រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់ស្ថានទូតអាមេរិកចុះថ្ងៃទី៦ កញ្ញា ២០១២ ឱ្យដឹងថា ទីភ្នាក់ងារ Peace Corps ប្រចាំនៅកម្ពុជា នឹងស្វាគមន៍អ្នកស្ម័គ្រចិត្តក្រុមទី៦ របស់ខ្លួននៅថ្ងៃទី៧ កញ្ញា ២០១២ វេលាម៉ោង១រសៀលនៅមជ្ឈមណ្ឌលគរុកោសល្យភូមិភាគ (ផ្លូវជាតិលេខ២) ក្នុងខេត្តតាកែវ ។ លោក ស្រី បេន អភិបាលខេត្តតាកែវ និងលោកស្រី Penny Fields នាយកទីភ្នាក់ងារ Peace Corps ប្រចាំនៅកម្ពុជា នឹងធ្វើជាអធិបតីក្នុងពិធីសច្ចាប្រណិធាននេះ ដើម្បីស្វាគមន៍អ្នកស្ម័គ្រចិត្តជនជាតិអាមេរិកថ្មីចំនួន៥៨នាក់ ។
អ្នកស្ម័គ្រចិត្តរបស់ទីភ្នាក់ងារ Peace Corps នៅកម្ពុជា រស់នៅ និងធ្វើការនៅតាមសហគមន៍ជនបទ ដោយបង្រៀនភាសាអង់គ្លេស និងជំរុញសុខភាពសាធារណៈ ។ អ្នកស្ម័គ្រចិត្តទាំងនោះក៏ធ្វើការផងដែរ ជាមួយសមភាគីកម្ពុជារបស់គេ ក្នុងគម្រោងនានាក្នុងសហគមន៍ទាក់ទងនឹងការអប់រំបរិស្ថាន ការការពារហិង្សាក្នុងគ្រួសារការអភិវឌ្ឍមុខជំនួញខ្នាតតូច និងកសាងជំនាញស្តីពីភាពជាអ្នកដឹកនាំសម្រាប់កុមារី ។ ជាមួយនឹងក្រុមអ្នកស្ម័គ្រចិត្តថ្មីនេះ ទីភ្នាក់ងារ Peace Corps នៅពេលនេះ មានអ្នកស្ម័គ្រចិត្តសរុបចំនួន២៨៥នាក់ កំពុងរស់នៅតាមបណ្តាខេត្តចំនួន១៥ ក្នុងប្រទេសកម្ពុជា តាំងពីឆ្នាំ ២០០៦ មក ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ