ខេត្តស្វាយរៀង ៖ កាលពីថ្ងៃទី៦ កញ្ញា នៅសាលកាកបាទក្រហមកម្ពុជាសាខាខេត្ត មានរៀបចំសិក្ខាសាលាបណ្តុះបណ្តាលស្តីពីការពង្រឹងសមត្ថភាពគណៈកម្មាធិការអន្តរក្រសួង ដើម្បីស្រាវជ្រាវ សើុបអង្កេតផលិតផលក្លែងក្លាយដែលមានហានិភ័យខ្ពស់ដល់សុខភាព និងសុវត្ថិភាពនៅកម្ពុជា ។
ខេត្តស្វាយរៀង ៖ កាលពីថ្ងៃទី៦ កញ្ញា នៅសាលកាកបាទក្រហមកម្ពុជាសាខាខេត្ត មានរៀបចំសិក្ខាសាលាបណ្តុះបណ្តាលស្តីពីការពង្រឹងសមត្ថភាពគណៈកម្មាធិការអន្តរក្រសួង ដើម្បីស្រាវជ្រាវ សើុបអង្កេតផលិតផលក្លែងក្លាយដែលមានហានិភ័យខ្ពស់ដល់សុខភាព និងសុវត្ថិភាពនៅកម្ពុជា ។
សិក្ខាសាលានេះ ប្រារព្ធធ្វើក្រោមអធិបតីលោកសូរ ផន អនុរដ្ឋលេខាធិការក្រសួងមហាផ្ទៃ ដោយមានការចូលរួមពីលោកជំទាវ ដួង វណ្ណា តំណាងរាស្ត្រមណ្ឌលស្វាយរៀង លោកវរសេនីយ៍ត្រី ម៉ាណូអែល ប្រ៊ីឃ្វីត អ្នកដឹកនាំបច្ចេកទេសគម្រោងមេគង្គ និងជាអ្នកសម្របសម្រួលប្រចាំតំបន់នៃសាធារណរដ្ឋបារាំង លោកព្រះរាជអាជ្ញារង លោកស្នងការរង តំណាងនាយកដ្ឋានសេដ្ឋកិច្ចក្រសួងមហាផ្ទៃ ប្រធាន-អនុប្រធានប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិបាវិត ព្រៃវល្លិ មន្ត្រីគយនិងរដ្ឋាករសាខាខេត្ត មន្ត្រីកាំកុងត្រូលច្រកទ្វារអន្តរជាតិទាំងពីរ កងរាជអាវុធហត្ថខេត្ត មន្ទីរសុខាភិបាលខេត្ត អធិការ-អធិការរងនគរបាលស្រុក-ក្រុងទាំង៨ ។
លោក ចិន សុធា នាយករងរដ្ឋបាលសាលាខេត្ត បានកត់សម្គាល់ក្នុងរបាយការណ៍ថា បទល្មើសនាំចូលផលិតផលក្លែងក្លាយពីប្រទេសជិតខាងតាមច្រករបៀង គឺមានបញ្ហាច្រើន ជាពិសេសនៅរដូវប្រាំង ធ្វើឱ្យមានការពិបាកទប់ស្កាត់ ដោយខេត្តមានច្រកទ្វារអន្តរជាតិ២ ច្រកទ្វេភាគី២ ច្រកតំបន់៤ និងច្រករបៀងជាច្រើនទៀត ។
លោកជំទាវ ដួង វណ្ណា តំណាងរាស្ត្រមណ្ឌលស្វាយរៀង បានសំណូមពរដល់សិក្ខាកាមទាំងអស់ពេលបញ្ចប់វគ្គនេះទៅ ត្រូវយកជំនាញទៅផ្សព្វផ្សាយបន្តដល់អាជីវករ និងប្រជាពលរដ្ឋឱ្យពួកគាត់បានយល់ដឹងអំពីផលិតផលក្លែងក្លាយ ដែលធ្វើឱ្យប៉ះពាល់ដល់សុខភាពសាធារណៈ ដើម្បីរួមគ្នាទប់ស្កាត់ ។
លោកវរសេនីយ៍ត្រី ម៉ាណូអែល ប្រ៊ីតឃ្វីត មានប្រសាសន៍ថា ពួកឧក្រិដ្ឋជនសេដ្ឋកិច្ចបានផលិតផលិតផលក្លែងក្លាយដូចជា ឱសថក្លែងក្លាយ ប៉ះពាល់យ៉ាងធ្ងន់ធ្ងរដល់សុខភាពមនុស្សដែលមានជំងឺ ហើយត្រូវការចាំបាច់ក្នុងការព្យាបាល ។ ឱសថក្លែងក្លាយនេះ បណ្តាលឱ្យរងគ្រោះដល់មនុស្សគ្រប់គ្នា ។ ពួកឧក្រិដ្ឋជន កំពុងប្រយុទ្ធជាមួយយើងប្រចាំថ្ងៃ ជាសង្គ្រាមមួយដ៏ពិតប្រាកដប្រឈមជាមួយយើង ដូច្នេះរាជរដ្ឋាភិបាលកម្ពុជា ក៏ដូចជានៅលើពិភពលោក ត្រូវការគ្រប់សមត្ថកិច្ចចូលរួម ជាពិសេសសកម្មភាពរបស់អស់លោក ដើម្បីជាកម្លាំងក្នុងការចូលរួមទប់ស្កាត់់ ។
លោកបន្តទៀតថា បើមានបទល្មើសត្រូវតែធ្វើកិច្ចសហការគ្រប់ស្ថាប័នពាក់ព័ន្ធ នៅក្នុងតំបន់ប្រយុទ្ធ ទប់ស្កាត់ និងបង្ក្រាប ។ រាជរដ្ឋាភិបាលបានយកចិត្តទុកដាក់យ៉ាងខ្លាំង រួមគ្នាទ្រទ្រង់ ផ្តល់ហិរញ្ញប្បទានពីប្រទេសបារាំង ចាប់តាំងពីឆ្នាំ២០១០ មក និងបានអនុវត្តមានប្រសិទ្ធភាពខ្លាំងនៅប្រទេសកម្ពុជា ហើយបានលើកយកជាមេរៀនទៅបរទេសដើម្បីជាឧទាហរណ៍ ផ្សព្វផ្សាយនៅប្រទេសកំពុងអភិវឌ្ឍន៍នៅលើឆាកអន្តរជាតិផងដែរ ។
លោក សូរ ផន អនុរដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការសម្របសម្រួលអនុវត្តគម្រោង FSP Mekong បានមានប្រសាសន៍ថា គណៈកម្មាធិការកណ្តាល ប្រយុទ្ធប្រឆាំងផលិតផលក្លែងក្លាយដែលបង្កឱ្យគ្រោះថ្នាក់ខ្លាំងដល់សុខភាព និងសុវត្ថិភាពប្រជាពលរដ្ឋ ។ លោកបានថ្លែងអំណរគុណសាធារណរដ្ឋបារាំងដែលជួយគាំទ្រ ។ លោកបានផ្តល់អំពីលក្ខណៈវិនិច្ឆ័យរបស់ឱសថពិតប្រាកដតាមផ្លូវបច្ចេកទេសមាន៣យ៉ាង គឺទី១-ត្រូវធានាភាពពិតប្រាកដថា មិនមានគ្រោះថ្នាក់ដល់សុខភាព ទី២-ត្រូវមានគុណភាពល្អ គឺផ្សំដោយវត្ថុធាតុដើមត្រឹមត្រូវ តាមលក្ខណៈបច្ចេកទេស និងទទួលការត្រួតពិនិត្យពីក្រសួង ស្ថាប័នជំនាញរួចហើយ និងទី៣-ត្រូវមានប្រសិទ្ធភាពអាចព្យាបាលជំងឺដោយឱសថនោះមានសារធាតុសកម្មសមស្រប ។ ឱសថអាចលក់នៅលើទីផ្សារបាន លុះត្រាតែមានច្បាប់អនុញ្ញាតពីក្រសួងសុខាភិបាល និងស្ថាប័នមានសមត្ថកិច្ចរបស់រដ្ឋាភិបាលនៃប្រទេសផលិត ៕
ចែករំលែកព័តមាននេះ