ខេត្តកណ្តាល ៖ បុរសម្នាក់ត្រូវប៉ូលិសក្រុងតាខ្មៅ ចាប់ខ្លួនពីបទបង្ខាំងមនុស្សខុសច្បាប់កាលពីវេលាម៉ោង១២ និង៣០នាទីរំលងអធ្រាត្រឈានចូលថ្ងៃទី៦ កញ្ញា នៅភូមិព្រែកសំរោង សង្កាត់តាខ្មៅ ក្រុងតាខ្មៅ បន្ទាប់ពីបុរសនេះបានយកសោមកចាក់បិទទ្វារបន្ទប់ជួលពីខាងក្រៅដើម្បីបង្ខាំងសង្សាររបស់ខ្លួនកក្នុងចេតនាកុំឱ្យនាងចេញទៅជួបប្រុសផ្សេង ប៉ុន្តែចំពេលនាងមិននៅគឺនៅតែម្តាយ និងប្អូនៗ ក៏ផ្អើលឆោឡោឡើង ហើយប្តឹងប៉ូលិសឱ្យចាប់ខ្លួនតែម្តង ។
មន្ត្រីប៉ូលិសបានឱ្យដឹងថា បុរសដែលត្រូវបានចាប់ខ្លួនពីបទបង្ខាំងមនុស្សខុសច្បាប់នេះ ឈ្មោះឈុត ណយ អាយុ២៥ឆ្នាំ ស្នាក់នៅក្នុងក្រុមហ៊ុន SUNPRO TECTOIN បុរីពិភពថ្មី សង្កាត់ដង្កោ ខណ្ឌពោធិ៍សែនជ័យ ជាសន្តិសុខ មានស្រុកកំណើតភូមិយាយឡ ឃុំត្រាំកក់ ស្រុកត្រាំកក់ ខេត្តតាកែវ។ ចំណែកដើមបណ្តឹងឈ្មោះវង្ស សូរ ភេទស្រី អាយុ៦០ឆ្នាំ ស្នាក់នៅផ្ទះជួលភូមិព្រែកសំរោង សង្កាត់តាខ្មៅ ក្រុងតាខ្មៅ ។ មន្ត្រីប៉ូលិសបានឱ្យដឹងទៀតថា មុនពេលកើតហេតុ បុរសឈ្មោះឈុត ណយ បានជិះកង់មកពីកន្លែងយាមនៅផ្លូវលេខ២៧១ ជិតវត្តដំបូកខ្ពស់ រាជធានីភ្នំពេញ ដោយមានមេសោ និងកូនសោមកជាមួយផង បំណងមកចាក់សោបន្ទប់ផ្ទះជួលសង្សាររបស់ខ្លួន ឈ្មោះឌិន រ៉ា អាយុ២៥ឆ្នាំ នៅភូមិព្រែកសំរោង សង្កាត់តាខ្មៅ ក្រុងតាខ្មៅ ដើម្បីកុំឱ្យនាងចេញទៅជួបប្រុសផ្សេង បម្រើការងារនៅហាងសុភក្ត្រា ។ នាងឌិន រ៉ា ជាកូនរបស់ដើមបណ្តឹងឈ្មោះវង្ស សូរ ។
នៅពេលម្តាយ និងប្អូនៗកំពុងសម្រាកក្នុងបន្ទប់ ហើយនាងជាសង្សារមិនទាន់មកផ្ទះនៅវេលាម៉ោង១២ និង៣០នាទីរំលងអធ្រាត្រឈានចូលថ្ងៃទី៦ កញ្ញា ស្រាប់តែជនសង្ស័យបានយកមេសោទៅចាក់ទ្វារជាប់ពីខាងក្រៅ។ ពេលនោះស្ត្រីឈ្មោះវង្ស សូរ បានឮសំឡេងក៏បើកបង្អួចមើលឃើញ ទើបស្រែកឆោឡោឡើង ព្រោះស្មានតែចោរមានបំណងលួចគាស់ផ្ទះ ដឹងអីជាចោរលួចបេះដូងកូនស្រីសោះ ។ គ្រានោះជនសង្ស័យក៏រត់គេចខ្លួនបាត់ទៅ ហើយក៏មានការប្តឹងប៉ូលិសឱ្យមកអន្តរាគមន៍ និងនាំគ្នាអារមេសោផ្តាច់ ។ បន្តិចក្រោយមកនាងឌិន រ៉ា មកដល់បានប្រើល្បិចទូរស័ព្ទហៅជនសង្ស័យឱ្យមកជួបនៅផ្ទះ លុះពេលមកដល់ក៏ត្រូវប៉ូលិសចាប់ខ្លួនតែម្តង ។
ក្រោយពេលចាប់ខ្លួន ជនសង្ស័យបានសារភាពថា ខ្លួនបានស្គាល់នាងឌិន រា៉ កាលពីចូលឆ្នាំខ្មែរ កន្លងមក ហើយក្លាយជាសង្សារនឹងគ្នា តែមួយរយៈនេះនាងបានបែកចិត្តពីគេទើបនៅយប់កើតហេតុខ្លួនជិះកង់ពីភ្នំពេញមកក្រុងតាខ្មៅបំណងចាក់សោបន្ទប់ជួលរបស់នាងពីក្រៅកុំឱ្យនាងចេញដើរលេងពេលយប់ជួបប្រុសផ្សេង គឺដោយសារតែខ្លួនប្រចណ្ឌខ្លាំងពេក ។ ជនសង្ស័យ ត្រូវប៉ូលិសកសាងសំណុំរឿងពីបទបង្ខាំងមនុស្សខុសច្បាប់ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ