AFPផ្សាយថា សមាជិកសភាកូរ៉េខាងត្បូងចំនួន២០រូប ស្នើឱ្យរដ្ឋាភិបាលចេញច្បាប់កាត់លិង្គអ្នកប្រព្រឹត្តខុសលើរឿងក្តីផ្លូវភេទច្រំដែល កាលពីថ្ងៃទី៥ កញ្ញា ក្រោយពីកើតមានបទឧក្រិដ្ឋផ្នែកផ្លូវភេទបន្តបន្ទាប់គ្នាជាច្រើនលើកបង្កឱ្យជនជាតិកូរ៉េខាងត្បូងខឹងយ៉ាងខ្លាំង ។ប្រសិនបើសេចក្តីព្រាងច្បាប់នេះចូលជាធរមាន តុលាការអាចចេញសាលក្រមដាក់ទោសដោយកាត់អវយវៈភេទអ្នកប្រព្រឹត្តខុសលើរឿងក្តីផ្លូវភេទសម្រាប់ជាការព្រមាន ឬចាក់សារធាតុគីមីដើម្បីបំបាត់អារម្មណ៍ចំណង់ផ្លូវភេទ ។
កាលពីឆ្នាំ២០១០ សភាកូរ៉េខាងត្បូងបានចេញច្បាប់«ក្រៀវក្នុងលក្ខណៈផ្នែកគីមី» ទៅលើឧក្រិដ្ឋជនដែលបង្ករឿងក្តីផ្លូវភេទដល់យុវវ័យអាយុក្រោម១៦ឆ្នាំជាច្រើនលើក ។ កាលពីខែឧសភាកូរ៉េខាងត្បូងបានចាប់ផ្តើមប្រើវិធីសាស្ត្រចាក់សារធាតុគីមី ដើម្បីសម្រាលកម្រិតអ័រមូនលើបុរសអាយុ៤៥ឆ្នាំម្នាក់ ដែលទទួលទោសជាប់ពន្ធនាគាររយៈពេល១០ឆ្នាំពីបទចាប់រំលោភក្មេងស្រីអាយុ១០ឆ្នាំ ។
ទោះជាយ៉ាងណាក៏ដោយស្ត្រីវេជ្ជបណ្ឌិតប៉ាក អីុនស៊ុក ជាបេក្ខភាពម្នាក់ក្នុងចំណោមសមាជិកសភាទាំង២០រូប ដែលស្នើសេចក្តីព្រាងច្បាប់ កាត់អវយវៈភេទបានគូសបញ្ជាក់ថា ការចាក់សារធាតុគីមីទទួលលទ្ធផលល្អជាបណ្តោះអាសន្ន និងជនជាប់ចោទអាចនឹងវិលទៅរកតម្រូវការផ្លូវភេទជាថ្មីដូចដើម ប្រសិនបើឈប់ដំណើរការចាក់គីមីបន្ត ។
លោកស្រីវេជ្ជបណ្ឌិតប៉ាកបានផ្តល់បទសម្ភាសន៍ឱ្យសារព័ត៌មានថា «យើងត្រូវប្រើវិធីសាស្ត្រដាច់ខាតជាងនេះដូចជាការក្រៀវ ដើម្បីការពារមិនឱ្យពួកគេប្រព្រឹត្តខុសបន្តទៀត» ។ ចំណែកលោកប៉ាក ជុងវុន ជំនួយការរបស់ស្ត្រីវេជ្ជបណ្ឌិតប៉ាកបានអត្ថាធិប្បាយថា សេចក្តីព្រាងច្បាប់នោះនឹងត្រូវឆ្លងកាត់ការយល់ស្របពីគណៈកម្មការរដ្ឋសភាជាច្រើនដំណាក់ នៅមុនពេលផ្តល់ការអនុម័តជាចុងក្រោយនៅក្នុងកិច្ចប្រជុំសភាដោយគេជឿថា«នឹងអាចឆ្លងយោបល់ខ្ពស់»ក្នុងការទទួលការគាំទ្រពីសមាជិកសភាសំលេងភាគច្រើន ។
រដ្ឋាភិបាលក្រុងសេអ៊ូល កំពុងតែប្រឈមមុខនឹងគំនាបសង្គមឱ្យចេញច្បាប់ទប់ស្កាត់បទឧក្រិដ្ឋផ្នែកផ្លូវភេទ ក្រោយពីកើតមានរឿងក្តីដ៏រំជើបរំជួលជាច្រើនករណីក្នុងអំឡុងពេលកន្លងទៅ ។ កាលពីខែមុនលោកប្រធានាធិបតីលីម្យុងបាក់ក្នុងនាមជាអ្នកដឹកនាំរដ្ឋាភិបាលបានថ្លែងសុំទោសដល់ប្រជាជន ក្រោយពីកើតមានករណីក្មេងស្រីអាយុ៧ឆ្នាំម្នាក់ ត្រូវចាប់យកចេញពីផ្ទះ និងចាប់រំលោភគួរឱ្យរន្ធត់ ប៉ុន្តែប៉ូលិសអាចចាប់ខ្លួនជនល្មើសអាយុជាង២០ឆ្នាំបាន ។
កាលពីខែសីហា កន្លងមកក៏មានកើតករណីដូចគ្នានេះដោយបុរសម្នាក់បានបង្ករឿងក្តីផ្លូវភេទរហូតត្រូវអាជ្ញាធរភ្ជាប់ឧបករណ៍តាមដាននៅជាប់នឹងខ្លួន បានព្យាយាមចាប់រំលោភស្ត្រីម្នាក់នៅក្នុងរង្គសាលមួយ នៅមុនពេលបង្កហេតុចាក់បុរសម្នាក់រហូតស្លាប់ និងធ្វើឱ្យមនុស្ស៤នាក់ទៀតរងរបួស ៕
ចែករំលែកព័តមាននេះ