រាជធានីភ្នំពេញ ៖ តារាសម្តែងលោក ស៊ុក សុភា ទទួលបានកិត្តិយសដោយរាជរដ្ឋាភិបាលកម្ពុជា ប្រគល់មេដាយថ្នាក់មហាសេនា បន្ទាប់ពីតារាសម្តែងរូបនេះបំពេញការងារបម្រើសង្គម និងប្រទេសជាតិជាច្រើននាពេលកន្លងមក ។ពិធីប្រគល់មេដាយថ្នាក់មហាសេនាដល់លោក ស៊ុក សុភា រៀបចំធ្វើឡើងកាលពីថ្ងៃទី៣ កញ្ញា ឆ្នាំ២០១២ ក្នុងពិធីសំណេះសំណាលជាមួយសេនានុព័ន្ធយោធា
រាជធានីភ្នំពេញ ៖ តារាសម្តែងលោក ស៊ុក សុភា ទទួលបានកិត្តិយសដោយរាជរដ្ឋាភិបាលកម្ពុជា ប្រគល់មេដាយថ្នាក់មហាសេនា បន្ទាប់ពីតារាសម្តែងរូបនេះបំពេញការងារបម្រើសង្គម និងប្រទេសជាតិជាច្រើននាពេលកន្លងមក ។ពិធីប្រគល់មេដាយថ្នាក់មហាសេនាដល់លោក ស៊ុក សុភា រៀបចំធ្វើឡើងកាលពីថ្ងៃទី៣ កញ្ញា ឆ្នាំ២០១២ ក្នុងពិធីសំណេះសំណាលជាមួយសេនានុព័ន្ធយោធានៃសាធារណរដ្ឋឥណ្ឌូណេសីុ ប្រចាំកម្ពុជា ដែលបញ្ចប់បេសកកម្មរបស់ខ្លួនរយៈពេល៤ឆ្នាំក្រោមអធិបតីភាពលោកនាយឧត្តមសេនីយ៍ ហ៊ីង ប៊ុនហៀង អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការនៃបញ្ជាការដ្ឋានអង្គរក្ស ។
តាមការឲ្យដឹងរបស់តារាសម្តែង ស៊ុក សុភា និងជាអនុប្រធានយុវជនគណបក្សប្រជាជនប្រចាំខេត្តកំពត និយាយថា ការបំពាក់មេដាយថ្នាក់មហាសេនារបស់រាជរដ្ឋាភិបាល គឺក្រោយពេលដែលលោក រួមនិងក្រុមចលនាយុវជនជាច្រើនរូបទៀត បំពេញការងារសង្គមប្រកបដោយស្នាដៃជាច្រើនក្នុងខេត្តកំពត ។ កន្លងមកលោកធ្លាប់ទទួលបានមេដាយចំនួន២លើករួចមកហើយ ចំណែកនេះជាលើកទី៣ ។ ការងារដែលលោកបានបំពេញ និងមានស្នាដៃរហូតទទួលបានមេដាយថ្នាក់មហាសេនាពីរាជរដ្ឋាភិបាលនេះគឺមិនមែនជាការងារលើវិស័យសិល្បៈទេ ប៉ុន្តែជាការងារសង្គមក្នុងចលនាយុវជនរបស់គណបក្សប្រជាជនប្រចាំខេត្តកំពត ។
តារាសម្តែងរូបនេះបញ្ជាក់ថា ក្រុមចលនាយុវជនរបស់លោកបានធ្វើសកម្មភាពអស់រយៈពេលជិត៥ឆ្នាំមកហើយ គឺដំបូងធ្វើសកម្ម
ភាពតែក្នុងមួយស្រុកប៉ុណ្ណោះ ប៉ុន្តែអាស្រ័យដោយបំពេញកិច្ចការទទួលជោគជ័យជាច្រើន និងជាបន្តបន្ទាប់នោះក៏ត្រូវបានថ្នាក់លើមានទំនុកចិត្តរហូតឲ្យគ្រប់គ្រង និងធ្វើចលនាសកម្មភាពទូទាំងខេត្តកំពត ។សកម្មភាពក្រុមចលនាយុវជនគណបក្សប្រជាជន គឺរួមមានការចុះជួបប្រាស្រ័យដោយផ្ទាល់ជាមួយប្រជាពលរដ្ឋ ជួយចែករំលែកការលំបាក និងការងារសង្គមផ្សេងៗទៀតរបស់ពួកគាត់តាមលទ្ធភាពដែលក្រុមចលនាយុវជនអាចធ្វើបាន ។
ទន្ទឹមនោះក៏មានការបំផុសចលនាយុវជនឱ្យចូលសិក្សា រួមទាំងការបង្ហាត់បង្រៀននិងអប់រំឲ្យពួកគេឱ្យបានយល់ដឹងអំពីបញ្ហាសង្គម និងបញ្ហានយោបាយ សំខាន់គឺនយោបាយប្រកបដោយស្ថិរភាព សន្តិភាព និងការអភិវឌ្ឍក្រោមការដឹកនាំប្រកបដោយភាពឈ្លាសវៃ និងត្រឹមត្រូវរបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃរាជរដ្ឋាភិបាលកម្ពុជា ។ លោក ស៊ុក សុភា បានសម្តែងក្តីសប្បាយរីករាយយ៉ាងខ្លាំង ក្នុងពេលលោកទទួលបានការបំពាក់មេដាយថ្នាក់មហាសេនាពីរាជរដ្ឋាភិបាលកម្ពុជាដោយលោកចាត់ទុកថា ជាកិត្តិយសដ៏ឧត្តុង្គឧត្តម និងមិននិកស្មានដល់ ។ លោកគិតថា មេដាយដែលទទួលបាននេះបញ្ជាក់ឲ្យឃើញថា សិល្បករ-សិល្បការិនីខ្មែរយើងមិនគ្រាន់តែមានសមត្ថភាពសម្តែងលើវេទិកា ឬលើឆាកប៉ុណ្ណោះទេ ប៉ុន្តែក៏មានសមត្ថភាព រួមទាំងមនសិការក្នុងការចូរួមចំណែកការងារសង្គម និងអភិវឌ្ឍប្រទេសជាតិផងដែរ ។
លោក ស៊ុក សុភា អះអាងថា ដោយសារតែមមាញឹកនឹងការងារចលនាយុវជន ការងារជួយដល់សង្គម លោកត្រូវបង្ខំចិត្តលះបង់ការងារសិល្បៈមួយរយៈ បើទោះជាបណ្តាក្រុមហ៊ុន ឬផលិតកម្មជាច្រើនបានមកទាក់ទងឲ្យលោកចូលរួមសម្តែងក៏ដោយ ។
លោក ស៊ុក សុភា អំពាវនាវដល់សិល្បករ-សិល្បការិនីទាំងអស់ត្រូវឆ្លៀតពេលវេលា ដើម្បីចូលរួមចំណែកក្នុងការងារជួយដល់សង្គម បន្ថែមទៀតតាមលទ្ធភាពរៀងៗខ្លួន ព្រោះការងារសង្គមមិនគ្រាន់តែរួមចំណែកក្នុងការស្តារ និងអភិវឌ្ឍប្រទេសប៉ុណ្ណោះទេ ប៉ុន្តែស្នាដៃនៃការងារសង្គមនឹងជួយដល់សិល្បករ-សិល្បការិនី ទទួលបានមកវិញនូវការគាំទ្រពីទស្សនិកជន ថែមទៀត ៕
ចែករំលែកព័តមាននេះ