រាជធានីភ្នំពេញ ៖ គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.) បានបើកកិច្ចប្រជុំលើកទី៧នៅសាលប្រជុំទីស្តីការក្រសួងមហាផ្ទៃកាលពីព្រឹកថ្ងៃទី៦ កញ្ញា ក្រោមអធិបតីភាពលោកឧបនាយករដ្ឋមន្រ្តី ស ខេង រដ្ឋមន្រ្តីក្រសួងមហាផ្ទៃ និងជាប្រធាន គ.ជ.អ.ប និងលោកឧបនាយករដ្ឋមន្ត្រី គាត ឈន់ រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ។
រាជធានីភ្នំពេញ ៖ គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.) បានបើកកិច្ចប្រជុំលើកទី៧នៅសាលប្រជុំទីស្តីការក្រសួងមហាផ្ទៃកាលពីព្រឹកថ្ងៃទី៦ កញ្ញា ក្រោមអធិបតីភាពលោកឧបនាយករដ្ឋមន្រ្តី ស ខេង រដ្ឋមន្រ្តីក្រសួងមហាផ្ទៃ និងជាប្រធាន គ.ជ.អ.ប និងលោកឧបនាយករដ្ឋមន្ត្រី គាត ឈន់ រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ។
លោកឧបនាយករដ្ឋមន្រ្តី ស ខេង បានថ្លែងក្នុងពិធីបើកកិច្ចប្រជុំថា ជារួមអាចវាយតម្លៃបានថាសកម្មភាព និងសមិទ្ធផលដែលសម្រេចបាននៅក្នុង៨ខែដើមឆ្នាំ២០១២នេះ គឺជាវឌ្ឍនភាពដ៏សំខាន់មួយបន្ថែមទៀតក្នុងការជំរុញឲ្យដំណើរការកំណែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិអាចបោះជំហានទៅមុខស្របតាមទស្សនវិស័យនៃគោលនយោបាយយុទ្ធសាស្ត្រ និងគោលការណ៍នានាដែលបានកំណត់នៅក្នុងក្របខណ្ឌយុទ្ធសាស្រ្តស្តីពីកំណែទម្រង់វិមជ្ឈការ និងវិសហមជ្ឈការ ច្បាប់រៀបចំអង្គការ និងកម្មវិធីជាតិរយៈពេល១០ឆ្នាំ ។
ក្នុងរបៀបវារៈនៃកិច្ចប្រជុំនេះលេខាធិការដ្ឋាន គ.ជ.អ.ប រាយការណ៍អំពីវឌ្ឍនភាព និងបញ្ហាប្រឈមនៃកិច្ចដំណើរការកំណែទម្រង់នៅក្នុងឆមាសទី១នៃឆ្នាំ២០១២នេះ ។ ទន្ទឹមនឹងការសម្រេចបាននូវវឌ្ឍនភាពគួរជាទីមោទនៈនេះក៏នៅមានបញ្ហាប្រឈមជាច្រើនដែលត្រូវផ្តោតការយកចិត្តទុកដាក់ដោះស្រាយដើម្បីជំរុញឲ្យកិច្ចដំណើរការកំណែទម្រង់សម្រេចបាននូវគោលដៅរយៈពេលវែងដែលបានកំណត់នៅក្នុងច្បាប់រៀបចំអង្គការ និងកម្មវិធីជាតិ ។ ចាប់ពីដើមឆ្នាំ២០១១មកយើងបានខិតខំប្រឹងប្រែងយ៉ាងខ្លាំងដើម្បីជំរុញដល់ការរៀបចំនូវអនុក្រឹត្យស្តីពីការរៀបចំ និងការប្រព្រឹត្តទៅនៃមូលនិធិក្រុង- ស្រុក រហូតទទួលបាននូវការអនុម័តដោយរាជរដ្ឋាភិបាលកាលពីខែមីនា ឆ្នាំ២០១២នេះ ។ ទោះជាយា៉ង នេះក្តីក៏មូលនិធិក្រុង-ស្រុកនេះនៅពុំទាន់ត្រូវបានដាក់ឲ្យប្រតិបត្តិការបានពេញលេញនៅឡើយ អាស្រ័យដោយភាពយឺតយា៉វនៃការដាក់ចេញនូវលិខិតបទដ្ឋានគតិយុត្តចាំបាច់មួយចំនួនទៀត ។
ដើម្បីធានាដល់ការចាប់ផ្តើមកិច្ចដំណើរការផ្ទេរមុខងារ និងធនធានឲ្យទៅដល់រដ្ឋបាលថ្នាក់ក្រោមជាតិប្រកបដោយភាពរលូន និងស្របតាមស្មារតីនៃអនុក្រឹត្យ លេខាធិការដ្ឋាន គ.ជ.អ.ប បានរៀបចំសេចក្តីព្រាងគោលការណ៍ណែនាំស្តីពីការរៀបចំបញ្ជីវិភាគមុខងារដោយមានការចូលរួមពិនិត្យនិងការផ្តល់យោបល់ពីក្រុមការងារបច្ចេកទេសរបស់ក្រសួង ស្ថាប័ននានាជាច្រើនលើកច្រើនសាសម្រាប់ផ្តល់ការណែនាំដល់ក្រសួង ស្ថាប័ន និងអង្គភាពពាក់ព័ន្ធក្នុងការរៀបចំបញ្ចប់នូវកិច្ចការនេះនៅឆមាសទី២ឆ្នាំ២០១២ដើម្បីធានាឲ្យមានការឯកភាពគ្នាក្នុងការពិនិត្យ និងការកំណត់នូវការផ្ទេរមុខងារ និងធនធានក្នុងកម្រិតសមស្របណាមួយពីក្រសួង ស្ថាប័នដែលស្ថិតក្នុងវិស័យអាទិភាពទៅឲ្យដល់រដ្ឋបាលថ្នាក់ក្រោមជាតិចាប់ពីដើមឆ្នាំ២០១២តទៅ ។
មកទល់ពេលនេះមានក្រសួងចំនួន៥ដែលស្ថិតក្នុងវិស័យអាទិភាព គឺក្រសួងអប់រំ យុវជន និងកីឡា ក្រសួងសុខាភិបាល ក្រសួងកសិកម្មរុក្ខាប្រមាញ់ និងនេសាទ ក្រសួងអភិវឌ្ឍន៍ជនបទ និងក្រសួងសង្គមកិច្ច អតីតយុទ្ធជន និងយុវនីតិសម្បទាបាននិងកំពុងរៀបចំជាបណ្តើរៗនូវបញ្ជីវិភាគមុខងាររបស់ខ្លួនស្ទើររួចរាល់ហើយ។ក្នុងនាមគ.ជ.អ.ប និងក្នុងនាមលោកផ្ទាល់សូមកោតសរសើរនូវឆន្ទៈនិងការខិតខំប្រឹងប្រែងរបស់ក្រសួងទាំង៥នេះក្នុងការជំរុញកិច្ចការដ៏មានសារសំខាន់នេះ ។ ទន្ទឹមនេះលោកក៏សូមផ្តល់ការលើកទឹកចិត្តដល់ក្រសួង ស្ថាប័នពាក់ព័ន្ធនានាផ្សេងទៀតក្នុងការផ្តោតការយកចិត្តទុកដាក់លើការចាប់ផ្តើម និងជំរុញដល់ការរៀបចំកិច្ចដំណើរការផ្ទេរមុខងារនិងធនធាននៅក្នុងក្រសួង ស្ថាប័នរបស់ខ្លួនបន្ទាប់ពីគោលការណ៍ណែនាំស្តីពីរៀបចំបញ្ជីវិភាគមុខងារនេះត្រូវបានអនុម័តដោយកិច្ចប្រជុំរបស់យើងនាពេលនេះ ។
លោកឧបនាយករដ្ឋមន្រ្តី ស ខេង សង្ឃឹមថា បញ្ហាប្រឈមជាគន្លឹះមួយចំនួនខាងលើនេះនឹងអាចដោះស្រាយបានមួយផ្នែកធំតាមរយៈកិច្ចប្រជុំលើកទី៧នេះដោយសារកិច្ចប្រជុំនេះផ្តោតទៅលើរបៀបវារៈ ១-ការពិនិត្យនិងអនុម័តលើកំណត់ហេតុនៃកិច្ចប្រជុំលើកទី៦របស់គ.ជ.អ.ប ។២-ការពិភាក្សាលើសេចក្តីព្រាងអនុក្រឹត្យស្តីពីប្រព័ន្ធគ្រប់គ្រងហិរញ្ញវត្ថុក្រុង-ស្រុក របាយការណ៍វឌ្ឍនភាពនៃការរៀបចំលិខិតបទដ្ឋានផ្សេងៗពាក់ព័ន្ធនឹងការអនុវត្តមូលនិធិក្រុង-ស្រុកនិងរបាយការណ៍ស្តីពីការវិភាជន៍មូលនិធិក្រុង-ស្រុកសម្រាប់ឆ្នាំ២០១៣ ។
៣-ការពិភាក្សានិងអនុម័តលើសេចក្តីព្រាងសេចក្តីណែនាំស្តីពីការរៀបចំបញ្ជីវិភាគមុខងាររបស់ក្រសួង ស្ថាប័ន មន្ទីរ អង្គភាពនានា និងអាជ្ញាធរគ្រប់លំដាប់ថ្នាក់ ។
៤-របាយការណ៍ប្រចាំឆមាសទី១ស្តីពីការអនុវត្តផែនការសកម្មភាព និងថវិការរបស់គ.ជ.អ.បឆ្នាំ២០១២ ។
៥-បញ្ហាផ្សេងៗរួមមានការងារបញ្ជ្រាបយេនឌ័រ និងការលើកកំពស់ភាពអង់អាចរបស់ស្ត្រី ៕
ចែករំលែកព័តមាននេះ