ខេត្តតាកែវ ៖ បើទោះជាស្ថិតនៅតំបន់ជនបទដាច់ស្រយាលនិងឆ្ងាយពីទីប្រជុំជនយ៉ាងណាក្តី កម្លាំងសទ្ធានៃជំនឿទៅលើព្រះពុទ្ធសាសនា ត្រូវបានពុទ្ធបរិស័ទប្រកាន់ខ្ជាប់រហូតសាងសង់អាស្រមវិបស្សនាធុរៈ ស្ថិតនៅក្នុងភូមិព្រៃកប្បាស ឃុំព្រៃកប្បាស ស្រុកព្រៃកប្បាស ខេត្តតាកែវ សម្រាប់បព្វជិតខាងព្រះពុទ្ធសាសនាដែលមានបំណងចង់ស្វែងរកសេចក្តីសុខស្ងប់ និងកម្ចាត់នូវគ្រឿងសៅហ្មងទាំងឡាយក្នុងចិត្តឱ្យថយចុះ ។
ព្រះតេជគុណ អ៊ុយ វ៉ាន់ បានមានពុទ្ធដីកាឱ្យដឹងថា ទីដែលព្រះអង្គកំពុងតែគង់នៅនិងធ្វើភាវនានេះមានឈ្មោះថា អាស្រមវិបស្សនាធុរៈដែលស្ថិតនៅក្នុងភូមិព្រៃកប្បាស ហើយកាលដើមឡើយអាស្រមនេះពុំមានព្រះវិហារ ព្រះចេតិយ និងអគារផ្សេងទៀតធំនិងល្អ ដូចពេលនេះទេ គឺមានតែកន្លែងសម្រាប់ភាវនាធម៌សាងឡើងពីកូនឈើតូចៗនិងដំបូលប្រក់ស្លឹកត្នោត និងមិនសូវមានការចូលរួមពីព្រះសង្ឃ ឬអ្នកមកពីតំបន់ផ្សេងៗដូចពេលនេះទេ ។
ព្រះតេជគុណបន្តឱ្យដឹងទៀតថា តាមពិតអាយុកាលនៃការសាងសង់អាស្រមនេះ គឺចាប់តាំងពីឆ្នាំ១៩៨១ មកម៉្លេះ និងមានការផ្តួចផ្តើមកសាងដំបូងដោយព្រះគ្រូកង សំ ។ អាស្រមនេះមិនត្រឹមតែសម្រាប់ឱ្យបព្វជិតភាវនាធម៌នោះទេ តែថែមទាំងអនុញ្ញាតឱ្យពុទ្ធបរិស័ទមកប្រារព្ធពិធីបុណ្យទានផ្សេងៗតាមប្រពៃណីទំនៀមទម្លាប់របស់ព្រះពុទ្ធសាសនាផងដែរ ដូចជាបុណ្យភ្ជុំបិណ្ឌ បុណ្យកថិទាន បុណ្យផ្កា… រួមទាំងមានការអុជទៀនចាំព្រះវស្សារយៈេពល៣ខែដូច បណ្តាវត្តនានាដែរ ។
ព្រះតេជគុណក៏បានបញ្ជាក់បន្ថែមទៀតថា រដូវភាវនាធម៌ គឺមានតែរយៈពេល៧ថ្ងៃ គឺចាប់ពីថ្ងៃទី១៥ កើត ខែពិសាខ ជារៀងរាល់ឆ្នាំ មានបព្វជិត និងពុទ្ធបរិស័ទជាច្រើននិមន្ត និងអញ្ជើញមកពីបណ្តាទីជិតឆ្ងាយដូចជាខេត្តកំពង់ស្ពឺ កំពត កំពង់ធំ និងខេត្តផ្សេងៗទៀត ។ដោយឡែក លោកយាយ រុំ ជាដូនជីកំពុងស្នាក់នៅក្នុងអាស្រមវិបស្សនាធុរៈក៏បានបង្ហើបឱ្យដឹងដែរថា មូលហេតុដែលលោកយាយមកភាវនាធម៌នៅអាស្រមនេះ ព្រោះដោយសារតែចង់ស្វែងយល់អំពីបុណ្យនិងបាប ឬហៅម៉្យាងទៀតថា ស្វែងយល់អំពីឫសគល់នៃសេចក្តីបាប និងដើម្បីកាត់បន្ថយកិលេសទាំងឡាយ គឺក្នុងគោលបំណងកុំឱ្យកើតនៅទីដែលមិនសមគួរដូចជា នរក ប្រេត អសុរកាយ ជាដើម ។
យោងតាមប្រភពពីព្រះចៅអធិការវត្តមួយចំនួនដែលកំពុងតែគង់ចាំព្រះវស្សានៅវត្តនានា ជិតខាងអាស្រមវិបស្សនាធុរៈនេះ ក៏មានសង្ឃដីកាដែរថា នេះជារឿងមួយល្អ ព្រោះថា ការភាវនាតែងតែឱ្យមនុស្សយល់អំពីខ្លួនឯងនូវបុណ្យបាបដែលខ្លួនបានប្រព្រឹត្តកន្លងមក ហើយនៅពេលដែលមនុស្សដឹងថា ខ្លួនមានកំហុសគេនឹងកែខ្លួនលែងប្រព្រឹត្តនូវកំហុសនោះទៀត ហើយបើទោះជាការឈប់ប្រព្រឹត្តអំពើបាបនោះ មានលក្ខណៈតូចក្តីឱ្យតែលែងប្រព្រឹត្តគឺជាអំពើបុណ្យមួយ សម្រាប់ពួកគេសន្សំកុសលទៅបរលោក មនុស្សយើមិនអាចយកទ្រព្យទៅជាមួយបាននោះទេ ៕
ចែករំលែកព័តមាននេះ