រាជធានីភ្នំពេញ ៖ កាលពីព្រឹកថ្ងៃទី៧ កញ្ញា ឆ្នាំ២០១២ នៅសាលប្រជុំអគ្គនាយកដ្ឋានគយ និងរដ្ឋាករកម្ពុជា មានប្រារព្ធកិច្ចប្រជុំបូកសរុបលទ្ធផលការងារគយ និងរដ្ឋាករខែសីហា ឆ្នាំ ២០១២ ក្រោមអធិបតីភាពលោកបណ្ឌិត ប៉ែន សីុម៉ន ប្រតិភូរាជរដ្ឋាភិបាលទទួលបន្ទុកជាអគ្គនាយកគយ និងរដ្ឋាករកម្ពុជា ដោយមានការចូលរួមពីថ្នាក់ដឹកនាំគ្រប់ជាន់ថ្នាក់នៃអង្គភាពគយ និងរដ្ឋាករទូទាំងប្រទេស ។ លទ្ធផលចំណូលពន្ធអាករខែសីហា ឆ្នាំ ២០១២ សម្រេចបានជាង៣១២ពាន់លានរៀល មានកំណើនប្រមាណជាង៩% ប្រៀបធៀបចំណូលពន្ធគយខែសីហា ២០១១ កន្លងមក ។
អង្គប្រជុំបានលើកឡើងនូវវិធានចំពោះមុខ៩ចំណុចសំខាន់ៗដែលត្រូវបន្តអនុវត្តដើម្បីពង្រឹងប្រសិទ្ធភាពការងារគយ និងរដ្ឋាករ រួមមាន ៖
១-ពង្រឹងប្រសិទ្ធភាពការងារគ្រប់គ្រងយានយន្តនាំចូល ដោយអនុវត្តឱ្យបានមឹុងម៉ាត់តាមបទប្បញ្ញតិ្តជាធរមានប្រកបដោយអប្បមាទខ្ពស់ ជាពិសេសក្នុងការបញ្ជាក់ភាពត្រឹមត្រូវនៃបង្កាន់ដៃពន្ធយានយន្ត ។
២-ពង្រឹងការគ្រប់គ្រងអាជីវកម្មដឹកជញ្ជូន និងចែកចាយផលិតផលតេលសិលាតាមបទប្បញ្ញត្តិជាធរមាន ដោយសហការល្អជាមួយអាជ្ញាធរមូលដ្ឋានពាក់ព័ន្ធតាមរូបភាពភ្លៀងរលឹម ។
៣-ការបន្តតម្លើង និងដាក់ឱ្យដំណើរការប្រព័ន្ធទិន្នន័យគ្រប់គ្រងហានិភ័យឱ្យគ្របដណ្តប់ការិយាល័យគយតាមមាត់ច្រកអន្តរជាតិសំខាន់ៗទូទាំងប្រទេស ។
៤-ជំរុញបន្តការធ្វើវិមជ្ឈការការងារកំណត់តម្លៃគិតពន្ធគយ អនុលោមតាមកិច្ចព្រមព្រៀងអង្គការពាណិជ្ជកម្មពិភពលោក និងតាមសំណូមពរនៃកិច្ចសម្រួលពាពិជ្ជកម្ម ។
៥-ការត្រៀមកញ្ចប់គោលនយោបាយពន្ធអាករកែសម្រួលសម្រាប់ឆ្នាំ ២០១៣ ជាពិសេសការជំរុញកសាងច្បាប់ស្តីពីរដ្ឋាករ ឈានទៅរក្សាតុល្យភាពចំណូលគយប្រឈមនឹងការគំរាមកំហែងនានា ដូចជា ការថយចុះអត្រាពន្ធគយ និងកំណើនទំនិញក្នុងស្រុកជំនួសការនាំចូល ។
៦-ការពង្រឹងសក្តានុពលចំណូលគយក្នុងបណ្តាខេត្តនៃតំបន់អភិវឌ្ឍន៍ត្រីកោណមរកត(កម្ពុជា ឡាវ ថៃ) និងតំបន់ត្រីកោណអភិវឌ្ឍកម្ពុជា វៀតណាម ឡាវ ដោយដាក់ឱ្យដំណើរការពេញលេញនូវសាខាគយ និងរដ្ឋាករខេត្តជាប់ព្រំដែនទាំងនេះ ។
៧-ជំរុញការកសាងផែនការសកម្មភាព អនុវត្តប្រព័ន្ធបញ្ជរតែមួយជាតិ ឱ្យអនុវត្តបានពេញលេញ ដើម្បីសុំការសម្រេចពីគណៈកម្មការដឹកនាំ គម្រោងបញ្ជរតែមួយជាតិ ។
៨-ពង្រឹងប្រសិទ្ធភាពការងារ និងសាមគ្គីភាពផ្ទៃក្នុងអង្គភាពគយ និងរដ្ឋាករ ប្រកបដោយអភិបាលកិច្ចល្អ និងយកបទប្បញ្ញតិ្តច្បាប់ជាស្នូល ។
៩-បញ្ហាផ្សេងៗទៀតរួមមាន ការជំរុញការគ្រប់គ្រងទំនិញរួច ឬព្យួរពន្ធ ដែលបង្វែងទិសដៅប្រើប្រាស់ដោយល្មើសច្បាប់ ការរៀបចំបញ្ជរព័ត៌មានគយតាមអង្គភាពគយ ការពង្រឹងប្រសិទ្ធភាពមា៉សីុន SCAN និងការពង្រីកភាពគ្របដណ្តប់ប្រព័ន្ធ ASYCUDA និងប្រព័ន្ធគ្រប់គ្រងហានិភ័យទៅអង្គភាពគយ និងស្ថាប័នឯកទេសផ្សេងទៀតតាមបទប្បញ្ញត្តិជាធរមាន ឈានទៅអនុវត្តប្រព័ន្ធបញ្ជរតែមួយជាតិ (National Single Window) ឱ្យបានពេញលេញតាមគោលការណ៍នយោបាយរបស់រាជរដ្ឋាភិបាល ។
កិច្ចប្រជុំនេះ ត្រូវបានបញ្ចប់នៅវេលាម៉ោង១១និង៣០នាទី នាថ្ងៃដដែល ៕
ចែករំលែកព័តមាននេះ