ខេត្តកំពង់ធំ ៖ ក្នុងការប្រជុំផ្សព្វផ្សាយផែនការលេខ០៦៨ របស់ក្រសួងមហាផ្ទៃកាលពីព្រឹកថ្ងៃទី៦ កញ្ញា ២០១២ នៅស្នងការដ្ឋាននគរបាលខេត្តលោកឧត្តមសេនីយ៍ត្រី ផាន់ សុផេង ស្នងការនគរបាលខេត្ត បានបញ្ជាឱ្យកម្លាំងជំនាញ និងអធិការនគរបាលស្រុកបារាយណ៍ កំណត់មុខសញ្ញាសង្ស័យករណីប្លន់ប្រដាប់អាវុធ និងបាញ់សម្លាប់ឱ្យបានក្នុងរយៈពេល៦ថ្ងៃទៅ១សប្តាហ៍ បើពុំនោះទេ ក្នុងករណី៣លើកដែលកំណត់មុខសញ្ញាមិនបានអធិការ ឬអធិការរងទទួលបន្ទុកស្រុកនោះ និងត្រូវផ្លាស់ប្តូរកន្លែងថ្មី ។ ការព្រមានខ្លាំងៗនៅចំពោះមុខដូច្នេះត្រូវបានធ្វើឡើងបន្ទាប់ពីមានអំពើប្លន់ប្រដាប់អាវុធ និងបាញ់សម្លាប់១លើកដែលបានកើតឡើងកាលពីយប់ថ្ងៃទី៣ កញ្ញា ២០១២ នៅចំណុចភូមិអណ្តោត ឃុំបាក់ស្នា ស្រុកបារាយណ៍ ខេត្តកំពង់ធំ ។
លោកឧត្តមសេនីយ៍ត្រី បានសង្កត់ធ្ងន់ថា នេះជាករណីប្លន់លើកទី២ ហើយសម្រាប់ស្រុកបារាយណ៍ ដែលករណីទី១ រហូតមកដល់ពេលនេះយូរឆ្នាំហើយទាំងកម្លាំងជំនាញ និងអធិការនគរបាលស្រុកបារាយណ៍ នៅមិនទាន់កំណត់មុខសញ្ញាសង្ស័យឱ្យលោកបានឡើយ ដោយរូបភាពស្រដៀងគ្នានេះទៀត និងមិនប៉ុន្មានឆ្នាំផង គឺបានកើតឡើងម្តងទៀតកាលពីយប់ថ្ងៃទី៣ កញ្ញា ២០១២ ។ ដូច្នេះអាចសន្និដ្ឋានបានថា ករណីនេះមុខសញ្ញា គឺពិតជាមានការទាក់ទងគ្នា ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ