រាជធានីភ្នំពេញ ៖ យុវជនម្នាក់ដែលស្រលាញ់នាងកម្មការិនីរោងចក្រកាត់ដេរម្នាក់យ៉ាងងុបងល់ និងព្យាយាមតាមប្រលោមសុំស្នេហ៍នាងអស់រយៈពេល៤ថ្ងៃកន្លងមកហើយ ប៉ុន្តែនាងមិនOKទេ ព្រោះនាងមានម្ចាស់បេះដូងរួចទៅហើយ ដែលជាហេតុធ្វើឱ្យយុវជនរូបនោះខូចចិត្តគិតផ្តេសផ្តាស ខណៈពេលដែលនាង និងសង្សាកំពុងដេកឱបគ្នាក្នុងបន្ទប់យុវជនខូចចិត្តរូបនោះក៏បានយកខ្សែលួសមួយសរសៃទៅរុំនិងចង្អុលដៃរបស់ខ្លួន រួចយកចុងលួសម្ខាងទៀតទៅដោតចូលព្រីចរន្តអគ្គិសនី ។ ឯដៃម្ខាងទៀតចាប់កាន់ជើងនាងកម្មការិនីរោងចក្រម្នាក់នោះជាប់ក្នុងបំណងឆក់ឱ្យស្លាប់ទាំង៣នាក់តែម្តង ។ ដោយសារគិតថា បើរូបគេយកនាងជាគួគាប់មិនបាន បុរសផ្សេងក៏មិនមានវាសនាដូចគ្នាដែរ។ ប៉ុន្តែអ្វីៗខុសពីការគិត សំណាងល្អអ្នកដេកនៅក្នុងបន្ទប់ជាមួយគ្នានោះដឹង បានជួយទាន់ ទើបនាងនិងសង្សារមិនស្លាប់ ឯយុវជននោះក៏ឆក់ស្លាប់បាត់បង់ជីវិតតែម្នាក់ឯងផុតទុក្ខទៅ។ ហេតុការណ៍នោះបានកើតឡើងកាលពីវេលាម៉ោង២និង៣០នាទីយប់រំលងអធ្រាត្រឈានចូលថ្ងៃទី៧ កញ្ញា នៅចំណុចបន្ទប់ផ្ទះជួលមួយកន្លែង ដែលមានទីតាំងស្ថិតនៅក្នុងភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ ។
យុវជនខូចចិត្តរូបនេះត្រូវបានគេស្គាល់ឈ្មោះ លឹម ថៃ អាយុ២២ឆ្នាំ ជាកម្មករសំណង់ ស្នាក់នៅផ្ទះជួលក្នុងភូមិកើតហេតុខាងលើនិងមានស្រុកកំណើតភូមិស្រែពោធិ៍ ឃុំចារ ស្រុកព្រៃកប្បាស ខេត្តតាកែវ ត្រូវស្លាប់បាត់បង់ជីវិតភ្លាមៗនៅនឹងកន្លែង ។ ចំណែកឯនាងកម្មការិនីដែលធ្វើឱ្យយុវជននោះខកស្នេហ៍ឈ្មោះ សៀក រ៉ែម ហៅពៅ ស្នាក់នៅបន្ទប់ផ្ទះជួលកើតហេតុខាងលើ និងមានស្រុកកំណើតភូមិប្រមូល ឃុំទ្រមែង ស្រុកឈូក ខេត្តកំពត ។ ដោយឡែកសង្សាររបស់នាងឈ្មោះ អីុវ វីរៈ អាយុ២១ឆ្នាំ ជាកម្មកររោងចក្រ មានស្រុកកំណើតភូមិថ្នល់កែង ឃុំគងជ័យ ស្រុកអូររាំងឪ ខេត្តកំពង់ចាម។ ពួកគេបានស្រលាញ់គ្នារស់នៅជាមួយគ្នាអស់រយៈពេលជាង៥ខែកន្លងមកហើយ ។
កម្មការិនីរោងចក្ររូបនោះបាននិយាយរៀបរាប់ថា នាងទើបបានស្គាល់យុវជនលឹម ថៃ រយៈពេល៤ថ្ងៃប៉ុណ្ណោះ ។ នាងបញ្ជាក់ថា គ្រាន់តែបានជួបស្គាល់គ្នាភ្លាម ក៏សុំស្រលាញ់នាងភ្លែតតែម្តង មិនតែប៉ុណ្ណោះនៅក្នុងរយៈពេល៤ថ្ងៃនេះគេបានព្យាយាមប្រលោមសុំស្នេហ៍ពីរូបនាងជាបន្តបន្ទាប់ ប៉ុន្តែត្រូវបាននាងបដិសេធមិនអាចស្រលាញ់នោះទេ ព្រោះនាងមានសង្សាររួចទៅហើយ ។ បន្ទាប់ពីនាងបដិសេធបែបនេះយុវជនរូបនោះចេះតែនិយាយថា បើគេយករូបនាងមិនបាននរណាក៏មិនអាចយកនាងបានដែរ ។ ប៉ុន្តែពាក្យសម្តីខាងលើមិនត្រូវបាននាងចាប់អារម្មណ៍នោះទេ និងបានគិតថារាប់អានយុវជននោះជាបងប្អូនប៉ុណ្ណោះមិនបានគិតអ្វីផ្សេងនោះឡើយ។
ប្រភពដដែលបានបន្តថា លុះដល់វេលាល្ងាចថ្ងៃទី៦ កញ្ញា មុនពេលកើតហេតុ យុវជនរូបនោះបានទៅបបួលនាងទៅចូលរួមកម្មវិធីសម្ពោធហាងមួយដែលគេអះអាងថាជាហាងបងរបស់គេ ។ ពេលនោះនាងក៏បានយល់ព្រមទៅជាមួយហើយបន្ទាប់ពីនៅទីនោះរហូតដល់យប់ទើបជូននាងត្រឡប់ទៅកាន់ផ្ទះជួលវិញ ។ ពេលទៅដល់ នាងនិងយុវជនរូបនោះព្រមទាំងមិត្តភក្តិប្រុសស្រីចំនួន៤នាក់ទៀតបានបង្កើតកម្មវិធីផឹកស៊ីដោយបានទិញស្រាបៀរមកផឹកជួបជុំគ្នាសប្បាយនៅក្នុងបន្ទប់ផ្ទះជួលនោះ ។ ខណៈនោះដែរនាងក៏បានទូរស័ព្ទហៅឈ្មោះ អីុវ វីរៈ ដែលជាសង្សារឱ្យទៅផឹកស៊ីជាមួយរហូតដល់វេលាម៉ោង៩យប់ទើបឈប់ ។ បន្ទាប់មកដោយសារដល់ពេលត្រូវដេកពួនហើយនោះ នាងបានឱ្យយុវជនលឹម ថៃ នោះត្រឡប់ទៅផ្ទះវិញដែរតែគេមិនព្រមទៅទាល់តែសោះ ។ មិនតែប៉ុណ្ណោះគេបានអង្វរសុំនាងដេកនៅក្នុងបន្ទប់នោះមួយយប់ ។ នាងក៏បានរំលឹកសំដីរបស់យុវជនខូចចិត្តនេះដែលនិយាយពេលនោះថា ខ្ញុំសុំដេកនៅទីនេះមួយយប់ ហើយចាប់ពីថ្ងៃស្អែកទៅ អ្នកទាំងអស់គ្នាលែងបានឃើញមុខខ្ញុំទៀតហើយ ។
ប្រភពដដែលបានបន្តថា ដោយសារតែជននោះអង្វរខ្លាំងពេកនាងក៏បានយល់ព្រមឱ្យដេក ហើយខណៈនោះមិត្តស្រីរបស់នាងម្នាក់ និងសង្សាររបស់គេបាននាំគ្នាចេញទៅដេកនៅផ្ទះសំណាក់មួយក្បែរនោះបាត់ទៅ នៅសល់រូបនាង ជាមួយសង្សាររបស់នាងនិងយុវជនរូបនោះ ព្រមទាំងមិត្តប្រុសៗ២នាក់ទៀត សរុបមានគ្នាទាំងអស់៥នាក់ បានដេកនៅក្នុងបន្ទប់តូចនោះជាមួយគ្នា។ ខណៈនោះនាងនិងសង្សារបានដេកឱបគ្នាយ៉ាងមានសេចក្តីសុខ មិននឹកស្មានថាយុវជននេះធ្វើអ្វីផ្តេសផ្តាសឡើយ ។ ក្រោយពីលង់លក់មិនដឹងខ្លួន ជននេះមិនដេកនោះទេទំនងឈឺចិត្តពេលឃើញនាងនិងសង្សារដេកកៀកកើយគ្នាក៏បានយកខ្សែលួសមួយសរសៃមករុំចង្អុលដៃខ្លួនឯងរួចហើយយកចុងខ្សែលួសម្ខាងទៀតទៅដោតចូលព្រីភ្លើង បន្ទាប់ពីយកដៃម្ខាងទៀតចាប់កាន់ជើងរបស់នាងជាប់ មិនតែប៉ុណ្ណោះមុននិងធ្វើបែបនេះគាត់បានយកទឹកចាក់ស្រោចលើឥដ្ឋការ៉ូឱ្យសើមទៀតផងពិតជាគ្រោះថ្នាក់ណាស់ ដើម្បីឱ្យឆក់ស្លាប់ទាំង៣នាក់ ។
ប្រភពដដែលបានបន្តទៀតថា ខណៈនោះចរន្តភ្លើងបានឆក់យុវជនលឹម ថៃ ព្រមទាំងនាងនិងសង្សារតែម្តង ហើយនាងមិនអាចរើរួចនោះទេ និងនឹកស្មានថាត្រូវស្លាប់ទៅហើយ ប៉ុន្តែភ្លាមៗនោះសង្សាររបស់នាងភ្ញាក់បានស្រែកឱ្យគេជួយខ្លាំងៗបង្កឱ្យមានការភ្ញាក់ផ្អើលពេញក្នុងបន្ទប់ទាំងយប់ ហើយមិត្តភក្តិប្រុសម្នាក់ទៀតបានរត់ស្ទុះទៅចាប់ដកខ្សែលួសចេញពីព្រីភ្លើងទាន់ពេល ។ មិនតែប៉ុណ្ណោះមិត្តភក្តិម្នាក់នោះក៏ត្រូវបានភ្លើងឆក់ដួលដែរ តែសំណាងល្អខ្សែលួសបានរបូតចេញពីព្រីទើបផ្តាច់ចរន្តអគ្គិសនី ធ្វើឱ្យពួកគេ៣នាក់រួមមានសង្សាររបស់នាង និងមិត្តភក្តិមិនស្លាប់ទេ ។ ឯយុវជនខូចចិត្តបានស្លាប់បាត់បង់ជីវិតនៅនឹងកន្លែង ។
សមត្ថកិច្ចបាននិយាយថា នេះអាចនិយាយបានថាគឺជារឿងតាមសុំសេ្នហ៍សង្សារគេ ដែលប្រុស២នាក់ស្រលាញ់ស្រីម្នាក់ ហើយមានម្នាក់បានសម្រេចដូចបំណង ឯម្នាក់ទៀតមិនបានសម្រេចក៏មានគំនិតអាត្មានិយមមួយ និងបានគិតថាបើខ្លួនមិនបាននាងក៏មិនចង់ឱ្យនាងបានទៅលើអ្នកផ្សេងដែរ ។ ជាងនេះទៅទៀតនៅពេលឃើញនាងដេកឱបគ្នាជាមួយសង្សារទៀតនោះ ទើបធ្វើឱ្យគេឈឺចិត្តរួចក៏មានបំណងបញ្ចប់ជីវិតទាំងអស់គ្នា ប៉ុន្តែទីបំផុតបែរជាស្លាប់ខ្លួនឯងទៅវិញ ។ មិនតែប៉ុណ្ណោះក្រោយពេលកើតហេតុក្រុមគ្រួសារខាងយុវជន លឹម ថៃ នោះបានចោទប្រកាន់ថា នាងសៀក រ៉ែម ហៅពៅ និងសង្សារព្រមទាំងមិត្តភក្តិចាប់ចងជននោះឆក់ខ្សែភ្លើងសម្លាប់ ប៉ុន្តែការចោទប្រកាន់ខាងលើត្រូវបានបដិសេធថានាងមិនមានគំនិតបែបនេះទេ ហើយនាងក៏ជាជនរងគ្រោះដែរត្រូវចរន្តភ្លើងឆក់ស្ទើរស្លាប់ខ្លួនទៀតផង ។ មិនតែប៉ុណ្ណោះយុវជនលឹម ថៃ ប៉ុនប៉ងធ្វើឃាតនាង និងសង្សារមិនបានសម្រេចទៅវិញទេ ។ ប៉ូលិសបានបន្តថា បន្ទាប់ពីមានរឿងរ៉ាវបែបនេះនាងកម្មការិនី និងសង្សារព្រមទាំងមិត្តភក្តិត្រូវបាននាំខ្លួនទៅកាន់ប៉ុស្តិ៍ដើម្បីធ្វើការសាកសួរហើយនៅមិនទាន់ដឹងថា តើពួកគេមានការពាក់ព័ន្ធកម្រិតណានៅឡើយទេ ៕
ចែករំលែកព័តមាននេះ