ខេត្តបន្ទាយមានជ័យ ៖ កាលពីថ្ងៃទី៤ កញ្ញា នៅសាលប្រជុំសាលាខេត្ត បានបើកកិច្ចប្រជុំការងារគ្រប់គ្រងដីរដ្ឋ និងកំណត់តំបន់ដីដែលប្រជាពលរដ្ឋកាន់កាប់ និងបង្កបង្កើនផលនៅក្នុងខេត្ត ។លោកលី សារី ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តបានរាយការណ៍ថា ដោយយោងតាមផែនការសកម្មភាពអនុវត្តគោលនយោបាយចាស់សកម្មភាពថ្មីលើវិស័យដីធ្លី មន្ត្រីមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្ត សហការជាមួយក្រុមយុវជនស្ម័គ្រចិត្តសម្តេចតេជោ ដែលកំពុងអនុវត្តការវាស់វែងដីធ្លីជូនប្រជាពលរដ្ឋ និងកំណត់ការងារគ្រប់គ្រងដីរដ្ឋ និងតំបន់ដីដែលប្រជាពលរដ្ឋកាន់កាប់ និងបង្កបង្កើនផលលើតំបន់ព្រៃលិចទឹក គម្រោងព្រៃឈើ ដែនជម្រកសត្វព្រៃ សម្បទានដីសង្គមកិច្ច តំបន់ការពារទេសភាព ដែលត្រូវបានដោះស្រាយបញ្ចប់ និងកំពុងដោះស្រាយមាន៧ស្រុក និងក្រុង១ សរុបផ្ទៃដី៨០.៥១៧ហិកតា សម្រាប់ប្រជាពលរដ្ឋចំនួន២៥.១៨២គ្រួសារ ។
លោកអ៊ុង អឿន អភិបាលខេត្ត បានថ្លែងអំណរគុណមន្ត្រីជំនាញ ក៏ដូចជាក្រុមយុវជនស្ម័គ្រចិត្តសម្តេចតេជោ ដែលកំពុងដំណើរការវាស់វែងដីធ្លីជូនប្រជាពលរដ្ឋនៅខេត្តបន្ទាយមានជ័យ ។ លោកបន្តថា ការងារគ្រប់គ្រងដីរដ្ឋ និងកំណត់តំបន់ដីដែលប្រជាពលរដ្ឋកាន់កាប់ និងបង្កបង្កើនផលត្រូវបានដោះស្រាយទូទាំងខេត្ត ។ជាក់ស្តែងនៅខេត្តបន្ទាយមានជ័យ រាជរដ្ឋាភិបាលបានសម្រេចកាត់ចេញពីកិច្ចសន្យាសម្បទានដីេសដ្ឋកិច្ចក្រុមហ៊ុនជាតិអភិវឌ្ឍន៍ខូអិលធីឌី ដើម្បីធ្វើប្រទានកម្មដីចំនួន២.៨៨៦ហិកតា ជូនប្រជាពលរដ្ឋចំនួន៨៦៧គ្រួសារ ដែលបានកាន់កាប់ និងដាំដុះ ជាក់ស្តែងនៅស្រុកថ្មពួក ក្នុងចំណោមផ្ទៃដី៨០.៥១៧ហិកតា និងមានប្រជាពលរដ្ឋចំនួន២៥.១៨២គ្រួសារ ៕
ចែករំលែកព័តមាននេះ