ក្រុងប៉ោយប៉ែត ៖ ប្រភពព័ត៌មានបានឱ្យដឹងថា អង្ករ និងស្រូវដែលឈ្មួញខ្មែរដឹកតាមរថយន្តទៅលក់ឱ្យឈ្មួញថៃនៅតាមបន្ទាត់ព្រំដែន ក្នុងខេត្តបន្ទាយមានជ័យ ខេត្តបាត់ដំបង និងខេត្តប៉ៃលិន ឈមនឹងខេត្តស្រះកែវ និងខេត្តចាន់បុរី របស់ថៃកំពុងកកស្ទះរាប់សិបគ្រឿង ដែលការកកស្ទះនេះកើតមានរយៈពេល៤ថ្ងៃមកហើយ គឺតាំងពីថ្ងៃទី៣ កញ្ញា មកម៉្លេះ ដោយសារភាគីថៃបិទមិនឱ្យឈ្មួញថៃនាំចូល ។
នៅព្រំដែនក្នុងខេត្តបន្ទាយមានជ័យតាមច្រករបៀងភូមិជោគជ័យ ច្រកអូរបីជាន់ ក្នុងស្រុកអូរជ្រៅ និងច្រកមួយចំនួនទៀតក្នុងស្រុកថ្មពួក គេឃើញរថយន្តផ្ទុកអង្ករ និងស្រូវជាច្រើនគ្រឿងចតត្រៀបត្រាកកស្ទះមិនអាចនាំចេញបាន ។ តាមលោកសួង មឿន មេឃុំអូរបីជាន់បានប្រាប់កោះសន្តិភាពថា ការបិទមិនឱ្យនាំចូលអង្ករ និងស្រូវនៅតាមបន្ទាត់ព្រំដែនក្នុងឃុំអូរបីជាន់ពីសំណាក់ភាគីថៃ បានកើតឡើងចាប់តាំងពីថ្ងៃទី៣ ខែកញ្ញា មក ហើយភាគីថៃមិនបានប្រាប់ពីមូលហេតុទេ ។
ដោយឡែក ប្រភពពីសមត្ថកិច្ចជួរមុខ ក្នុងស្រុកថ្មពួកក៏ដូចគ្នាដែរ បានប្រាប់តាមទូរស័ព្ទថា ភាគីថៃក្នុងស្រុកតាប់ប្រាយ៉ាឈមនឹងស្រុកថ្មពួកបានបិទការនាំចូលស្រូវ និងអង្កររបស់ខ្មែរ ដោយពុំប្រាប់ពីមូលហេតុទេ ។ ប្រភពដដែលបន្តថា ពីមុនមានការនាំចូលស្រូវ និងអង្កររាល់ថ្ងៃពីកម្ពុជាទៅថៃតាមបន្ទាត់ព្រំដែនពុំដែលមានការកកស្ទះដូច្នេះទេ ។ ចំណែកតាមប្រភពព័ត៌មានពីច្រករបៀងអូរអន្លក់ ស្រុកកំរៀង ខេត្តបាត់ដំបង បានឱ្យដឹងថា នៅទីនោះអង្ករ និងស្រូវក៏មានការកកស្ទះមិនអាចនាំចេញបានដែរ ។
ជុំវិញការបិទមិនឱ្យនាំចូលអង្ករ និងស្រូវនៅតាមបន្ទាត់ព្រំដែននេះ ប្រភពពីប្រទេសថៃបង្ហើបថា ដោយសារមួយរយៈនេះមានក្រុមការងារថៃចុះត្រួតពិនិត្យការនាំចូលអង្ករ និងចាប់រឹបអូសជាច្រើនតោននៅក្នុងខេត្តឆាក់ឆឺនសៅ ក្រោយពីនាំចេញពីកម្ពុជា ៕
ចែករំលែកព័តមាននេះ