ខេត្តបាត់ដំបង ៖ សំណុំរឿងឈ្មួញរកស៊ី ឈើគ្រញូង ដែលគេសង្ស័យថា ជាកម្លាំងប្រដាប់អាវុធ និងបានបា.ញ់សម្លា.ប់អ្នកកា.ប់ឈើគ្រញូងលក់នៅក្បែរតំបន់ព្រំដែនខ្មែរ-សៀមចំណុច«ពាមតា»ក្នុងភូមិសាស្រ្តឃុំតាតោក ស្រុកសំឡូតនោះ កំពុងរំជើបរំជួលខ្លាំងនៅ
ខេត្តបាត់ដំបង ៖ សំណុំរឿងឈ្មួញរកស៊ី ឈើគ្រញូង ដែលគេសង្ស័យថា ជាកម្លាំងប្រដាប់អាវុធ និងបានបាញ់សម្លាប់អ្នកកាប់ឈើគ្រញូងលក់នៅក្បែរតំបន់ព្រំដែនខ្មែរ-សៀមចំណុច«ពាមតា»ក្នុងភូមិសាស្រ្តឃុំតាតោក ស្រុកសំឡូតនោះ កំពុងរំជើបរំជួលខ្លាំងនៅពេលនេះ ក្រោយពីបែកធ្លាយជុំវិញការសម្លាប់គ្នាដ៏សាហាវនោះ ។
តាមប្រភពព័ត៌មានបានផ្ដល់បន្ថែមនៅព្រឹកថ្ងៃទី៦ កញ្ញា ថា ពេលនេះនៅតំបន់កើតហេតុកំពុងស្ថិតក្នុងស្ថានភាពគ្រោះថ្នាក់បំផុត សម្រាប់កម្លាំងសមត្ថកិច្ចដែលប៉ុនប៉ងចូលទៅពិនិត្យផ្នូរសព និងកន្លែងបាញ់សម្លាប់មនុស្សដ៏ព្រៃផ្សៃខាង លើ ដោយហេតុថា ជនប្រដាប់អាវុធមួយក្រុមដែលកំពុងការពារក្រុមអ្នករកស៊ីបទល្មើសព្រៃឈើនៅតំបន់នោះ ក៏មានមន្រ្តីយោធាថ្នាក់ឧត្តមសេនីយ៍នៅពីក្រោយផង បានរៀបចំផែនការទប់ទល់តាមរយៈការបង្កប់គ្រាប់មីន និងបង្កៃគ្រាប់បែកតាមច្រកចូលសំខាន់ៗពាសពេញព្រៃ ។
ប្រភពពីមន្រ្តីការិយាល័យទំនាក់ទំនងព្រំដែនខ្មែរ-សៀម ដែលទទួលផែនការពីស្ថាប័នអយ្យការឲ្យចុះស្រាវជ្រាវករណីនេះឲ្យដឹងថា ការិយាល័យទំនាក់ទំនងព្រំដែន និងអង្គភាពផ្សេងទៀត កំពុងធ្វើការពិចារណារិះរកមធ្យោបាយជាថ្មីដើម្បីចូលទៅកាន់តំបន់នោះ ខណៈកិច្ចប្រតិបត្តិការកន្លងមកត្រូវបរាជ័យ ដោយសារជនប្រដាប់អាវុធមួយក្រុមធ្វើការរារាំង និងគំរាមកំហែង ។ មន្រ្តីដដែលបន្តថា ពេលនេះគេដឹងថា ក្រុមសង្គមងងឹតដែលសុទ្ធសឹងជាកងកម្លាំងប្រដាប់អាវុធទាំងនោះ បានត្រៀមលក្ខណៈជាស្រេចពោរពេញដោយគំនិតទុច្ចរិតគ្រប់រូបភាព ដើម្បីទប់ទល់ជាមួយកម្លាំងសមត្ថកិច្ចទាំងឡាយណាដែលប៉ុនប៉ងចង់ចូលទៅកាន់តំបន់នោះ ដើម្បីពិនិត្យផ្នូរសព ឬពិនិត្យកន្លែងកើតហេតុ។
ប្រភពដែលសុំលាក់ឈ្មោះនេះ បានរំលឹកថា បន្ទាប់ពីបែកធ្លាយសំណុំរឿងនេះដំបូង និងក្រោយពីគ្រួសារជនរងគ្រោះដាក់ពាក្យស្នើសុំឲ្យ
ការិយាល័យទំនាក់ទំនងព្រំដែនជួយរកវិធីចូលយកសព ស្ថាប័នអយ្យការបានដាក់ផែនការនេះដល់អង្គភាពពាក់ព័ន្ធមួយចំនួនឱ្យធ្វើការដោះស្រាយ ក្នុងនោះមានការិយាល័យទំនាក់ទំនងព្រំដែនខ្មែរ-សៀម វរៈការពារព្រំដែនគោកលេខ៨២៣ វរៈការពារព្រំដែនគោកលេខ៣១០ និងអង្គភាពយោធាផ្នែកសឹករងស្រុកសំឡូត ដើម្បីបើកកិច្ចប្រតិបត្តិការចូលទៅកាន់តំបន់នោះ ។ ប៉ុន្តែកិច្ចប្រតិបត្តិការនេះ ត្រូវបានរារាំងដោយមន្រ្តីយោធាថ្នាក់ឧត្តមសេនីយ៍ដ៏មានឥទ្ធិពលម្នាក់ដែលគ្រប់គ្រង និងការពារក្រុមអ្នករកស៊ីបទល្មើសព្រៃឈើនៅតំបន់នោះ ខណៈដែលកម្លាំងចម្រុះរាប់សិបនាក់ឡើងជិតដល់ចំណុចកើតហេតុទៅហើយ ។
ប្រភពនេះបញ្ជាក់ថា កម្លាំងចម្រុះទាំងនោះបានឡើងដល់ចំណុច«សារិកា»នៅចម្ងាយប្រហែល១គីឡូម៉ែត្រប៉ុណ្ណោះ ដល់ចំណុចកើតហេតុ ។ ប៉ុន្តែគ្រានោះ ស្រាប់តែឧត្តមសេនីយ៍យោធាម្នាក់មានរហស្សនាម«៩៦»បានបញ្ជាភ្លាមៗតាមវិទ្យុទាក់ទងឲ្យកម្លាំងទាំងអស់ត្រឡប់ថយក្រោយវិញជាបន្ទាន់ ។ ប្រភពព័ត៌មានបញ្ជាក់ថា ពេលនោះមានកម្លាំងមួយចំនួនបានដកថយតាមបញ្ជា ឯកម្លាំងមួយចំនួនទៀតដែលមានកម្លាំងការិយាល័យទំនាក់ទំនងព្រំដែនផងមិនបានដកថយទេ តែមានការផ្ដាំផ្ញើបែបគំរាមតាមវិទ្យុទាក់ទងថា«កម្លាំងដែលមិនដកថយចង់ធ្វើអីធ្វើទៅ»។ គ្រានោះមានភ្លៀងធ្លាក់ខ្លាំង និងមើលទៅកម្លាំងដែលមិនដកថយនេះកំពុងស្ថិតក្នុងស្ថានភាពគ្រោះថ្នាក់បំផុត(ស្ថិតក្នុងចង្កូមខ្លា) ទើបសម្រេចត្រឡប់ក្រោយវិញ តែមិនអាចត្រឡប់តាមផ្លូវចាស់ទេ គឺសម្រេចដើរតាមផ្លូវថ្មីក្នុងព្រៃតាមជ្រលងភ្នំ ព្រោះផ្លូវចាស់អាចមានគ្រោះថ្នាក់ដោយសារគ្រាប់មីន ឬគ្រាប់បែក ដែលក្រុមជនសង្គមងងឹតបង្កៃចោលតាមក្រោយ ។
គួររំលឹកថា សំណុំរឿងឈ្មួញរកស៊ីឈើគ្រញូងបាញ់សម្លាប់គ្នាក្នុងព្រៃដែលបែកធ្លាយធ្វើឲ្យរញ្ជួយពេញខេត្តបាត់ដំបងនេះ បានកើតឡើងកាលពីថ្ងៃទី១៧ កក្កដា ឆ្នាំ២០១២ នៅចំណុច«ពាមតា»ក្នុងភូមិសាស្រ្តឃុំតាតោក ស្រុកសំឡូត ។ ករណីនេះ បង្កឡើងដោយឈ្មួញរកស៊ីបទល្មើសព្រៃឈើមួយក្រុមដែលគេស្គាល់ថា ភាគច្រើនជាកម្លាំងប្រដាប់អាវុធ បានប្រើប្រាស់កាំភ្លើង និងគ្រាប់បែកដៃពី២ទៅ៣គ្រាប់បោក និងបាញ់សម្លាប់ក្រុមអ្នកកាប់ឈើគ្រញូងលក់បណ្ដាលឲ្យស្លាប់ម្នាក់ឈ្មោះសល់ សែល ហៅកំពង់ស្ពឺ អាយុ២៣ឆ្នាំ និងម្នាក់ទៀតឈ្មោះសោម សីហា ហៅឆក របួសភ្លៅខាងឆ្វេងដោយសារត្រូវអំបែងគ្រាប់បែក ។ មូលហេតុនៃការបាញ់សម្លាប់គ្នានេះ គឺក្រុមឈ្មួញបានទៅទិញឈើគ្រញូងចំនួន១១សន្លឹក ដែលមានទំហំធំៗពីក្រុមអ្នកកាប់ លុះត្រូវថ្លៃគ្នាឈ្មួញបានសុំដឹកឈើចេញសិន រួចប្រគល់ប្រាក់ជាក្រោយ តែក្រុមជនរងគ្រោះមិនព្រម ។ គ្រានោះ ក៏មានការឈ្លោះប្រកែកគ្នាយ៉ាងតឹងតែង ធ្វើឲ្យក្រុមឈ្មួញក្ដៅក្រហាយក៏ទាញកាំភ្លើងបាញ់ប្រហារ និងបោកគ្រាប់បែកបន្ថែមដើម្បីសម្លាប់ពួកគេតែម្ដង ។ ក្រុមអ្នកកាប់ឈើនេះមានគ្នាសរុបចំនួន១៤នាក់ តែនៅថ្ងៃកើតហេតុមានតែ២នាក់ទេនៅចាំកន្លែងទើបមានបញ្ហាកើតឡើង ។ ករណីនេះត្រូវបានក្រុមជនដៃដល់ និងមន្រ្តីមានអំណាចមួយចំនួនដែលសមគំនិត ព្យាយាមបិទបាំងអស់រយៈពេលមួយខែ សូម្បីតែអាជ្ញាធរ ឬសមត្ថកិច្ចជំនាញក៏មិនបានដឹងដែរ។ លុះនៅថ្ងៃទី១៧ សីហា កន្លងទៅនេះ ទើបបែកការណ៍ ដោយសារតែគ្រួសារជនរងគ្រោះទៅស្នើឲ្យការិយាល័យទំនាក់ទំនងព្រំដែនជួយអន្តរាគមន៍ចូលយកសព ។
គេនៅតែមិនអាចស្វែងរកការបំភ្លឺពីអង្គភាពពាក់ព័ន្ធបាននៅឡើយទេ នៅរសៀលថ្ងៃទី៦ កញ្ញា ជុំវិញសំណុំរឿងបាញ់សម្លាប់គ្នាយ៉ាងសាហាវនេះ ។ លោកជេត វណ្ណនី ស្នងការរងនគរបាលខេត្ត បានមានប្រសាសន៍នៅព្រឹកថ្ងៃទី៦ កញ្ញាដែរថា សមត្ថកិច្ចមូលដ្ឋានមិនបានរាយការណ៍អំពីព័ត៌មាននេះទេ ។ លោកបន្តថា ក្រោយពីមានសារព័ត៌មានចេញផ្សាយអំពីរឿងនេះ លោកបានសួរនាំទៅលោក លី ប៊ួយ អធិការនគរបាលស្រុកសំឡូត ហើយលោកលី ប៊ួយប្រាប់ថា ដឹងដែរតែដូចជាមិនពិតទើបលោកមិនបានរាយការណ៍មកលោកស្នងការ ។ លោកស្នងការរងបញ្ជាក់ថា ឥឡូវលោកស្នងការបានបញ្ជាឲ្យកម្លាំងជំនាញស្រុកសំឡូតចុះស្រាវជ្រាវករណីនេះហើយ ។
មន្រ្តីការិយាល័យទំនាក់ទំនងព្រំដែនបានឲ្យដឹងបន្ថែមនៅព្រឹកថ្ងៃទី៦ កញ្ញា ថា បើតាមបក្សពួកជនរងគ្រោះបំភ្លឺថា សាកសពជនរងគ្រោះត្រូវក្រុមឃាតករជួលមនុស្ស៣នាក់ឲ្យជីករណ្ដៅកប់ ក្នុងនោះមាន ១-ឈ្មោះរ៉េន វីរៈ ហៅជាង នៅភូមិកញ្ចាំង ស្រុកសំឡូត ២-ឈ្មោះកង សុភាព នៅភូមិអូររថក្រោះ ស្រុកសំឡូត និង៣-ឈ្មោះអី នៅខេត្តប៉ៃលិន ។ នៅជុំវិញផ្នូរសព ត្រូវបានក្រុមសង្គមងងឹតបង្កប់គ្រាប់មីន និងបង្កៃគ្រាប់បែកក្នុងព្រៃជុំវិញតំបន់នោះផង ដើម្បីការពារ និងគំរាមដល់កម្លាំងសមត្ថកិច្ចដែលប៉ុនប៉ងចូលទៅយកសព ឬពិនិត្យកន្លែងកើតហេតុ ។
ប្រភពព័ត៌មានបានឲ្យដឹងដែរថា បច្ចុប្បន្នក្រុមអ្នករកស៊ីកាប់ឈើគ្រញូងនៅតំបន់កើតហេតុនោះ មានកម្លាំងយ៉ាងតិចពី៥០នាក់ទៅ៧០នាក់កំពុងសម្ងំលាក់ខ្លួនក្នុងព្រៃ ដែលគ្រប់គ្រងផ្ទាល់ដោយក្រុមប្រដាប់អាវុធមួយក្រុម និងមានបង្អែកដ៏រឹងមាំពីឧត្តមសេនីយ៍យោធាដ៏មានឥទ្ធិពលម្នាក់ ។ កម្លាំងអ្នកកាប់ឈើទាំងនេះ ត្រូវបានបែងចែកជា៣ក្រុម ដែលក្រុមទី១បោះជំរំនៅចម្ងាយពីចំណុច«សារិកា»ប្រហែល១គីឡូម៉ែត្រ ក្រុមទី២បោះជំរំនៅចំណុច«តង់ខៀវ»ក្បែរចំណុច«ពាមតា» ជិតកន្លែងកើតហេតុដែលគ្រប់គ្រងដោយវរសេនីយ៍ត្រីយោធាម្នាក់ និងក្រុមទី៣ បោះជំរំនៅចំណុច«ក្បាលអូរត្រែង»គ្រប់គ្រងដោយមន្រ្តីយោធាម្នាក់ហៅ«តាក្របី»។
ប្រភពដដែលបានលើកឡើងថា បញ្ហានេះអាជ្ញាធរ ឬសមត្ថកិច្ចពាក់ព័ន្ធគួរតែចាត់វិធានការឲ្យបានឆាប់បំផុត ព្រោះពេលនេះបើតាមសេចក្ដីរាយការណ៍ថា ក្រុមជនទុច្ចរិតកំពុងបង្កើនសកម្មភាពពេញទំហឹង ដោយគ្មានអ្នកណាហ៊ានរារាំងឡើយ។ ជាពិសេស ពួកគេកំពុងប្រើគំនិតទុច្ចរិតយកគ្រាប់មីនកប់ក្នុងដី និងបង្កៃគ្រាប់បែកតាមបណ្ដាច្រកនានាទៅកាន់តំបន់នោះ ។ អ្នករាយការណ៍ប្រាប់ថា ការដាក់មីន និងបង្កៃគ្រាប់បែកនេះគឺទី១-ការពារមិនឲ្យកម្លាំងជំនាញចូលទៅពិនិត្យសព ឬទីតាំងកើតហេតុ និងទី២-ខ្លាចកម្លាំងជំនាញចូលទៅរកឃើញក្រុមកម្មករដែលកំពុងលាក់ខ្លួនក្នុងព្រៃដើម្បីកាប់បំផ្លាញឈើប្រណីតនៅតំបន់នោះ ។ ទោះជាយ៉ាងណា ស្ថាប័នពាក់ព័ន្ធមួយចំនួនកំពុងរិះរកវិធានការចុះទៅកាន់តំបន់នោះហើយ ដើម្បីស្វែងរកការពិត ៕
ចែករំលែកព័តមាននេះ