីខាងលើនេះត្រូវឃាតករសម្លាប់នៅកន្លែងប្រទះឃើញនោះតែម្តង ។ នៅកន្លែងកើតហេតុ គេប្រទះឃើញផងដែរទ្រនាប់ជើងមនុស្សស្ត្រីមួយគូបន្សល់ទុកនៅក្បែរសព ដែលស្ថានភាពបែបនេះ សមត្ថកិច្ចមួយចំនួនបាននិយាយថា ស្ត្រីរងគ្រោះត្រូវអ្នកស្គាល់គ្នានាំមកសម្លាប់នៅចំណុចខាងលើ ។
ស្ត្រីរងគ្រោះជាមនុស្សស្ថិតក្នុងវ័យជាង៣០ឆ្នាំ មានសាច់ឈាមស្រស់ថ្លា ដែលធ្វើឱ្យមានការសន្និដ្ឋានថា អាចជាអ្នកធូរធារ ។ មិនមានប្រភពព័ត៌មានច្បាស់ការណ៍ណាមួយនិយាយថា ស្រី្តរងគ្រោះខាងលើនេះត្រូវឃាតករមិនស្គាល់មុខនាំយកមកសម្លាប់ ដោយសារមូលហេតុអ្វីឡើយ ដោយសារតែមិនស្គាល់អត្តសញ្ញាណរបស់សព ។ តាមការពិនិត្យជំហានដំបូងរបស់សមត្ថកិច្ច សង្កេតឃើញថា នៅលើក្បាលសពមានស្នាមវាយពីក្រោយជាច្រើនកន្លែង ។
ប្រភពព័ត៌មានក្រៅផ្លូវការខ្លះបាននិយាយថា ស្ត្រីរងគ្រោះទំនងជានារីខារ៉ាអូខេ ។ នារីរងគ្រោះត្រូវឃាតករនាំ យកមករំលោភនៅក្នុងភូមិសាស្រ្តខាងលើ ។ ប៉ុន្តែសមត្ថកិច្ចបានបដិសេធ បន្ទាប់ពីបានធ្វើកោសល្យវិច័យសពគ្រប់ជ្រុងជ្រោយឃើញថា មានស្នាមវាយធ្វើទារុណកម្មលើរាងកាយផ្នែកខាងក្រោយ និងលើក្បាលជាច្រើនកន្លែង បណ្តាលឱ្យស្លាប់ និងគ្មាននរណាជួយ ។
ប៉ូលិសសន្និដ្ឋានចុងក្រោយថា សពខាងលើនេះមានសាច់ឈាមទំនងជាកូនកាត់ចិន ៕
ចែករំលែកព័តមាននេះ