រាជធានីភ្នំពេញ ៖ បុរសម្នាក់បានបាញ់បោះសេរីចំនួន៤គ្រាប់ធ្វើឱ្យផ្អើល កាលពីវេលាម៉ោង៦និង៤៥នាទីព្រលប់ ថ្ងៃទី៧ កញ្ញា ដោយសារតែខឹងគេបញ្ចាំងភ្លើងហ្វាដាក់ ខណៈពេលបើករថយន្តទល់មុខគ្នាហើយកំពុងឈ្លោះប្រកែកជាមួយមិត្តស្រីនោះតែមិនបង្កឱ្យមានរងរបួសទេ គ្រាន់តែធ្លុះកញ្ចក់រថយន្តមួយគ្រាប់ធ្លាយទៅបុកកញ្ចក់មើលក្រោយក្នុងរថយន្តប៉ុណ្ណោះ ។ ហេតុការណ៍នេះ កើតឡើងនៅតាមផ្លូវលេខ៥៥ ខាងក្រោយស្ថានទូតសហរដ្ឋអាមេរិកចាស់ ក្នុងសង្កាត់ចតុមុខ ខណ្ឌដូនពេញ ។
តាមម្ចាស់រថយន្តរងគ្រោះឈ្មោះ ចាន់ ពិសិដ្ឋ ភេទប្រុស អាយុ៣០ឆ្នាំ ជាមន្ត្រីយោធាស្នាក់នៅផ្ទះលេខ១៨B ផ្លូវលេខ២១ សង្កាត់ទន្លេបាសាក់ ខណ្ឌចំការមនបានឱ្យដឹងថា មុនពេលកើតហេតុគាត់បានជិះរថយន្តឡិចស៊ីស GS300 ពណ៌ខ្មៅ រួមដំណើរជាមួយឈ្មោះ សុង វុទ្ធី ភេទប្រុស អាយុ២៦ឆ្នាំ ជាអាជីវករ ស្នាក់នៅផ្លូវលេខ៨១៣ មហាវិថីព្រះមុនីវង្ស សង្កាត់ដើមថ្កូវ ខណ្ឌចំការមន ដើម្បីទៅហូបសាច់គោអាំង នៅផ្ទះលេខ២៩ ផ្លូវលេខ២២៨ សង្កាត់ចតុមុខ ខណ្ឌដូនពេញ ។
លុះពេលហូបរួចហើយ បានបើករថយន្តតាមផ្លូវលេខ៥៥ ក្នុងទិសដៅពីជើងទៅត្បូង ខណៈមកដល់ចំណុចខាងលើស្រាប់តែមានរថយន្តរ៉ង់រ៉ូវែរ ពណ៌ខ្មៅ ជិះគ្នា២នាក់ ស្រីម្នាក់ ប្រុសម្នាក់ បើកទល់មុខក្នុងទិសដៅបញ្រ្ចាសគ្នា លុះបើកហួសបន្តិចស្រាប់តែអ្នកបើករថយន្តរ៉ង់រ៉ូវែរនោះបាញ់មកលើរថយន្តគាត់ចំនួន៤គ្រាប់ ធ្លុះទៅបុកកញ្ចក់ក្នុងរថយន្តសម្រាប់មើលក្រោយតែមិនបណ្តាលឱ្យបែកកញ្ចក់ក្រោយទាំងផ្ទាំងនោះទេ គ្រាន់តែធ្លុះក្បាលគ្រាប់ប៉ុណ្ណោះ ។
ប្រភពព័ត៌មាននៅកន្លែងកើតហេតុបានឱ្យដឹងថា ពេលរថយន្តទាំងពីរគ្រឿងបើកទល់មុខគ្នានោះរថយន្តឡិចស៊ីសបើកភ្លើងហ្វាដាក់រថយន្តរ៉ង់រូ៉វែរ ស្របពេលដែលនៅក្នុងរថយន្តរ៉ង់រ៉ូវែរកំពុងតែមានការឈ្លោះប្រកែកគ្នាជាមួយស្រ្តីផង ធ្វើឱ្យម្ចាស់រថយន្តខឹងបើកដេញបាញ់ចំនួន៤គ្រាប់ទៅលើរថយន្តឡិចស៊ីស បណ្តាលឱ្យផ្អើលទាំងក្បាលល្ងាចតែម្តង ។
បន្ទាប់ពីបាញ់រួចហើយរថយន្តបង្កបានបើករត់បាត់ស្រមោល។ ចំណែកខាងរថយន្តរងគ្រោះបានទៅដាក់ពាក្យបណ្តឹងនៅប៉ុស្តិ៍រដ្ឋបាលនគរបាលចតុមុខដើម្បីស្រាវជ្រាវរករថយន្តដែលបាញ់បោះសេរីនោះមកផ្តន្ទាទោសតាមច្បាប់ ៕
ចែករំលែកព័តមាននេះ